1. Ndibenesha kayi diudi windila ne muoyo mujima mu bulongolodi bupiabupia?

 PAUDI umvua bakula bua “bulongolodi bupiabupia” utuku wela meji ku mabenesha atuikala ne bua kumona ne mêsu etu abidi anyi? Udi mua kuela meji mutuikala ne mubidi mupuangane, biakudia bimpe bia bungi, nyama idi kayiyi yenzelangana bibi anyi nzubu milenga. Udi mua kutela too ne mvese ya mu Bible idi yakula bua milayi eyi. Kadi kupu muoyo dibenesha dia kuikala mu malanda mimpe ne Nzambi ne kuikala ne ditalala dia mu lungenyi to. Wewe kuyi ne dibenesha edi, masanka makuabu onso adi alua tshianana.

2, 3. Malu avua Yelemiya mufunde adi atuambuluisha bua kutekemena mabenesha kayi?

² Pavua Nzambi muambile Yelemiya bua kumanyisha dipingana dia bena Yuda kuabu, wakaleja muvuabu ne bua kudiumvua wamba ne: ‘Newangate mazele ebe kabidi, neulopoke nawu bua kubuela mu maja a badi basanka.’ (Bala Yelemiya 30:18, 19; 31:4, 12-14.) Nzambi wakamba bualu bukuabu budi mua kukukolesha ku muoyo ne: ‘Nempoleshe mutshima wa muntu udi mupungile, nenkankamije mitshima ya bantu bonso badi ne kanyinganyinga.’ Mu Bible mukuabu mbakudimune dilaya dia Nzambi edi ne: ‘Nenkumbaje majinga onso a bantu badi bapungile ne nenkoleshe mioyo ya bantu badi batekete.’​—Yel. 31:25, The NET Bible.

³ Edi nditekemena dimpe be! Yehowa wakamba ne: uvua ne bua kukumbaja majinga onso a muntu uvua mupungile  ne mutekete ku muoyo. Nzambi utu ukumbaja malu atuye ulaya. Malu avua Yelemiya mufunde adi atujadikila ne: Nzambi neatukumbajile majinga etu. Adi atuleja kabidi mutudi mua kukola ku muoyo nansha lelu. Pashishe adi atuleja mushindu utudi mua kukankamija bantu badi batekete ku muoyo.

4. Bua tshinyi mbipepele bua tuetu kumvua muvua Yelemiya udiumvua?

⁴ Mulayi eu uvua mukoleshe Yelemiya ku muoyo ne udi mua kutukolesha petu lelu. Bua tshinyi? Tuvuluke bualu butuvua bakule mu nshapita wa kumpala bua ne: Yelemiya uvua ‘muntu wa mutshima muomumue netu’ anu bu muvua Eliya. (Yak. 5:17) Ela meji ku malu makese avua mua kuikala atekesha Yelemiya ku muoyo ne amunyingalaja. Pashishe ela meji muudi mua kudiumvua wewe mu nsombelu ya muomumue ne tshidi ntatu iudi upeta mua kukutekeshila ku muoyo.​—Lomo 15:4.

5. Ntshinyi tshivua mua kuikala tshitekesha Yelemiya ku muoyo?

⁵ Bena mu tshimenga tshia ba Yelemiya bavua mua kuikala bamutekesha pabu ku muoyo. Uvua mukolele mu tshimenga tshia bena Lewi tshia Anatota tshivua mu kilometre mikese lua ku Nord-Est kua Yelushalema. Yelemiya uvua ne bua kuikala ne balela ne bamanyangana nabu mu Anatota. Anu muvua Yezu muambe ne: muprofete katu utumbila kuabu, ke tshivua tshienzele Yelemiya. (Yone 4:44) Bena kuabu kabavua anu babenga kumuteleja anyi bamupepeja to, bualu musangu mukuabu Nzambi wakamba ne: ‘Bantu ba mu Anatota bavua bakeba muoyo’ wa Yelemiya. Bavua bamba ne lonji lonso ne: ‘Kuambi dîyi mu dîna dia Yehowa kabidi bua wewe kufu ku bianza bietu.’ Bena mutumba ne pamuapa balela bavua ne bua kutua ku tshiende ke bavua bamukanyina—Yel. 1:1; 11:21.

