Nshapita wa 127

Mujiika Ditanu​—Lukita munda mutupu mu Dia lumingu

MPINDIEU dîba dikadi dilembelele bikole mu mapingaja mu Ditanu, ne Nsabatu wa dia 15 Nizan udi pa kutuadija ku dibuela dia dîba. Tshitalu tshia Yezu tshibotoloke ntshikudika ku mutshi, kadi bivi babidi badi umue ku dia balume ne mukuabu ku dia bakaji diende batshidi buobu ne muoyo. Ditanu mu mapingaja ndupolo ludi lubikidibua ne: Didilongolola bualu ke tshikondo tshidi bantu balamba biakudia ne baluijakaja bua kujikija midimu mikuabu idi kayiyi mua kuindila too ne panyima pa Nsabatu.

Nsabatu udi pa kutuadija mu katupa kîpi emu kêna patupu Nsabatu wa pa tshibidilu (dituku dia muanda-mutekete dia lumingu), apo mmuambakaja ibidi, anyi Nsabatu “munene.” Udi ubikidibua nunku bualu dia 15 Nizan, dituku dia kumpala dia ku matuku muanda-mutekete a Difesto dia mampa kaayi mela ntuntumuna (ne didi misangu yonso Nsabatu, nansha diodi dikumbane mu dituku kayi dionso dia mu lumingu) didi diakanangana ne Nsabatu wa pa tshibidilu.

Bilondeshile Mikenji ya Nzambi, bitalu kabiena ne bua kushala bikudika ku mutshi butuku bujima. Nunku, bena Yuda badi balomba Pilato bua kuambuluja kufua kua aba bavua bela ku mitshi pa kutshibula mikolo yabu. Nunku, basalayi badi batshibula mikolo ya bivi babidi. Kadi bu mudi Yezu umueneka mumane kufua, kabena batshibula mikolo yende to. Ebi bidi bikumbaja mufundu eu: “Kabakutshibula mufuba wende nansha umue.”

Kadi, bua kumana dielakana bikala Yezu mufue bushuwa, umue wa ku basalayi udi umutua difuma mu lubadi. Difuma didi ditubula tshitupa tshidi mutshima usanganyibua, ne diakamue mashi ne mâyi bidi bipatuka. Mupostolo Yone, mumonyi wa bionso ebi, udi ufunda bua kuleja mudi muanda eu ukumbaja mukuabu mufundu ne: “Nebatangile kudi Eu uvuabu batubule.” (NW)

Yozefe, muena mu Sanhedrin wa kunemekibua mufume mu tshimenga tshia Arimateya, udiku pende ku diedibua ku mitshi. Uvua mubenge kusangisha diende dîyi bua kusanyika dipangadika dikena diakane diangatshila Yezu kudi kabadi kakulu. Yozefe udi bushuwa muyidi wa Yezu, nansha muvuaye mutshine bua kudimanyisha patoke. Kadi mpindieu, udi uleja dikima pa kuya kudi Pilato bua kulomba tshitalu tshia Yezu. Pilato udi ubikidisha mfumu wa basalayi bedianganyi ba ku mitshi, ne padi muine eu umujadikila ne: Yezu mmumane kufua, Pilato udi ufidisha tshitalu kudi Yozefe.

Yozefe udi wangata tshitalu ne utshilongolola bua kujiika pa kutshijingila mu tshilamba tshia lin muena-dîna. Nikodeme, mukuabu muena mu Sanhedrin, udi umuelesha maboko. Nikodeme kavua pende mutonde ditabuja diende mu Yezu, bualu uvua utshina bua kavu kujimija muanzu wende. Kadi mpindieu, udi utuala mubombo wa kilo mitue ku 33 muikale ne manananshi a myrrhe ne aloès a mushinga mukole. Badi bajingila tshitalu tshia Yezu ne mikaba miela bia dipembu ebi, anu mutu bena Yuda benza bua kulongolola tshitalu bua kutshijiika.

Pashishe, badi baladika tshitalu mu lukita lua tshivulukilu lupialupia lua Yozefe luenza mu lubuebue mu budimi budi pabuipi. Ndekelu wa bionso, badi babunguluja dibue dinene ne bajika ku tshibuelelu tshia lukita. Bua kujikija dijiika dia tshitalu kumpala kua Nsabatu, ditshilongolola didi dienjibua ne mitalu. Nunku, Mariya Magdalene ne Mariya mamuende wa Yakobo Mukese, bavua pamu’apa bambuluishe ku dilongolola dia tshitalu, badi bambuluja ku mabu bua kulongolola bikuabu bintu bia dipembu ne manananshi. Mbapangadije bua kupingana panyima pa Nsabatu bua kutungunuka ne kubombeka mubidi bua kuukuba lupolo lule.

Dituku didi dilonda, mu Disambombo (dia Nsabatu), bakuidi bamfumu ne Bafarizeyi badi baya kudi Pilato ne bamba ne: “Mfumu, tudi tuvuluka muvua muena dishima awu wamba patshivuaye ne muoyo ne: ‘Papita matuku asatu, [nembiishibue, NW] ku lufu.’ Tuma diyi bua balame lukita too ne ku dituku disatu, bua balongi bende kabayi kumuiba, kabavu kuikala bambila bantu ne: ‘[wakabiishibua, NW] ku lufu!’; dishima dia mpindiewu nedipite dia kumpala ku bubi.”

“Nudi ne kasumbu ka balami,” ke mudi Pilato wandamuna. “Ndayi nululamishe anu munutu bamanye kuenza.” (NW) Nunku, badi baya ne balamisha lukita pa kuenza tshimanyinu pa dibue ne pa kuteka basalayi bena Roma bu balami.

Dia lumingu mu dindadinda Mariya Magdalene ne Mariya mamuende wa Yakobo, pamue ne Salomé, Jana ne bakaji bakuabu, badi batuala bia dipembu ku lukita bua kubombeka mubidi wa Yezu. Mu njila badi bambilangana ne: “Nganyi watumushila dibue ku mushiku wa lukita [lua tshivulukilu, NW]?” Kadi padibo bafika, badi bamona ne: tshikumina tshivua tshienzeke ne muanjelu wa Yehowa uvua mubunguluje dibue ku luseke. Balami bakadi baye ne lukita ndushale munda mutupu! Matewuse 27:57–28:2; Markuse 15:42–16:4; Lukase 23:50–24:3, 10; Yowanese 19:14, 31–20:1; 12:42, MMM; Lewitiki 23:5-7; Dutelonome 21:22, 23; Musambu wa 34:20; Zekâya 12:10.

▪ Bua tshinyi Ditanu didi dibikidibua ne: Didilongolola, ne Nsabatu “munene” ntshinyi?

▪ Pa bidi bitangila mubidi wa Yezu, mmifundu kayi idi ikumbajibua?

▪ Mmudimu kayi udi Yozefe ne Nikodeme bakumbaja pa bidi bitangila dijiika dia Yezu, ne mmalanda kayi adi mabasuikakaje ne Yezu?

▪ Ndilomba kayi didi bakuidi benza kudi Pilato, ne mmunyi mudiye wandamuna?

▪ Ntshinyi tshidi tshienzeka Dia lumingu mu dindadinda?