1, 2. a) Ntshinyi tshivua bamfumu ba bitendelelu benze bua mudimu wa kuyisha? Kadi bapostolo bakenza tshinyi? b) Bua tshinyi bapostolo kabavua batumikile pavuabu babakandike bua kuyisha?

 TUDI matuku makese panyima pa Pentekoste wa mu 33. Tshisumbu tshia bena Kristo tshia mu Yelushalema tshitshidi amu ne mbingu mikese patupu. Bidi bimueneka patoke ne: Satana udi umona tshikondo etshi bu tshidi tshikumbane bua kuluisha tshisumbu tshia bena Kristo. Udi ujinga kutshibutula kumpala kua tshiotshi kukola. Satana udi usaka diakamue bamfumu ba bitendelelu bua kukandika mudimu wa diyisha Bukalenge. Kadi bapostolo badi batungunuka ne kuyisha ne dikima, ne bantu balume ne bantu bakaji ba bungi badi “bitabuja Mukalenge.”—Bien. 4:18, 33; 5:14.

² Bidi bipesha baluishi aba tshiji ne badi bela bapostolo bonso mu buloko. Kadi butuku, muanjelu wa Yehowa udi ukangula biibi bia buloko ne patshiatshia bapostolo badi batuadija kabidi kuyisha. Badi babakuata kabidi, baya nabu kudi bamfumu badi bababanda mudibu bashipe mukenji uvua ubakandika bua kuyisha. Bapostolo badi bandamuna ne dikima ne: “Tudi ne bua kutumikila Nzambi bu mfumu pamutu pa kutumikila bantu.” Bamfumu badi bafiika munda bikole ne badi bajinga ‘kushipa’ bapostolo. Kadi mu tshikondo tshikole atshi, Gamaliele mulongeshi wa Mikenji uvua bantu banemeka bikole wakajuka ne kudimuija bamfumu wamba ne: ‘Nudimuke, kanubuelakanyi mu malu a bantu aba to, balekelayi.’ Bualu bua dikema, bamfumu badi bateleja mubelu wende ne balekela bapostolo. Bantu bavua ne ditabuja aba bakenza tshinyi? Bakatungunuka kabayi batshina “ne kulongesha ne kuamba lumu luimpe lua Kristo Yezu kabayi balekela nansha.”—Bien. 5:17-21, 27-42; Nsu. 21:1, 30.

3, 4. a) Mbuteyi kayi budi Satana mukuate nabu mudimu bua kuluisha bantu ba Nzambi? b) Netukonkonone tshinyi mu nshapita eu ne mu ibidi idi ilonda?

³ Tshivua musangu wa kumpala uvua bamfumu baluishe tshisumbu tshia bena Kristo, kadi kawuvua wa ndekelu to. (Bien. 4:5-8; 16:20; 17:6, 7) Lelu, Satana utshidi usonsola baluishi ba ntendelelu mulelela bua kusaka bamfumu bua kukandika mudimu wetu wa diyisha. Baluishi mbatushiminyine malu a mishindu yonso. Bamue badi bamba ne: tudi bakebeshi ba bimvundu mu bantu. Bakuabu bamba ne: tudi tusaka bantu ku ditombokela mbulamatadi, eku banga bamba ne: tudi bendi ba mushinga. Bana betu mbaye ku tubadi mu bikondo bikumbane bua kuleja mudi malu adibu batubanda nawu aa mikale a dishima. Mbipeta kayi bidi bipatuke? Mapangadika aa adi tubadi  tuangate kukadi bidimu makumi a bungi adi akutangila mushindu kayi lelu? Tukonkononayi bimue bia ku bilumbu ebi bua kumona mudibi biambuluishe “mu diakuila dia lumu luimpe ne mu dilujadika kumpala kua bakokeshi.”—Filip. 1:7.

⁴ Mu nshapita eu, netumone mutudi bakuile bukenji buetu bua kuikala ne budikadidi bua kuyisha. Mu nshapita ibidi idi ilonda, netumone imue mishindu itudi badienzeje bua kutshimuna bilumbu ku tubadi bua tutungunuke ne kubenga kuikala ba pa buloba ne kuenza malu bilondeshile mikenji ya Bukalenge.

5. Bua tshinyi bavua bakuate bamanyishi ba Bukalenge ku ndekelu kua bidimu bia 1930? Bana betu bavua batangila midimu bakalongolola bua kuenza tshinyi?