6. Tshivua tshienzekele Yelemiya ne “bantu ba mu Anatota” tshidi mua kukuambuluisha ku tshinyi padi bena mudimu nebe anyi bantu bakuabu bakuluisha?

⁶ Padi bena mutumba, balongi nebe, bena mudimu nebe  anyi bena mu dîku dienu bakutatshisha, udi mua kukola ku muoyo paudi umona tshivua Yehowa muenzele Yelemiya. Nzambi wakamba muvuaye ne bua ‘kukengesha’ bantu ba mu Anatota bavua baluisha muprofete wende. (Bala Yelemiya 11:22, 23.) Kakuyi mpata, tshivua Nzambi mujadikile Yelemiya etshi tshiakamuambuluisha bua kukola ku muoyo ne kutantamena buluishi bua bena kuabu. Pashishe Nzambi ‘wakavuija ntatu kudi bantu ba mu Anatota’ anu muvuaye mulaye. Ikala pebe mushindike ne: Yehowa udi umona ntatu yebe. (Mus. 11:4; 66:7) Wewe ‘munanukile’ kushala mu malongesha a mu Bible ne kuenza malu mimpe, udi mua kuambuluisha bamue baluishi bua kuepuka dikenga didi mua kulua kubakuata.​—1 Tim. 4:16.

7, 8. Ndikenga kayi divua Yelemiya mupete? Divua dimuenzele tshinyi?

⁷ Yelemiya kavua anu mupete mikanu ya bena kuabu to. Tudi mua kutela tshivuabu bamuenzele kudi Pashû, muakuidi uvua mumanyike bikole mu Yelushalema. a “Pashû wakakuma muprofete Yelemiya, wakamubueja mu bikunyi” panyima pa yeye mumane kumvua malu a kudi Nzambi avuaye umanyisha. (Yel. 20:1, 2) Mêyi aa kaena umvuija ne: uvua mumukume anu dipi patupu to. Bantu bakuabu badi bamba ne: Pashû uvua mututshishe Yelemiya mfimbu mitue ku 40. (Dut. 25:3) Pavua Yelemiya ukenga ne mitutu apu, bantu bavua mua kuikala bamuela bibingu, bamupenda ne bamutuila mate. Kabakashikila anu apu to. Pashû wakela Yelemiya mu “bikunyi” butuku bujima. Muaku wa mu tshiena Ebelu udibu bafunde muaba eu udi uleja ne: mubidi wende uvua mukobame. Bushuwa, Yelemiya wakakenga bikole butuku bujima mu bikunyi bivuabu bamukangile abi.

⁸ Malu avuabu benzela Yelemiya aa akamuenzela tshinyi? Wakambila Nzambi ne: ‘Ngakulua bu tshintu tshidibu  baseka dituku dijima.’ (Yel. 20:3-7) Meji akamuluila bua kulekela kuamba malu mu dîna dia Nzambi. Anu bu muudi mumanye, kakakokesha bua kuenza nanku to, bualu dîyi divua Nzambi mumutume bua kuambila bantu divua ‘bu kapia kavua kosha munda mua mifuba yende’ ne uvua ne bua kudiambila bantu.​—Bala Yelemiya 20:8, 9.

9. Bua tshinyi mbimpe tuele meji ku malu avua menzekele Yelemiya?

⁹ Bualu ebu budi mua kutuambuluisha bikala bantu batudi bamanye bu mudi balela betu, bena mutumba, bena mudimu netu anyi balongi netu batuseka. Kabiena ne bua kutukemesha bikala imue misangu buluishi ebu bututekesha ku muoyo to. Ke tshidi kabidi mua kutuenzekela padibu batukengesha bualu tudi tutendelela Nzambi mulelela. Bu muvua Yelemiya muntu mupange bupuangane anu bu tuetu, malu aa akamutonda ne adi mua kututonda petu. Kadi katupu muoyo ne: Nzambi wakamuambuluisha bua kupetulula dishindika ne disanka. Kakashala anu  mutekete ku muoyo to, ke tshitudi petu ne bua kuenza.​—2 Kol. 4:16-18.

