Tutendelelayi Nzambi bu mudiye musue

YEZU wakasambila Nzambi mu mêyi aa: “Eu udi muoyo wa kashidi: balonge mua kukumanya wewe, Nzambi umuepele mulelela ne eu uwudi mutume, Yezu Kristo.” (Yone 17:3, NW) Ndimanya kayi? “Disua [dia Nzambi] ndia se: bantu ba mishindu yonso basungidibue, ne bafike ku dimanya dijalame dia bulelela.” (1 Timote 2:4, NW) Nkudimuinu wa Parole vivante udi ukudimuna ndekelu wa mvese eu ne: “ne bafike ku dimanya dipuangane dia bulelela [bua Nzambi].”

Nenku, Nzambi mmusue bua tumumanye yeye ne malongolola ende, mu mushindu mujalame mu diumvuangana ne bulelela bua Nzambi. Ne Dîyi dia Nzambi, Bible Munsantu, ke mpokolo wa bulelela ebu. (Yone 17:17; 2 Timote 3:16, 17) Padi bantu balonga mu mushindu mujalame tshidi Bible wamba bua Nzambi, apu kabakufuanangana ne aba badi Lomo 10:2, 3 [NW] wamba ne: bavua ne “mitalu bua Nzambi, kadi, ki mbilondeshile dimanya dijalame nansha.” Peshi bu bena Samariya, bavua Yezu muambile ne: “Nuenu nudi nutendelela tshinudi kanuyi bamanye.”​—Yone 4:22.

Nanku, bituikala tukeba dianyishibua kudi Nzambi, tudi mua kudiebeja nunku: Ntshinyi tshidi Nzambi wamba pa bidi bimutangila? Mmunyi mudiye musue bua kumutendelelabo? Malongolola ende adi tshinyi, ne mmunyi mutudi mua kuakajilapu nsombelu wetu? Dimanya dijalame dia bulelela didi ditupetesha mandamuna makane ku nkonko bu eyi. Pashishe, netufike ku ditendelela Nzambi bu mudiye musue.

Difuisha Nzambi bundu

NZAMBI udi wamba ne: “Aba badi bannemeka, nembanemeke.” (1 Samuele 2:30, NW) Nkunemeka Nzambi pa kubikila muntu kampanda ne: muena mulongo nende anyi? Nkumunemeka pa kubikila Mariya ne: “mamu wa Nzambi” ne “Mutuangaji-mukaji . . . pankatshi pa Mufuki ne bifukibua Biende” bu mudibi mu New Catholic Encyclopedia anyi? Tòo, bualu mêyi aa adi apenda Nzambi. Muntu nansha umue kêna muena mulongo nende; ne kavua ne mamu wa ku mubidi, bualu Yezu kavua Nzambi to. Kabidi, kakuena “Mutuangaji-mukaji” to, bualu Nzambi mmusungule amu “mutuangaji umuepele pankatshi pa Nzambi ne bantu,” Yezu.​—1 Timote 2:5, NW; 1 Yone 2:1, 2.

Kakuyi mpata, dilongesha dia Busatu Bunsanto ndikondakaje ne nditekeshe ngumvuilu wa bantu pa bidi bitangila muaba mulelela wa Nzambi. Didi dipumbisha bantu bua kabapetshi dimanya dijalame dia Mfumu wa biakafukibua bionso, Yehowa Nzambi, ne bua kumutendelela bu mudiye musue. Anu bu muakamba muena teoloji Hans Küng ne: “Bua tshinyi kujinga kuvudija malu makuabo ku buobumue ne ku bunkàyà bia Nzambi, malu adi mua kutekesha peshi kuvila buobumue ne bunkàyà abu?” Kadi, ke tshidi ditabuja dia Busatu Bunsanto diênze.

Aba badi bitabuja Busatu Bunsanto “kabena banyisha bua kulama Nzambi mu dimanya dijalame nansha.” (Lomo 1:28, NW) Mvese eu udi wamba kabidi ne: “Nzambi e kubafila ku bingenyingenyi kabiyi bianyisha bua kuenza malu adi “kaayi makane.” Mvese wa 29 too ne wa 31 idi ileja amue a ku malu aa adi “kaayi makane” bu mudi: ‘dishipangana, matandu, dipanga lulamatu ku bipungidi, kupangika kua dinanga dia ku tshileledi, dipangika dia luse.’ Malu aa adi amueneka mu bitendelelu bidi bianyisha Busatu Bunsanto.

Tshilejilu, pa tshibidilu, bena Busatu Bunsanto batu bakengesha ne nansha bashipa aba batu babenga kuitabuja dilongesha dia Busatu Bunsanto. Kabidi, mbafike too ne kule. Bakashipa binabo bena Busatu Bunsanto mu tshikondo tshia mvita. Ntshinyi tshivua bushuwa “katshiyi tshiakane” pa kumona bena Katolike bashipa bena Katolike, bena Ortodokse bashipa bena Ortodokse, bena Mishonyi bashipa bena Mishonyi​—bionso ebi mu dîna dia Nzambi wa Busatu Bunsanto?