⁵ Ku ndekelu kua bidimu bia 1930, bimue bimenga ne provense bia mu États-Unis biakajinga bua kuenzeja Bantemu ba Yehowa bua kulomba mukanda uvua ubanyishila bua kuenzabu mudimu wabu wa kuyisha. Kadi bana betu kabakalomba mukanda eu to, bualu mbulamatadi uvua mua kulua kushipa dienza nawu mudimu, ne bavua bela meji ne: mfumu nansha umue kavua ne bukenji bua kubenga mukenji uvua Yezu muelele bena Kristo bua kuyisha mukenji wa Bukalenge to. (Mâko 13:10) Nunku, bakakuata bamanyishi ba Bukalenge nkama ya bungi. Bana betu bavua balombola bulongolodi buetu bakela meji bua kuya ku tubadi. Bavua bajinga kuleja ne: bualu buvua kabuyi bua mu mikenji ebu buvua bupangisha Bantemu bukenji buabu bua kuenza malu a ntendelelu badilekelele. Mu 1938, bualu kampanda buakenzeka buakafikisha kabadi ku diangata dipangadika dinene. Tshivua tshienzeke ntshinyi?

6, 7. Ntshinyi tshivua tshifikile dîku dia muanetu Cantwell?

⁶ Mu Dibidi dia 26 ngondo 4 mu 1938 mu dinda, muanetu Newton Cantwell uvua ne bidimu 60 ne mukajende Esther ne bana bende ba balume basatu: Henry, Russell ne Jesse, bonso batanu bampanda-njila ba pa buabu, bakadilongolola bua kuya kuyisha mu tshimenga tshia New Haven mu Connecticut. Bavua mu bulelela bamanye ne: kabavua mua kupingana anu dituku dimue adi to. Bua tshinyi? Bualu bakavua babakuate misangu ya bungi, nunku bavua bamanye ne: bavua mua kubakuata kabidi. Nansha nanku, dijinga diabu dia kuyisha mukenji wa Bukalenge kadiakakepa to. Bakaya mu New Haven ne mashinyi abidi. Newton uvua wendesha mashinyi a dîku avua ne mikanda ya malu a mu Bible ne tshisanji tshia fono, pavua eku Henry uvua ne bidimu 22 wendesha mashinyi a bikolokolo. Anu muvuabu bamanye, bampulushi bakabakuata panyima pa mêba makese.

⁷ Bakanji kukuata Russell uvua ne bidimu 18 ne pashishe kukuatabu Newton ne Esther. Jesse uvua ne bidimu 16 wakamuenena pa bule muvua bampulushi baya ne baledi bende ne tutuende. Henry uvua uyisha mu tshitupa tshikuabu tshia mu tshimenga, nunku Jesse wakashala nkayende. Nansha nanku, wakangata tshisanji tshiende tshia fono ne kutungunukaye ne kuyisha. Bena Katolike babidi bantu balume bakitaba bua kuteleja muyuki wa muanetu Rutherford uvua ne tshiena-bualu ne:  “Baluishi” uvua Jesse mubelele. Pavuabu benda bateleja, bakafiika munda ne kujingabu bua kumukuma. Jesse wakumbuka muaba uvuabu mu tshimuma, kadi katupa kakese pashishe, mpulushi kampanda wakamuimanyika. Yeye pende bakaya nende mu buloko. Bampulushi bakamba ne: muanetu Esther kavua ne bualu to, kadi anu Cantwell ne bana bende. Nansha nanku bakabalekela dituku dimue adi pakafutabu makuta.

8. Bua tshinyi kabadi kavua kambe ne: Jesse Cantwell uvua mukebeshi wa bimvundu mu bantu?

⁸ Ngondo mikese pashishe, mu ngondo wa 9 wa 1938, dîku dia muanetu Cantwell diakaya kuitaba ku kabadi ka mu New Haven. Bavua bapishe Newton, Russell ne Jesse bamba muvuabu balomba bantu mapa kabayi ne dianyisha. Nansha muvua bana betu aba balombe Kabadi kanene ka mu Connectinut bua kutangila tshilumbu etshi, bakapisha Jesse bamba muvuaye mukebeshe bimvundu mu bantu. Bua tshinyi? Bualu bena Katolike babidi bavua bateleje muyuki mukuata pa ditadi abu bakajadika ku kabadi ne: mu muyuki au bavua bapenda tshitendelelu tshiabu ne bavua bababunda. Bua kuteta kufikisha kabadi ku dishintulula dipangadika divuaku kangate, bana betu bavua balombola bulongolodi bakalomba Kabadi kanene ka mu États-Unis bua kutangila bualu abu.