10. Ntshinyi tshidi Bible wamba bua muvua Yelemiya udiumvua?

¹⁰ Kuvua misangu ivua Yelemiya udiumvua bimpe ne ivuaye udiumvua bibi. Bituku bikufikila pebe bua kudiumvua bimpe ne kuikala ne disanka ne pashishe ulua kumvua dibungama anyi? Bua pa bidi bitangila disanka, tangila tshidi Yelemiya 20:12, 13 wamba. (Bala.) Pashû mumane kumukengesha, Yelemiya wakasanka bualu uvua anu bu mukengi uvuabu basungile “mu bianza bia benji ba malu mabi.” Bobu bakusungile mu mushindu kampanda anyi wewe mupete bualu buimpe mu mudimu wetu wa kuyisha, udi mua kumvua disanka dia bungi ne ujinga kuimbila Yehowa misambu. Kudiumvua nanku kutu kuimpe be!​—Bien. 16:25, 26.

11. Tuetu tumvua disanka ne diakamue tupeta dibungama, ntshinyi tshitudi ne bua kulongela kudi Yelemiya?

¹¹ Kadi bu mutudi bantu bapange bupuangane, disanka dietu didi mua kulua dibungama anu bu muvuabi bienzekele Yelemiya. Yeye mumane kuamba ne: ‘Imbilayi Yehowa misambu,’ wakumvua dibungama dikole ne pamuapa kupuekesha binsonji. (Bala Yelemiya 20:14-16.) Bua bungi bua kanyinganyinga kavuaye naku, wakadiebeja bua tshinyi uvua muledibue. Mu dibungama diende wakamba muvua muntu uvua mumanyishe diledibua diende muikale muena diakabi  anu bu Sodoma ne Amola. Kadi tshilumbu tshinene ntshia kumanya bikala Yelemiya ni uvua mushale mubungame kashidi. Uvuaku mushale muvunge maboko, mulekele dibungama dimupita bukole anyi? Tòo, wakadienzeja bua kuditantamena ne wakadipita bukole. Tangila tshidi mukanda wa Yelemiya wamba pashishe. Pashû mukuabu uvua wenza mudimu ne mukalenge, wakalua kudi Yelemiya mu dîna dia mukalenge Sedekiya bua kumuebeja tshilumbu tshia bena Babulona bavua batshintshimike Yelushalema. Pamutu pa kutshina, Yelemiya wakamanyisha tshivua Yehowa muambe ne tshivua ne bua kuenzeka. (Yel. 21:1-7) Bidi bimueneka patoke ne: Yelemiya wakatungunuka ne mudimu wende wa buprofete.

12, 13. Ntshinyi tshitudi mua kuenza tuetu bamone ne: dibungama nditukuate diakamue?

¹² Lelu batendeledi ba Nzambi bakuabu batu bumvua disanka pashishe bumvua diakamue dibungama. Badi mua kuikala basama, ne munganga muimpe udi mua kubambuluisha bua kukepesha lutatu luabu. (Luka 5:31) Kadi bua ba bungi ba kutudi, disanka anyi dibungama bitutu tumvua imue misangu bitu bia pa tshibidilu. Bidi bimueneka ne: tutu tutamba kumvua bibi nangananga bualu tudi bantu bapange bupuangane. Tudi mua kubungama bualu tudi bapungile anyi tudi bafuishe muntu utuvua banange. Padi ntatu ya mushindu eu itukuata, tuvuluke ne: Yelemiya uvua pende umvua disanka ne diakamue umvua dibungama, kadi wakatungunuka ne kusankisha Nzambi. Bua tuetu kuyitantamena, tudi mua kushintulula bibidilu bietu bua kupeta dîba dia bungi dia kuikisha. Tudi mua kuikala kabidi ne lutulu bualu dibungama ditutu tupeta patutu tufuisha muntu kaditu dijika diakamue to. Nunku bidi ne mushinga wa bungi bua kutungunuka ne kubuela mu bisangilu bietu ne kuenza midimu mikuabu ya bena Kristo. Dîba adi, netutungunuke ne kuenzela Nzambi mudimu ne disanka.​—Mat. 5:3; Lomo 12:10-12.

