Mmunyi mutubo bumvuija Busatu Bunsanto?

EKLEZIYA Katolike udi wamba ne: “Busatu Bunsanto ndîna diangata bua kuleja nadi dilongesha dia nshindamenu dia bitendelelu bia bena nkristo. . . . Nenku, bilondeshile mêyi a Ditabuja dia Athanase, ‘Tatu udi Nzambi, Muana udi Nzambi, ne Spiritu Munsanto udi Nzambi, kadi kakuena Nzambi isatu to, kadi anu Nzambi umue. Mu Busatu Bunsanto ebu . . . ba Persona buonso mba kashidi ne buonso mbena mulongo umue: buonso buabo, kabena bafukibue, ne buonso mbena-bukole-buonso.”​—The Catholic Encyclopedia.

Pamue ne Ekleziya mikuabo yonso ya bukua-buena-nkristo idi yumvuangana ku dîyi pa muanda eu. Tshilejilu, Ekleziya Ortodokse wa bena Greke udi umona Busatu Bunsanto bu “dilongesha dia nshindamenu dia buena-nkristo,” ufika ne ku diamba ne: “Bena nkristo ng’aba badi bitaba ne: Kristo udi Nzambi.” Mu mukanda wa Our Orthodox Christian Faith, muine ekleziya eu udi wamba ne: “Nzambi udi busatu. . . . Tatu udi Nzambi menemene. Muana udi Nzambi menemene. Spiritu Munsanto udi Nzambi menemene.”

Nenku, Busatu Bunsanto mbabuangate bu “Nzambi umue mu ba Persona basatu.”  Badi bamba ne yonso wa ku buobo kêna ne ntuadijilu, bu mudiye muikaleku kashidi. Nansha umue wa kudibo ki mmutambe bakuabo ku bunene peshi ku bukese: busatu buabu mbena-bukole-buonso.

Ngelelu wa meji wa nunku mmukole bua kulonda anyi? Bena kuitabuja bavule ba muoyo mulenga mbamumone muikale mukondakane, kayi umvuangana ne lungenyi lujalame, kayi mufuanangane nansha ne bualu bumue bua ku malu akamonamonabo. Bantu aba badi bebeja ne: mmushindu kayi udi Tatu mua kuikala Nzambi, Muana muikale Nzambi ne spiritu munsantu kabidi muikale Nzambi, eku pabi kakuyi Nzambi isatu kadi anu Nzambi umuepele?

“Dipite pa ngumvuilu wa bantu”

DIKONDAKANA edi ndimuangalake bikole. Tshibungu tshia The Encyclopedia Americana tshidi tshiamba ne: dilongesha dia Busatu Bunsanto ndiangatshibue bu “dipite pa ngumvuilu wa bantu.”

Bavule badi baditabuja Busatu Bunsanto mbabumone bia muomumue. Bua Monsenyere Eugène Clark, “Nzambi udi umue, ne kabidi Nzambi udi busatu. Bu mudiku kakuyi tshintu tshia mushindu’eu mu biakafukibua, katuena mua kumvua [dilongesha edi to]; tudi’anu ne bua kuditaba.” Kardinale John O’Connor udi wamba ne: “Tudi bamanye se: abu mbualu busokome bukole butambe, budi butupite katuyi mua kubumvua nansha kakese.” Pape Jean Paul II udi pende wakula pa “bualu busokome kabuyi kukononona bua Nzambi Busatu Bunsanto.”

Nenku, nkonga-miaku wa A Dictionary of Religious Knowledge udi wamba pa muanda eu ne: “Bitabuji ba Busatu Bunsanto kabena bumvuangana ku dîyi munkatshi muabo pa tshidi dilongesha edi menemene anyi pa mushindu musunguluke udibo mua kudiumvuija.”

Pa nanku, katuena mua kukema pa kubala mu New Catholic Encyclopedia ne: “Kudi kusanganyibua anu balongeshi bakese ba teoloji wa Busatu Bunsanto mu seminere ya bena Katolike badibo kabayi banji kupampakaja dituku kampanda kudi lukonko elu lua ne: ‘Kadi, mmushindu kayi udibo balongesha Busatu Bunsanto?’ Bikala lukonko elu luleja dipanga dijingulula didi mu ngenyi ya balongi, kadiena mua kubenga kuleja kabidi dipanga dijingulula dia muomumue kudi baprofesere babo.”

Bua kujadika mmuenenu eu, mbikumbane anu bua kuya mu biblioteke kampanda ne kubala mikanda idi ilongesha Busatu Bunsanto. Mmabeji bungipu kayi adibo kabayi bafunde bua kukeba mua kumvuija dilongesha edi! Kadi, nansha bikalaye mua kufika ku diumvua miaku mikodiakane ya teoloji ne mumvuija makodiakane adiye upetangana nawo, mubadi kêna upeta diumvuija didi disankisha to.