9, 10. a) Kabadi kakulu ka mu États-Unis kakakosa tshilumbu tshia dîku dia Cantwell mushindu kayi? b) Mmunyi mutshidi dipangadika adi dituambuluisha lelu?

⁹ Kutuadijila mu dia 29 ngondo 3 wa 1940, Charles Hughes mulumbuluishi munene ne bena diende bakuabu 8 bakateleja malu avua muanetu Hayden Covington uvua ndumbulula wa  Bantemu ba Yehowa wamba. a Pavua ndumbulula muleji mpala wa provense wa Connecticut uleja malu bua kujadika ne: Bantemu bavua bakebeshi ba bimvundu mu bantu, ndumbulula umue wakamuebeja ne: “Mukenji uvua Kristo Yezu umanyisha kawuvuaku utonda bantu ba mu matuku ende anyi?” Ndumbulula au wakandamuna ne: “Ke muvuabi, ne meme muvuluke bimpe Bible wanyi, udi kabidi uleja tshivua tshifikile Yezu bua muvuaye mumanyishe mukenji au.” Uvua bushuwa muambe bualu bujima. Kayi mumanye, uvua mufuanyikije Bantemu ne Yezu, ne mufuanyikije bena mu tshimenga ne bantu bavua bashipe Yezu. Mu dia 20 ngondo 5 wa 1940, bena ku Kabadi kanene bonso bakasuika dîyi ne kabadi aka kakakosa tshilumbu kabingisha Bantemu.

¹⁰ Dipangadika edi divua diambuluishe mushindu kayi? Diakambuluisha bua kukolesha bukenji bua kutendelela badilekelele. Nunku ditunga, tshimenga peshi mbulamatadi wa muaba nansha umue kavua mua kuela mukenji ukandika budikadidi bua malu a ntendelelu to. Kabidi, Kabadi kanene kavua kasangane ne: mu tshivua Jesse muenze kamuvua “bualu buvua buleja ne: uvua munyange ditalala mu bantu ne mukebeshe tshimvundu to.” Nunku, mushindu uvuabu bakose tshilumbu eu wakaleja patoke ne: Bantemu ba Yehowa ki mbakebeshi ba bimvundu mu bantu to. Tshivua ditshimuna dia dikema bua bantu ba Nzambi. Mmunyi mutshidi ditshimuna edi dituambuluisha? Ndumbulula kampanda udi Ntemu udi wamba ne: “Bukenji butudi nabu bua kutendelela katuyi tutshina mukenji kampanda udi kawuyi muakane budi butuambuluisha tuetu Bantemu lelu bua kumanyisha bantu ba miaba itudi mukenji wa ditekemena.”

11. Bana betu ba mu Canada bakenza kampanye kayi? Bua tshinyi?

¹¹ Mu bidimu bia 1940, Bantemu ba Yehowa ba mu Canada bakapeta buluishi bukole. Nunku mu 1946, bua kuleja patoke muvua mbulamatadi mudiatakaje bukenji bua budikadidi bua ntendelelu, bana betu bakenza kampanye mu matuku 16 muvuabu babanye trakte uvua ne tshiena-bualu tshia ne: La haine ardente du Québec pour Dieu, pour Christ et pour la liberté, est un sujet de honte pour tout le Canada (Angl.). Trakte wa mabeji anayi eu wakakula mu buondoke bua bimvundu bivua bamfumu ba bitendelelu bajula muinshi muinshi, bua muvua bampulushi benza malu ne tshikisu ne bua muvua bantu bakengesha ne tshikisu bana betu ba mu provense wa Québec. Trakte wakaleja kabidi ne: “Badi batungunuka ne kukuata Bantemu ba Yehowa kabayi bashipe mukenji kampanda. Mbabande Bantemu ba Yehowa ne malu mapite pa 800 mu Grand Montréal.”

12. a) Baluishi bakenza tshinyi bua kampanye ka diabanya trakte? b) Bavua bashiminyine bana betu bualu kayi? (Tangila kabidi note.)

¹² Maurice Duplessis, kavula mbedi wa mu Québec uvua wenza mudimu ne Villeneuve kardinale wa bena Katolike wakalaya bua kuela Bantemu “mvita ya katshi ku dînu” bua malu avua mu trakte eu. Malu avuabu bababanda nawu akavula ne lukasa, kumbuka ku 800 kufika ku 1600. Muanetu wa bakaji kampanda mpanda-njila wakamba ne: “Bampulushi bakatukuata misangu  ya bungi ne katutshivua tuyibala to.” Bavua bashiminyina Bantemu bavuabu bakuata babanya trakte ne: bavua bapatula “malu avua asaka bantu ku ditombokela mbulamatadi.” b

13. Mbanganyi bavuabu balumbuluishe ba kumpala bua disaka bantu ku buntomboji? Mulumbuluishi wakakosa tshilumbu mushindu kayi?