 ¹³ Nansha wewe ne dibungama bualu udi usama anyi bua bualu budi bukukuate mu mpukapuka, tshilejilu tshia Yelemiya tshidi mua kukuambuluisha. Anu mutukadi bamone, kuvua misangu ivuaye udiumvua mutekete mu mikolo. Kadi kavua ulekela diteketa mu mikolo dimupangisha bua kutungunuka ne kuenzela Nzambi wende uvuaye munange mudimu anyi kumuela nyima to. Pavua baluishi bende bamupingajila bubi ku buimpe buvuaye ubenzela, uvua usambila Yehowa ne umueyemena. (Yel. 18:19, 20, 23) Ikala mudisuike bua kuidikija Yelemiya.​—Muad. 3:55-57.

14. Nnganyi uvua utamba kukankamija Yelemiya?

¹⁴ Mbimpe tukonkonone mushindu uvuabu bakoleshe Yelemiya ku muoyo ne uvuaye pende mukoleshe bakuabu bavua ne ‘mitshima mipungile.’ (Yel. 31:25) Yehowa ke uvua utamba kukankamija Yelemiya. Ela meji muuvua mua kuikala mukole ku muoyo bu wewe mumvue Yehowa ukuambila ne: ‘Mona, lelu eu ndi nkuvuija bu musoko wa lumbu. Nebaluangane nebe, kadi kabena bakupita bukole; bualu bua meme ndi nebe bua kukupandisha.’ (Yel. 1:18, 19) Ke bualu kayi Yelemiya uvua ubikila Yehowa ne: “Bukole buanyi ne musoko wanyi mukoleshibue ne ngumbu, tshinyemenu tshianyi mu dituku dia dikenga.”​—Yel. 16:19.

15, 16. Mushindu uvua Yehowa mukankamije Yelemiya udi mua kutuambuluisha bishi patudi tukankamija bantu bakuabu?

¹⁵ Yehowa wakambila Yelemiya ne: ‘Ndi nebe.’ Udiku umona mu mêyi aa tshiudi mua kuenza padi muntu uudi mumanye mutekete ku muoyo anyi? Kumanya ne: muena Kristo netu anyi mulela wetu udi dijinga ne dikankamija  kudi ne mushinga. Kadi kumukankamija mudibi bikengela kudi ne mushinga wa bungi. Misangu ya bungi, mbimpe kuenza tshivua Nzambi muenzele Yelemiya, tuambe ne: kusomba ne muntu udi mutekete ku muoyo au. Pashishe, udi mua kumuambila mêyi makese adi mua kumukankamija pamutu pa kumuambila mêyi mavule a tshianana. Mêyi makese adi mua kuambuluisha muntu padiwu masungule bimpe bua kumukankamija ne kumukolesha. Kukebi bua kuamba malu mu mushindu udi ukemesha to, kadi amba mêyi mapepele adi aleja muudi munange muanenu ne uditatshisha bua bualu buende. Mêyi a nunku adi mua kumuambuluisha bikole.​—Bala Nsumuinu 25:11.

¹⁶ Yelemiya wakalomba Yehowa ne: ‘Umvuluke, ulue kundi.’ Ntshinyi tshiakenzeka pashishe? Udi wamba ne: ‘Ngakasangana mêyi ebe, ngakaadia; mêyi ebe akadi kundi bu disanka ne akasankisha mutshima wanyi.’ (Yel. 15:15, 16) Bia muomumue, muntu utudi basue kukankamija udi mua kuikala ukengela bua tumutabalela. Tshia kumanya ntshia ne: mêyi ebe kaena diatshimue ne a Yehowa to. Kadi udi mua kusakidila mêyi a Nzambi ku audi wambila muntu. Malu a mu Bible audi umuambila ne muoyo mujima adi mua kumukolesha ne kumupetesha disanka.​—Bala Yelemiya 17:7, 8.

