Nshapita wa 20

Tshishima tshibidi mu Kana

PADI Yezu upingana mu buloba buabu panyima pa kampanye kalabale ka buambi mu Yudeya, ki mbua kuikisha to. Kadi, udi utuadija kabidi mudimu wa mushinga mukole mu Ngalileya, rejon udiye mukolele. Tshidibi, bayidi bende pamutu pa kushala nende, badi bapingana ku mabu mu mêku abu ne baditua mu midimu yabu ya diambedi.

Mmukenji kayi udi Yezu utuadija kumanyisha? Ng’wowu eu: “Bukalenge bua Nzambi bukadi pabuipi. Nyingalalayi, ne itabujayi lumu luimpe.” Ngandamuinu wa bantu udi tshinyi? Bena Ngalileya badi bakidila Yezu. Buonso badi bamuambika lumu. Tshidibi, kabena bamuitabuja nangananga bua mukenji wende, apo bualu ba bungi ba kudibu bavua mu difesto dia Pasaka mu Yeruzaleme ngondo mikese kumpala ne bavua bamone bimanyinu bia dikema bivuaye muenze.

Bidi bimueneka ne: mu Kana ke mudi Yezu utuadijila mudimu wende munene wa mu Ngalileya. Udi mua kuvuluka bua se: mu tshine tshimenga etshi matuku mashale, pavuaye ufumina mu Yudeya, wakandamuna mâyi pa kuavuija mvinyo mu difesto dia dibaka. Musangu’eu, muana wa munene muena mudimu wa mu lubanza lua Mukalenge Herodese Antipase udi usama bikole. Padiye upeta lumu ne: Yezu mmuvue mu Kana ufumina ku Ngalileya, munene eu udi wenza luendu lule kubangila kuende mu Kapernaume bua kumonangana ne Yezu. Ne dibungama mu mutshima, udi usengelela Yezu ne: ‘Biwasua, vuaku lukasa, bangabanga ne muananyi kufuaye.’

Yezu udi umuandamuna ne: ‘Alukila kuebe. Muanebe wa balume umvu bimpe!’ Muena mudimu wa Herodese udi witaba ne utuadija kuenza luendu lule mutangile kuende. Mu njila, udi usambakena ne bena mudimu bende, bavua bambuluje bua kumumanyisha se: bionso bidi bipita bimpe—muanende wa balume wasanguluki! ‘Ndîba kayi didiye mumvue bimpe?’ ke mudiye webeja.

‘Makelela pa dîba musendamu mu mapingaja,’ ke mudibu bandamuna.

Muena mudimu udi uvuluka ne: ndîba menemene dimuambidile Yezu ne: ‘Muanebe wa balume umvu bimpe!’ Panyima pa muanda eu, muntu eu ne bena nzubu wende buonso badi balua bayidi ba Kristo.

Nunku, Kana mmuvue tshimenga tshitutshisha dikasa dimpe bualu, pa kumanyisha difumina diende ku Yudeya, Yezu mmuenzemu bishima misangu ibidi. Bushuwa, ki mmuenze anu bishima ebi katshia utuadija mudimu, kadi, bine ebi bidi ne mushinga wa pa buawu bualu bidi bimanyisha dipingana diende mu Ngalileya.

Mpindieu, Yezu udi uya ku Nazarete, kuvuaye mukolele. Ntshinyi tshidi tshimuindileku? Yone 4:43-54; Mâko 1:14, 15; Luka 4:14, 15, NW.

▪ Padi Yezu upingana mu Ngalileya, ntshinyi tshidi bayidi bende benza, ne mmunyi mudi bantu bamuakidila?

▪ Ntshishima kayi tshidi Yezu wenza, ne tshidi ne buenzeji kayi kudi aba baditshi tshitangila?

▪ Mmunyi mudi Yezu ututshisha Kana dikasa dimpe?