¹³ Mu 1947, muanetu Aimé Boucher ne bana bende ba bakaji: Gisèle uvua ne bidimu 18 ne Lucille uvua ne bidimu 11 bavua bantu ba kumpala bavuabu balumbuluishe ku kabadi bua disaka bantu ku buntomboji. Bavua babanye trakte wa Haine ardente du Québec pabuipi ne budimi buabu mu mikuna ya ku Sud kua tshimenga tshia Québec. Kadi bivua bikole bua kuleja muvuabu bakebeshi ba bimvundu bavua babenga kutumikila mukenji. Muanetu Boucher uvua muntu uvua ne budipuekeshi ne wa malu mimpe uvua wenza midimu yende ya budimi mu ditalala ne uvua uya imue misangu mu tshimenga mubande mu ditempu divuabu bapusa kudi kabalu. Kadi, bakenzela bena mu dîku diende malu a tshinyangu avuabu bakuile mu trakte. Mulumbuluishi wa ku kabadi aka uvua mukine Bantemu wakabenga bua kuitaba bijadiki bivua bileja muvua bena mu dîku dia muanetu Boucher kabayi ne bualu. Kadi, wakitaba malu avuabu babashiminyine a ne: trakte uvua usaka bantu ku tshikisu, nunku bakapisha bana betu aba. Mulumbuluishi eu uvua muimanyine pa lungenyi lua ne: kumanyisha bulelela nkushipa mukenji. Bakapisha Aimé ne Gisèle bamba muvuabu basake bantu ku buntomboji, nansha Lucille utshivua muana wakenza matuku abidi mu buloko. Bana betu bakalomba kabadi kanene ka mu Canada bua kutangila tshilumbu etshi, ne kabadi aka kakitaba.

14. Bana betu ba mu Québec bakenza tshinyi tshikondo tshivuabu mu dikandika?

¹⁴ Mu tshikondo atshi, bana betu ba mu Québec balume ne bakaji ba dikima bavua batungunuka ne kuyisha mukenji wa Bukalenge nansha muvuabu anu babakengesha ne tshikisu tshikole, ne lumu luimpe luvua lupatule bipeta bimpe. Bidimu binayi panyima pa dituadija kuambanya trakte mu 1946, Bantemu ba mu Québec bakavula kumbuka ku 300 kufikabu ku 1000. c

15, 16. a) Kabadi kakulu ka mu Canada kakakosa tshilumbu tshia dîku dia muanetu Boucher mushindu kayi? b) Ditshimuna edi diakambuluisha bana betu ne bantu bakuabu mushindu kayi?

¹⁵ Mu ngondo 6 wa 1950, Kabadi kakulu ka mu Canada kenza ne bandumbulula 9 kakakonkonona tshilumbu tshia Aimé Boucher. Ngondo isambombo pashishe, mu dia 18 ngondo wa 12 wa 1950, kabadi aka kakakosa tshilumbu ne kubabingishaku. Bua tshinyi? Muanetu Glen How uvua ndumbulula wa Bantemu wakaleja ne: kabadi kavua kitabe malu avuabu baleje bua kudibingisha a ne: “kusaka bantu ku buntomboji” kutu kuleja kubasaka ku tshikisu peshi ku ditombokela mbulamatadi. Kadi trakte “kavua usaka bantu ku dienza nanku nansha kakese, kadi uvua umue mushindu wa budikadidi bua kuakula uvua mikenji yanyisha.” Muanetu How wakasakidila ne: “Ngakadimuenena muvua Yehowa mutuambuluishe bua kutshimuna.” d

¹⁶ Dipangadika dia Kabadi kakulu divua bushuwa ditshimuna dinene dia kudi Bukalenge bua Nzambi. Dipangadika edi diakambuluisha bua kulondesha kabidi bilumbu 122 bia Bantemu ba mu Québec bavuabu babande ne: bavua basaka bantu ku buntomboji. Kusakidila apu, divua kabidi dipeteshe bena mu Canada ne bena mu matunga avua mapunge dîyi ne Grande-Bretagne budikadidi bua kuleja lungenyi luabu bua mushindu  uvuabu babalombola. Dipangadika edi divua kabidi dimanyike mushindu uvua bitendelelu bia mu Québec ne mbulamatadi biluisha manême a Bantemu ba Yehowa. e

17. Mmushindu kayi udi imue mbulamatadi mitete bua kulombola mudimu wetu wa kuyisha?

¹⁷ Anu bu bena Kristo ba kumpala, batendeledi ba Yehowa lelu ‘kabena benda mushinga ne dîyi dia Nzambi’ to. (Bala 2 Kolinto 2:17.) Kadi, imue mbulamatadi idi iteta bua kulombola mudimu wetu ku diambuluisha dia mikenji ya malu a bungenda. Tukonkononayi bilumbu bibidi bia ku bilumbu bivuabu baye nabi ku tubadi bua kumanya bikala Bantemu ba Yehowa bangenda mushinga peshi bamanyishi ba Bukalenge.

