Dilongesha dia 15

Diambuluisha bakuabu bua benze disua dia Nzambi

Bua tshinyi kuambila bakuabu malu audi ulonga? (1)

Mbanganyi baudi mua kuabanyangana nabu lumu luimpe? (2)

Mbuenzeji kayi budi ngikadilu webe mua kuikala nende kudi bakuabu? (2)

Ndîba kayi diudi mua kuya mu buambi ne tshisumbu? (3)

1. Mpindieu, ukadi mulonge malu malenga a bungi a mu Bible. Dimanya edi didi ne bua kukufikisha ku didima bumuntu bua muena nkristo. (Efeso 4:22-24) Dimanya edi didi dikengedibua bua wewe kupeta muoyo wa tshiendelele. (Yone 17:3) Kadi, bakuabu pabu badi bakengela kumvua lumu luimpe bua se: bapandishibue pabu. Bena nkristo balelela bonso badi ne bua kufila bumanyishi kudi bakuabu. Ndîyi-dituma dia Nzambi.​—Lomo 10:10; 1 Kolinto 9:16; 1 Timote 4:16.

2. Udi mua kutuadija kuabanyangana malu malenga audi ulonga ne badi nebe pabuipi. Uambile bena dîku diebe anyi dienu, balunda, balongi nebe, ne bena mudimu nebe. Ikala ne bulenga ne lutulu paudi ubambilawu. (2 Timote 2:24, 25) Wavuluka se: bantu batu batangila ngikadilu wa muntu bikole kupita mutubu bateleja bidiye wamba. Nunku ngikadilu webe muimpe udi mua kukoka bakuabu bua kuteleja mukenji uudi ubambila.​—Matayo 5:16; 1 Petelo 3:1, 2, 16.

3. Kunyima, udi mua kukumbana bua kutuadija kupatuka mu buambi ne tshisumbu tshia Bantemu ba Yehowa tshia muaba uudi musombele. Etshi ntshidia tshia mushinga mu dilubuluka diebe. (Matayo 24:14) Ndisankapu kayi dikalaku bu wewe mua kufika ku diambuluisha mukuabu muntu bua kuluaye musadidi wa Yehowa ne kupetaye muoyo wa tshiendelele!​—1 Tesalonike 2:19, 20.