Pa muanda eu, Jezuite Joseph Bracken udi uleja mu mukanda wende wa What Are They Saying About the Trinity? ne: “Bansaserdose bavua benze madikolela mavule bua kumanya . . . Busatu Bunsanto munkatshi mua bidimu bitshivuabo mu seminere badi belakana, nansha mu dia lumingu dia Busatu Bunsanto, bua kubulongesha bena kuitabuja babo ku tshialtare. . . . Bua tshinyi kutondesha bantu ne tshiena-bualu tshidibo, nansha bia munyi, mua kumvua anu kakese?” Udi usakidila kabidi pashishe ne: “Busatu Bunsanto ndimue dia ku malongesha a nshindamenu, kadi kabuena ne [buenzeji] anyi budi mua kuikalaku anu bukese mu nsombelu wa buatshia-buila ne mu ntendelelu wa muena nkristo.” Eku padi, dikale “dilongesha dia nshindamenu” dia ekleziya!

Mu mukanda wa Christianity and the World Religions, Hans Küng, mulongeshi wa teoloji muena Katolike mmumone ne: kamue ka ku tubingila tudi ekleziya mipangile bua kukudimuna mitshima ya bisamba bidi kabiyi bia bena nkristo, mbua dilongesha dia Busatu Bunsanto. Udi wamba ne: “Nansha Ba-mizilma badi bamanye bualu ebu biakane kabena mua kulonda, anu bu mudi bena Yuda pabo bikale bapange kukuata, dilongesha dia Busatu Bunsanto. . . . Mashilangana menza kudi dilongesha dia Busatu Bunsanto pankatshi pa Nzambi umue ne bantu basatu mu Nzambi umue kaena mua kusankisha Ba-mizilma, badi bakondakajibue pamutu pa kupeta butoke, ku miaku ya teoloji mifumine ku miakulu ya tshiena-Syrie, tshiena-Greke, ne Latin. Ba-mizilma mbamone bionso ebi bu dizaba ne miaku. . . . Bua tshinyi kukeba mua kusakidila tshintu ku bumue ne ku bumuepele bia Nzambi, bifuane bia biavua kutekesha anyi kubenga bumue ne bumuepele?”

“Kêna Nzambi wa malu mabuelakane”

DILONGESHA edi didi dibuelakane ndifumine penyi? Tshibungu tshia The Catholic Encyclopedia tshidi tshijadika ne: “Dilongesha dia malu masokome a mushindu’eu ndileje se: ndifumine ku disokolola kampanda dia kudi Nzambi.” Kabidi, bumvuiji babidi bena Katolike, Karl Rahner ne Herbert Vorgrimler mbafunde mu nkonga-miaku wabo wa Theological Dictionary ne: “Busatu Bunsanto mbualu busokome . . . mu ngumvuilu mukepesha . . . , budi kabuyi kumanya bikalaku kakuyi disokolola, ne nansha kunyima kua dine disokolola edi, kabuena mua kujinguludibua buonso nansha.”

 Kadi kuamba ne: bu mudi Busatu Bunsanto buikale bualu busokome bubuelakane, budi ne bua kuikala bufumine ku disokolola dia kudi Nzambi, kudi kujula muanda mukuabo munene. Bua tshinyi? Bualu disokolola dia kudi Nzambi dine kadiena dileja Nzambi mu mmuenekelu wa mushindu’eu to: “Nzambi kena Nzambi wa malu mabuelakane.”​—1 Kolinto 14:33.

Pa nanku, mmunyi mudi Nzambi mua kuikala mfuki wa dilongesha dibuelakane pa bidi bimutangila mu mushindu udi nansha bashikuluji ba muakulu wa tshiena-Ebelu, wa tshiena-Greke ne wa Latin kabayi mua kudiumvuija menemene?

Ku lukuabo luseke, bua ‘kumanya Nzambi umuepele mulelela ne Yezu Kristo, eu udiye mutume,’ bidi bikengela kuikala anu muena teoloji anyi? (Yone 17:3, Jé) Bu biobi nanku, mmunyi muvu’anu bakese ba ku bamfumu ba bitendelelu ba bena Yuda, bavua batambe kumanya mukanda bitabe Yezu bu Masiya? Eku balongi bende ba lulamatu bavua buobo ba-bidime, balobi, balambuishi ba bitadi bakaji ba nzubu. Bu muvua bantu aba ba nsombelu mushadile ne dishindika dikole dia bivua Yezu mubalongeshe pa bidi bitangila Nzambi, bavua pabo balongesha bantu bakuabo, ne badikumbaje nansha bua kufua bua mitabuja abo.​—Matayo 15:1-9; 21:23-32, 43; 23:13-36; Yone 7:45-49; Bienzedi 4:13.

[Tshimfuanyi mu dibeji 4]

Balongi ba Yezu bavua bantu ba nsombelu mushadile, kadi ki mbamfumu ba bitendelelu