18, 19. Ntshinyi tshivua bamfumu ba mu Danemark benze bua kuimanyika mudimu wetu wa kuyisha?

¹⁸ Danemark. Mu dia 1 ngondo wa 10 wa 1932, bakela mukenji uvua ukandika bua kupana mikanda kakuyi mukanda wa dianyisha dia kuenda mushinga. Kadi bena Kristo netu kabakalomba mukanda wa dianyisha eu to. Dituku diakalonda bana betu batanu bakayisha dituku dijima mu Roskilde, tshimenga tshidi mu kilometre mipite pa 30 ku Ouest kua Copenhague udi tshimenga tshikulu tshia ditunga. Dilolo, August Lehmann umue wa ku bamanyishi aba kena umueneka to. Bavua bamukuate bua muvuaye mupane bintu kayi ne mukanda wa dianyisha.

¹⁹ Pavuabu babikile August Lehmann ku kabadi mu dia 19 ngondo wa 12 mu 1932, wakitaba ne: uvua muye kupesha bantu mikanda ya malu a mu Bible kadi kulejaye ne: kavua wenda mushinga bu muvuabu bamuamba to. Kabadi aka kakitaba tshivuaye muambe. Kakamba ne: “Muntu eu . . . mmukumbane bua kudikumbajila majinga ende, kadi ki mmupete difutu nansha dimue peshi kavua ukeba bua kudipeta to. Kadi mmutule makuta ende bua kukumbaja mudimu wende eu.” Kabadi kakatua ku tshia Bantemu ne kulejaku ne: kabivua bikengela kubala mudimu wa Lehmann “bu wa bungenda to.” Kadi baluishi ba bantu ba Nzambi bavua badisuike bua kuimanyika mudimu wa diyisha mu ditunga dijima. (Mus. 94:20) Badi baya ne tshilumbu ku Kabadi kakulu ka mu ditunga. Bana betu bakenza tshinyi?

20. Mmunyi muvua Kabadi kakulu ka mu Danemark kakose tshilumbu? Bana betu bakenza tshinyi?

²⁰ Lumingu lumue kumpala kua Kabadi kakulu kukonkononaku tshilumbu etshi, Bantemu ba mu Danemark bakavudija mudimu wabu wa kuyisha. Mu Dibidi dia 3 ngondo wa 10 mu 1933, Kabadi kakulu kakamanyisha dipangadika divuaku kangate. Kavua kitabe dipangadika divua kabadi kashadile kangate dia ne: August Lehmann kavua mushipe mukenji to. Dipangadika edi diakambuluisha bua Bantemu kuyishabu badilekelele. Bua bana betu ba balume ne ba bakaji aba kulejabu dianyisha diabu kudi Yehowa, bakavudija mudimu wabu bikole. Katshia anu dîba adi, bana betu ba mu Danemark badi benza mudimu wa buambi mbulamatadi kayi ubatatshisha.

21, 22. Kabadi kakulu ka mu États-Unis kakangata dipangadika kayi bua tshilumbu tshia muanetu Murdock?

²¹ États-Unis. Mu Dia lumingu dia 25 ngondo 2 wa 1940, bakakuata Robert Murdock uvua mpanda-njila pamue ne bamanyishi bakuabu muanda mutekete pavuabu bayisha mu tshimenga tshia Jeannette tshidi pabuipi ne Pittsburgh mu provense wa  Pennsylvanie. Bavua babakuate bualu bavua babenge kusumba mukanda wa dianyisha bua kuabanyabu mikanda. Pakalombabu Kabadi kakulu bua kutangila tshilumbu etshi, kakitaba.

