Yobo 3:1-26
3 Pakapita malu aa ke pakatuadija Yobo kuakula ne kutshipa dituku divuabu bamulele.*+
2 Yobo wakamba ne:
3 “Dituku divuabu bandele dijimine,+Kabidi ne butuku buvua muntu kampanda muambe ne: ‘Mbimite muana mulume!’
4 Dituku adi dikale mîdima.
Nzambi wa mu diulu kadieledi meji nansha;Munya kawuditemenyi to.
5 Mîdima mipite bukole* idiangatulule.
Ditutu dia mvula didibuikile.
Tshionso tshitu tshifiikisha dituku tshidikuatshishe buôwa bukole.
6 Butuku abu, mifitu mikole ibukuate;+Kabuikadi ne disanka munkatshi mua matuku a tshidimu,Ne kabubuedi mu bungi bua ngondo to.
7 Eyowa! Butuku abu kabupatudi tshintu;Lubila lua disanka kalumvuikimu.
8 Bantu batu batshipa dituku babutshipe,Bobu badi ne bukole bua kujula Leviyatane.*+
9 Mitoto ya padi panshi pabu pafiike ilue mifiike;Buindile butoke bua mu dinda mu tshianana,Kabumonyi nsese ya patshiatshia.
10 Bualu kabuvua bukange biibi bia difu dia mamuanyi;+Kabuvua nansha busokoke mêsu anyi dikenga to.
11 Bua tshinyi tshivua mufue ku diledibua?
Bua tshinyi tshivua mujimine pamvua mupatuke mu difu?+
12 Bua tshinyi binu bivuaku bua kungakidila,Ne mabele bua kungamusha?
13 Nunku dîba edi mvua mua kuikala mulale ku matshi talalaa;+Mvua mua kuikala mulale, muikishe+
14 Pamue ne bakalenge ba pa buloba ne babapeshi ba ngenyiBavua badibakile miaba idi mishale mpindieu bikulu,*
15 Anyi pamue ne bakokeshi bavua ne or,Bena nzubu ivua miuwule ne arjan.
16 Bua tshinyi tshivua mua kuikala bu mukuji udi mutuke mu musokoko,Bu bana batu kabayi banji kumona butoke?
17 Muomu amu, nansha bantu babi mbalekele tshimvundu;Muomu amu, badi bazengele mbikishe.+
18 Muomu amu, bena buloko mbasombe pamue kakuyi bualu;Kabena bumvua dîyi dia muntu udi ubenzeja mudimu ku bukole.
19 Muomu amu, bakese ne banene badi diatshimue,+Ne mupika mmupikudibue ku bukokeshi bua mfumuende.
20 Bua tshinyi yeye udi upesha muntu udi ukenga butokeNe ufila muoyo kudi badi ne kanyinganyinga katambe bukole?*+
21 Bua tshinyi badi bajinga lufu kadi kaluyi lulua?+
Badi bumbula bua kulukeba kupita mudibu bakeba biuma bisokoka,
22 Bobu badi basanka bikole,Badi ne diakalengele padibu bapeta lukita.
23 Bua tshinyi yeye udi ufila butoke kudi muntu udi mujimije njila wende,Muntu udi Nzambi muelele lupangu?+
24 Bualu, kupumuna kuanyi kua muoyo nkulue pa muaba wa biakudia bianyi+Ne mikemu yanyi+ idi ipatuka anu bu mâyi.
25 Bualu tshidi tshingenza buôwa bukole ntshimfikile,Ne tshindi ntshina ntshintulukile.
26 Tshiena ne ditalala nansha dikese, anyi bupole, anyi dikisha,Kadi dikenga didi ditungunuka ne kulua.”
Note
^ Ku mua.: “kutshipa dituku diende.”
^ Anyi “mîdima ne mundidimbi wa lufu.”
^ Batu bela meji ne: udi mua kuikala ngandu anyi nyama kampanda munene wa mu mâyi udi ne bukole bua bungi.
^ Anyi pamuapa: “bavua badibakile miaba ya munda mutupu.”
^ Anyi “badi ne anyima udi unyingalala bikole.”
