Dilongesha 5

Nzambi udi ne dilongolola kayi bua buloba?

Bua tshinyi Yehowa wakafuka buloba? (1, 2)

Bua tshinyi buloba kabuena mparadizu mpindieu? (3)

Ntshinyi tshienzekela bantu babi? (4)

Mu matuku atshilualua, ntshinyi tshienza Yezu bua babedi? banunu? bafue? (5, 6)

Bua kupeta mabenesha atshilualua, ntshinyi tshiudi ne bua kuenza? (7)

1. Yehowa wakafuka buloba ebu bua se: bantu bikala mua kusombelapu bua kashidi. Uvua musue ne: buloba buikale anu busombela kudi bantu bakane ne basangale. (Musambu wa 115:16; Yeshaya 45:18) Buloba kabuakubutudibua nansha; nebuikaleku bua kashidi.​—Musambu wa 104:5; Muambi 1:4.

2. Kumpala kua Nzambi kuenzaye muntu, Wakasungula katupa kamue ka buloba ne kukenzaye mparadizu mulengele. Wakamubikila ne: budimi bua Edene. Muaba eu ke wakatekaye mulume ne mukaji ba kumpala, Adama ne Eva. Nzambi uvua ujinga se: bapete bana ne buuje buloba bujima. Ku kakese ku kakese bavua ne bua kuenza buloba bujima mparadizu.​—Genese 1:28; 2:8, 15.

3. Adama ne Eva bakenza mpekatu pakatupabu ku mukenji wa Nzambi ku budisuile. Nanku Yehowa wakabapatula mu budimi bua Edene. Mparadizu wakajimijibua. (Genese 3:1-6, 23) Kadi Yehowa ki mmupue muoyo dilongolola diende bua buloba ebu. Udi ulaya bua kukudimuna buloba mparadizu, muasombela bantu bua kashidi. Mmunyi muenzaye bualu ebu?​—Musambu wa 37:29.

4. Kumpala kua buloba ebu kuluabu mparadizu, bantu babi badi ne bua kumbushibua. (Musambu wa 37:38) Ke tshienzeka ku Armagedon, mvita ya Nzambi bua kujikija bubi. Pashishe, Satana needibue mu lukanu bua bidimu 1 000. Ebi bidi biumvuija ne: muntu mubi nansha umue kakushiyibua bua kunyanga buloba. Anu bantu ba Nzambi ke bashala ne muoyo.​—Buakabuluibua 16:14, 16; 20:1-3.

5. Pashishe Yezu Kristo neakokeshe bu  Mukalenge pa buloba ebu bua bidimu 1 000. (Buakabuluibua 20:6) Neumbushe mpekatu mu bieledi bietu bia meji ne mu mibidi yetu ku kakese ku kakese. Netulue bantu bapuangane anu bu muvua Adama ne Eva kumpala kua kuenzabu mpekatu. Dîba adi kakuakuikala kabidi masama, bukulakaje, ne lufu. Babedi nebuondapibue, ne banunu nebalue tshiakabidi bansonga.​—Yobo 33:25; Yeshaya 33:24; Buakabuluibua 21:3, 4.

6. Munkatshi mua Bukokeshi bua Bidimu Tshinunu bua Yezu, bantu bena lulamatu nebakuate mudimu bua kukudimuna buloba bujima mparadizu. (Luka 23:43) Kabidi, miliyo ya bafue nebabiishibue bua bikale ne muoyo pa buloba bu bantu tshiakabidi. (Bienzedi 24:15) Bienzabu tshidi Nzambi ubalomba, nebatungunuke ne kuikala ne muoyo pa buloba kashidi. Tshianana, nebabutudibue bua kashidi.​—Yone 5:28, 29; Buakabuluibua 20:11-15.

7. Nenku dilongolola dia ku ntuadijilu dia Nzambi nedilubuluke. Udiku musue kupeta mabenesha atshilualua aa anyi? Biwikala musue, bidi bikukengela kutungunuka ne kulonga pa bidi bitangila Yehowa ne kutumikila malomba ende. Dibuela mu bisangilu ku Nzubu wa Bukalenge wa Bantemu ba Yehowa wa tshitupa tshiudi musombele nedikuambuluishe bua kuenza nunku.​—Yeshaya 11:9; Ebelu 10:24, 25.

[Tshimfuanyi mu dibeji 10]

Mparadizu mujimija

[Bimfuanyi mu dibeji 11]

Kunyima kua Armagedon, buloba nebukudimunyibue mparadizu