²² Mu dia 3 ngondo 5 wa 1943, Kabadi kakulu kakamanyisha dipangadika diaku kabingisha Bantemu. Kabadi kakabenga dipangadika dia kuikala ne mukanda wa dianyisha bualu kuenza nunku kuvua bu kufutshisha bantu “tshitadi tshia malu akavuabu bitabe mu tshipungidi tshivua tshileja ne: muntu yonso uvua ne bukenji bua kuenza malu a ntendelelu mudilekelele.” Kabadi kakabenga mukenji uvuabu bele au kaleja muvuawu “upangisha bantu budikadidi bua kuakula ne ubapangisha bua kuenza malu a ntendelelu badilekelele.” Bua kuleja lungenyi lua bena ku kabadi ba bungi, ndumbulula William Douglas wakaleja ne: mudimu wa Bantemu ba Yehowa “ki nkuyisha patupu to; ne ki nkuabanya mikanda ya malu a ntendelelu patupu. Kadi nkuenza bionso bibidi.” Wakasakidila ne: “mushindu wa kutendelela eu udi pawu ne mushinga wa bungi . . . anu bu mudi wa kutendelela mu bitendelelu ne kuyisha ku tshiakuidi.”

23. Bua tshinyi mushindu utuvua batshimune ku tubadi mu 1943 utshidi utuambuluisha lelu?

²³ Ku diambuluisha dia dipangadika edi, bantu ba Nzambi bakatshimuna. Diakaleja bulelela tshitudi, mmumue ne: bena mudimu ba Kristo, kadi ki mbangenda mushinga to. Mu dituku kadiyi kupua muoyo edi mu 1943, Bantemu ba Yehowa bakatshimuna bilumbu 12 bia ku bilumbu 13 ku Kabadi kakulu  ne munkatshi muabi muvua tshia Murdock. Mapangadika a ku kabadi aa mmambuluishe mu bilumbu bia matuku mashale aa muvua baluishi betu baluisha kabidi budikadidi buetu bua kuyisha mukenji wa Bukalenge miaba idi bantu ne ku nzubu ne ku nzubu.

24. Tutu tuenza tshinyi patu mbulamatadi utukandika bua kuyisha?

²⁴ Tuetu bantu ba Yehowa tudi ne dianyisha dia bungi patudi ne mushindu wa kuyisha mukenji wa Bukalenge badilekelele. Kadi padi mbulamatadi ukandika mudimu wetu wa kuyisha, tudi tushintulula mayele etu a kuyisha kadi tutungunuka ne kuenza mudimu wetu mu mushindu udi mukumbane. Anu bu bapostolo, “Tudi ne bua kutumikila Nzambi bu mfumu pamutu pa kutumikila bantu.” (Bien. 5:29; Mat. 28:19, 20) Tudi kabidi tulomba tubadi bua kumbusha dikandika dia midimu yetu. Tumone bilejilu bibidi.

25, 26. Mmalu kayi avua menzeke mu Nicaragua avua mafikishe ku diya ne tshilumbu ku Kabadi kakulu? Mbipeta kayi biakamueneka?

²⁵ Nicaragua. Mu dia 19 ngondo wa 11 wa 1952, muanetu Donovan Munsterman uvua misionere ne mutangidi wa filiale wakaya mu biro bidi bitangila mikanda ya dibuela ne dipatuka mu ditunga mu Managua, tshimenga tshikulu. Bavua bamuambile bua aye kumonangana ne Arnoldo García uvua ulombola biro ebi. Kapitene eu wakambila Donovan ne: bavua bakandike Bantemu ba Yehowa bonso ba mu Nicaragua “bua kutungunuka ne kuyisha malu adibu bitabuja ne kuenza midimu yabu ya malu a ntendelelu.” Pakebejaye kapitene García bua tshinyi bavua bangate dipangadika edi, García wakaleja ne: Bantemu kabavua ne dianyisha dia kudi ministre wa bukalenge bua kuyisha to, ne bavua babafunde ne: bavua Ba-koministe. Bavua batufunde bavua banganyi? Bamfumu ba bena Katolike.

²⁶ Muanetu Munsterman wakaya diakamue ne tshilumbu etshi kudi ministre wa bukalenge ne wa ntendelelu ne kudi mfumu  wa ditunga Anastasio Somoza García, kadi kabakamumvuila to. Nunku bana betu bakashintulula mayele abu a diyisha. Bakakanga Nzubu ya Bukalenge ne kutuadijabu kudisangisha mu tusumbu tukese, ne kuimanyikabu diyisha mu njila, kadi bavua anu bayisha mukenji wa Bukalenge. Anu tshiotshi tshikondo atshi, bakalomba Kabadi kakulu ka mu Nicaragua bua kumbusha dikandika edi. Bikandakanda biakakula bikole bua dikandika ne bua dilomba dia bana betu, Kabadi kakulu kakitaba bua kutangila tshilumbu etshi. Ntshinyi tshiakenzeka? Mu dia 19 ngondo 6 mu 1953, Kabadi kakulu kakamanyisha dipangadika diaku dinene kabingisha Bantemu. Kabadi kavua kasangane ne: dikandika divua dishipa mêyi a mu tshipungidi avua anyishila bantu bua kuikala ne budikadidi bua kuleja mmuenenu wabu ne bua kuenza malu a ntendelelu. Kabadi kakatuma kabidi dîyi bua malanda avua pankatshi pa mbulamatadi wa mu Nicaragua ne Bantemu apingane amu bu kumpala.