17. Ndilongesha kayi dinene ditudi tupetela ku tshivua Yelemiya muenzele Sedekiya ne Yohanana?

¹⁷ Tumanye ne: Nzambi mumane kukankamija Yelemiya, yeye pende wakakankamija bakuabu. Mushindu kayi? Dituku dikuabu, mukalenge Sedekiya wakambila Yelemiya muvuaye ne buôwa bua bena Yuda bavua bapunge tshipungidi ne bena Babulona. Yelemiya wakamukankamija ne mêyi mimpe, umubela bua atumikile Yehowa bua apanduke. (Yel. 38:19, 20) Yohanana mfumu wa basalayi wakajinga bua kuya mu Ejipitu ne bantu bakese bavua bashale mu Yelushalema panyima pa dibutuka diende. Kadi wakanji kuebeja Yelemiya tshia kuenza. Yelemiya wakateleja Yohanana ne kulomba Yehowa. Pashishe wakamuambila diandamuna divua dikolesha ku muoyo dia kudi Yehowa ne kumuambila malu mimpe  avuaye mua kupeta bu yeye mua kulonda tshivua Nzambi muambe ne kushala mu ditunga. (Yel. 42:1-12) Misangu yonso ibidi eyi, Yelemiya wakateleja bantu bavua balue kumukuatshila malu kumpala kua kuakulaye. Tuetu basue kukankamija bakuabu, tudi ne bua kubateleja. Lekela muntu akuambile malu adi mamutonde ne adi amuenza buôwa. Padibi bikumbanyine, mukankamije ne mêyi mimpe. Nzambi kakukuleja mu tshikena-kumona tshia wewe kumuambila to, kadi udi mua kumuambila malu a mu Dîyi dia Nzambi adi aleja masanka adi matuindile kumpala eku.​—Yel. 31:7-14.

18, 19. Ntshilejilu kayi tshia dikankamija bakuabu tshidi mu muyuki wa bena Lekaba ne wa Ebede-meleke?

¹⁸ Sedekiya ne Yohanana kabakalonda mibelu ivua Yelemiya mubapeshe to, ne lelu bantu bakuabu badi mua kubenga kuteleja yebe. Kabikutekeshi mu mikolo to. Kuvua bantu bavua bitabe mibelu ya Yelemiya ne nekuikale ba bungi bateleja yebe. Vuluka tshilejilu tshia bena Lekaba ba mu dîku dia Kena bavua balamate bena Yuda munkatshi mua bidimu bia bungi. Mu mikenji ivua nkambua wabu Yehonadaba mubelele, muvua uvua ubakandika bua kunua mvinyo bualu bavua benyi mu ditunga. Pavua bena Babulona balue kuluisha bena Yuda, Yelemiya wakaya ne bena Lekaba mu nzubu wa tshidilu wa ku ntempelo. Nzambi wakamuambila bua kubatekela mvinyo ku mesa. Bena Lekaba bakabenga kunua mvinyo bua kutumikila nkambua wabu ne bakaleja muvuabu bashilangane ne bena Isalele bavua babenge kutumikila Nzambi. (Yel. 35:3-10) Yelemiya wakabela kalumbandi ka kudi Yehowa ne kubambila muvuaye mulaye bua kubabenesha. (Bala Yelemiya 35:14, 17-19.) Etshi ntshilejilu tshiudi mua kulonda paudi ukankamija bakuabu. Ikala ubela kalumbandi ne muoyo mujima padiku mushindu.

¹⁹ Yelemiya wakenzela kabidi Ebede-meleke muena Atiopa uvua wenza mudimu kua mukalenge Sedekiya bia muomumue. Banene ba mu Yuda bakelesha Yelemiya mu tshina  tshia kulamina mâyi kayi ne bualu ne kumushiyamu bua afue. Ebede-meleke wakalomba mukalenge Sedekiya bua apandishe muprofete, ne mukalenge wakamuitabila. Muntu wa ku ba bende eu wakenza bualu ebu nansha muvuaye mumanye ne: bavua mua kumuenzela bibi. (Yel. 38:7-13) Bu muvuaye mufikishe banene ba mu Yuda munda, uvua mua kuikala ne buôwa bua tshivua mua kumufikila. Yelemiya kakashala mupuwe wela meji ne: buôwa bua Ebede-meleke nebudijikile to. Kadi wakayukila nende ne kumuambila malu mimpe avua Nzambi mumulongoluele.​—Yel. 39:15-18.

20. Ntshinyi tshitudi ne bua kujinga kuenzela bena Kristo netu bakulakaje ne bansonga?

²⁰ Bushuwa, patudi tubala mukanda wa Yelemiya, tudi tupeta bilejilu bimpe bia mushindu udi yonso wa kutudi mua kuenza tshivua Paulo muambile bena Kristo ba mu Tesalonike bua kuenza ne: ‘Nusambangane, nudiundishangane muntu ne muntu. Ngasa wa Mukalenge wetu Yezu Kristo ikale nenu.’​—1 Tes. 5:11, 28.