Pabi, Yezu wakamba patoke ne: “Buonso nebamanye munudi balongi banyi, binuikala ne dinanga munkatshi muenu.” (Yone 13:35, NW) Dîyi dia Nzambi didi diamba kabidi ne: “Bana ba Nzambi ne bana ba Diabolo badi bamuenekela ku muanda eu: muntu yonso udi kayi wenza midimu ya buakane, kêna mufume kudi Nzambi, nansha eu udi kayi unanga muanabo.” Bible udi ufuanyikija aba badi bashipa bana babo bena kuitabuja bu “Kayina, uvua mufumine kudi mubi [Satana], ne wakashipa muanabo.”​—1 Yone 3:10-12, NW.

Nenku, ndongeshilu wa malongesha mabuelakane adi atangila Nzambi mmufikishe ku bienzedi bidi bishipa mikenji yende. Eyowa, bualu budi buenzeke munkatshi mua bukua-buena-nkristo mu kabujima mbudi muena teoloji muena Danemark Søren Kierkegaard musulakaje ne: “Bukua-buena-nkristo mbushipe buena-nkristo bulelela kupanga kumanya.”

 Nsombelu wa mu nyuma wa bukua-buena-nkristo mmufuanangane ne tshiakamba mupostolo Paulo: “Badi bamba patoke mudibo bamanye Nzambi, kadi, badi bamuvila ku bienzedi biabo, bualu mbantu babi ne bena bupidia ne ki mbanyishibue ku mudimu kayi wonso muimpe.”​—Tito 1:16, NW.

Mu katupa kîpi emu, pabutula Nzambi bulongolodi bubi bua malu ebu, bukua-buena-nkristo buena Busatu Bunsanto nebusumbudibue. Ne nebulumbuluishibue ne kupishibua tshibawu bua bienzedi biabu ne ku malongesha bidi kabiyi binemeka Nzambi.​—Matayo 24:14, 34; 25:31-34, 41, 46; Buakabuluibua 17:1-6, 16; 18:1-8, 20, 24; 19:17-21.

Tubengayi Busatu Bunsanto

KAKUENA mushindu wa kulekela amue malelela a Nzambi to. Nanku, bua kutendelela Nzambi bu mudiye musue, mbimpe kubenga dilongesha dia Busatu Bunsanto. Ndibengangane ne tshivua baprofete, Yezu, bapostolo ne bena nkristo ba kumpala bitabuja ne balongesha. Ndibengangane ne tshidi Nzambi wamba buende yeye muine mu Dîyi diende difundisha ku spiritu wende. Nunku udi utubela ne: “Numanye ne: Meme nkayanyi ndi Nzambi ne kakuena mukuabo bu meme.”​—Yeshaya 46:9, TEV.

Kabiena ne diambuluisha to bua kuleja Nzambi mu mushindu mubuelakane ne kawuyi kujingulula. Pamutu pa nanku, padi bantu benda babuelakana pa bidi bitangila Nzambi ne malongolola ende, bidi bisankisha muluishi wa Nzambi, Satana Diabolo, ‘nzambi wa ndongoluelu eu wa malu.’ Yeye ke mpokolo wa malongesha a dishima adi ‘afofamija tshieledi tshia lungenyi tshia babule ditaba.’ (2 Kolinto 4:4, NW) Ne kabidi dilongesha dia Busatu Bunsanto didi diambuluisha bamfumu ba bitendelelu, badi basue kuikala ne bukokeshi ku mutu kua bantu, bualu badi basua kuleja ne: amu bena teoloji ke badi mua kujingulula dilongesha edi.​—Tangila Yone 8:44.

Dimanya dijalame dia Nzambi didi ne dikuatshisha dia bungi. Didi ditupikula ku malongesha adi mabengangane ne Dîyi dia Nzambi, ne ku bukua-bitendelelu bitontolodi. Anu bu muakamba Yezu: “Nenumanye bulelela, ne bulelela nebunupeteshe budikadidi.”​—Yone 8:32, NW.

Bituanemeka Nzambi bu Mfumu mutambe bunene, ne bituamutendelela bu mudiye musue, netudiepule ku dilumbuluisha dienzelaye mu katupa kîpi bukua-buena-nkristo butontolodi. Kadi, tudi mua kutekemena dianyishibua kudi Nzambi pajimina bulongolodi ebu bua malu: “Bulongolodi ebu nebujimine ne milowo yabu kabidi, kadi, eu udi wenza disua dia Nzambi, neashale bua kashidi.”​—1 Yone 2:17, NW.

[Tshimfuanyi mu dibeji 31]

Lupingu elu lua bidimu nkama bipite ku France ludi luleja diasa “virgo” Mariya kafulu ka butumbi kudi Busatu Bunsanto. Ditabuja dia Busatu Bunsanto ndifikishe ku dikukuila dia Mariya, bu “Mamuende wa Nzambi”