27. Bua tshinyi dipangadika dia Kabadi divua dikemeshe bantu ba mu Nicaragua? Bana betu bakamona ditshimuna edi mushindu kayi?

²⁷ Biakakemesha bena mu Nicaragua bikole bua muvua Kabadi kakulu katue ku tshia Bantemu. Tshikondo atshi bamfumu ba bitendelelu bavua ne buenzeji bukole ne kabadi kavua kepuka bua kupeta nabu bilumbu. Kabidi, bu muvua bamfumu ba mbulamatadi ne bukole bua bungi, Kabadi kakulu kakavua ne tshibidilu tshia kubenga mapangadika abu nansha. Bana betu bakajadika ne: bavua batshimune bualu bavua bapete bukubi bua kudi Mukalenge wabu ne bualu bavua batungunuke ne kuyisha.—Bien. 1:8.

28, 29. Mu 1986, malu akashintuluka mushindu kayi mu Zaïre?

²⁸ Zaïre. Mu 1985 kuvua Bantemu batue ku 35 000 mu Zaïre, utudi tubikila lelu ne: République démocratique du Congo. Bua kutungunuja midimu ya Bukalenge, bakatuadija kuibaka nzubu mipiamipia ya Betele. Mu ngondo wa 12 wa 1985 bakenza mpuilu wa bantu bafumine mu matunga a bungi ku Kinshasa tshimenga tshikulu tshia ditunga, ne baleji mpala 32 000 bafumine mu matunga a bungi bakuwula mu tshipalu tshia ndundu. Kadi malu akatuadija kushintuluka bua Bantemu ba Yehowa. Tshiakenzeka ntshinyi?

²⁹ Muanetu Marcel Filteau, misionere mufumine mu Québec mu Canada uvuabu bakengeshe mu bukokeshi bua Duplessis, uvua wenza mudimu mu Zaïre tshikondo atshi. Wakaleja tshivua tshienzeke wamba ne: “Mu dia 12 ngondo 3 wa 1986 bakapesha bana betu bavua batangila midimu mukanda uvua uleja ne: bulongolodi bua Bantemu ba Yehowa bua mu Zaïre kabuvua buanyishibue kudi mikenji ya ditunga to.” Mfumu wa ditunga Mobutu Sese Seko ke uvua mutue tshiala pa mukanda wa dikandika.

30. Bena mu komite wa filiale bavua ne bua kuangata dipangadika kayi dinene? Bakapangadija bua kuenza tshinyi?

³⁰ Dituku diakalonda, tshisanji tshia ditunga tshiakamanyisha ne: “Katuakumvua kabidi bakula bua Bantemu ba Yehowa mu [Zaïre] to.” Diakamue, dikengeshibua kutuadija. Bakupula Nzubu ya Bukalenge, ne bakanyenga bana betu bintu biabu, bakabakuata, bakabela mu maloko ne bakabakuma. Bakela too ne Bantemu batshivua bana mu maloko. Mu dia 12 ngondo wa 10 wa 1988 mbulamatadi wakanyenga bintu bia bulongolodi buetu, ne basalayi bakasombela mu nzubu ya Betele. Bana  betu bavua batangila mudimu bakenza dilomba bua kuyukila ne mfumu wa ditunga Mobutu, kadi kabakapeta diandamuna to. Nunku bena mu komite wa filiale bavua ne bua kuangata dipangadika dinene. Bakadiebeja ne: “Tuye ne tshilumbu etshi ku Kabadi kakulu anyi, peshi tuindile?” Muanetu Timothy Holmes uvua misionere ne mutangidi wa komite wa filiale tshikondo atshi udi uvuluka wamba ne: “Tuakalomba Yehowa bua atupeshe meji ne buludiki.” Panyima pa bena mu komite bamane kukonkonona tshilumbu etshi ne basambile, bakamona ne: tshikondo katshivua tshikumbane bua kuya ku tubadi to. Nunku bakimanyina pa mushindu wa kuambuluisha bana betu ne kukebabu mishindu ya kutungunuka ne mudimu wa diyisha.

31, 32. Kabadi kakulu ka mu Zaïre kakangata dipangadika kayi dinene? Dipangadika edi divua dienzele bana betu tshinyi?

³¹ Pakapita bidimu bia bungi, dikengesha Bantemu diakakepa ne bakatuadija kunemeka bikole manême a bantu mu ditunga. Bena mu komite wa filiale bakamona ne: tshikondo tshivua tshikumbane bua kuya ku Kabadi kakulu ka mu Zaïre bua kuakula bua dikandika. Bualu bua dikema, Kabadi kakulu kakitaba bua kukonkonona tshilumbu etshi. Nunku mu dia 8 ngondo wa 1 wa 1993, bidimu bipatshila ku 7 bimane kupita pavua mfumu wa ditunga mutume dîyi bua dikandika, Kabadi kakaleja ne: tshivua mbulamatadi muenzele Bantemu katshivua tshipetangana ne mikenji to, nunku bakumbusha dikandika. Ela meji tshivua bualu ebu mua kubakebela. Bandumbulula bavua bateke mioyo yabu mu njiwu pavuabu bashipe dipangadika dia mfumu wa ditunga. Muanetu Holmes udi wamba ne: “Mu tshikondo tshia dikandika edi, tuvua bamone mudi Yehowa mua kushintulula malu.” (Dan. 2:21) Ditshimuna edi diakakolesha ditabuja dia bana betu. Bakamona ne: Mukalenge Yezu uvua mulombole bantu bende bua kumanyabu dîba ne mushindu wa kuenza malu.

 ³² Diakamue pakumbushabu dikandika, bakitabila biro bia filiale bua kupingaja bamisionere, kuibaka nzubu ya Betele ne kutuadija kubueja mikanda ya malu a mu Bible mu ditunga. f Bantu ba Nzambi ba pa buloba bujima badi ne disanka bua kumona mudi Yehowa ukuba bantu bende bua kukolabu mu nyuma.—Yesh. 52:10.

33. Bilumbu bikese bia ku tubadi bitudi bakonkonona ebi bidi bitulongesha tshinyi?

³³ Malu atudi bakonkonone adi atangila bimue bilumbu bia ku tubadi aa adi aleja ne: Yezu mmukumbaje mêyi ende a ne: “Nennupeshe mêyi ne meji ikala baluishi benu bonso kabayi mua kutua tshiadi anyi kuela mpata.” (Bala Luka 21:12-15.) Imue misangu Yehowa mmujule ba Gamaliele ba matuku etu bua kukuba bantu bende peshi mmusake balumbuluishi ne bandumbulula ba dikima bua kuimanyina buakane. Yehowa mmutshipaje bia mvita bia baluishi betu. (Bala Yeshaya 54:17.) Buluishi kabuena mua kuimanyika mudimu wa Nzambi nansha.

34. Mbualu kayi budi bukoka ntema budi mu bilumbu bitudi batshimune? Budi butujadikila tshinyi? (Tangila kazubu ka ne: “ Mishindu minene ya ditshimuna ku Tubadi tunene ivua miyishe mudimu wa diyisha Bukalenge kumpala.”)

³⁴ Mbualu kayi budi bukoka ntema yetu budi mu bilumbu bitudi batshimune? Anji vuluka ne: Bantemu ba Yehowa ki mbende lumu peshi kabatu ne buenzeji kampanda mu bantu to. Katutu tuelela bamfumu ba tshididi tukanda, tutua tumpanye tua malu a tshididi nyama ku mikolo peshi tusaka bamfumu ba tshididi bua kuenza malu kampanda to. Kabidi ba bungi ba kutudi batu baya ku tubadi tunene batu misangu ya bungi babamona bu badi ‘kabayi balonge tulasa tua bungi ne bikale bantu tshianana.’ (Bien. 4:13) Nunku mu ngakuilu wa buntu, katutu tujinga bua ne banzuji balue kutuambuluisha bua kupisha baluishi betu ba malu a ntendelelu ne ba tshididi badi ne bukole to. Kadi, misangu ya bungi tubadi tutu tuangate mapangadika adi atubingisha. Mushindu utudi batshimune ku tubadi udi uleja ne: tudi tuenda ‘kumpala kua Nzambi pamue ne Kristo.’ (2 Kol. 2:17) Nunku, tudi tuamba anu bu mupostolo Paulo ne: “Yehowa mmuambuluishi wanyi; tshiakutshina nansha.”—Eb. 13:6.