TSHITUPA 2
Mudimu wa diyisha Bukalenge—Kuyisha lumu luimpe pa buloba bujima
UDI udilongolola kumpala kua kuya mu buambi dituku diudi kuyi uya ku mudimu. Udi wanji kuelakana kakese, udiumvua mutshioke ndambu. Udi umona ne: mbimpe wikishe. Kadi udi usambila ne wangata dipangadika dia kuya kuyisha. Udi uyisha ne muanetu wa bakaji wa lulamatu ukadi mukulakaje ne udi usanka bikole bua mudiye ne tshisumi ne bulenga. Panudi nuenda nuyisha mukenji wa bulelela ku nzubu ne ku nzubu, udi uvuluka ne: bana benu pa buloba bujima badi bayisha mukenji wa muomumue, benza mudimu ne mikanda ya muomumue ne balonga malu a muomumue. Paudi upingana ku nzubu, udi udiumvua ne bukole ne disanka bualu kuvua mushale musombe ku nzubu to.
Lelu, mudimu wa kuyisha udi bena Kristo benza mmudimu munene wa Bukalenge bua Nzambi. Yezu wakamba ne: mudimu wa kuyisha uvua ne bua kuenzeka mu mushindu wa dikema mu matuku a ku nshikidilu. (Mat. 24:14) Mmunyi mudi mulayi eu mukumbane? Mu tshitupa etshi netuakule bua bantu, bua mishindu, ne bua bintu bivua ne mushinga wa bungi mu mudimu wa kuyisha wa bena Kristo, bidi biambuluisha miliyo ya bantu pa buloba bujima bua kumona mudi Bukalenge bua Nzambi buikale bualu bulelela.
MU TSHITUPA ETSHI
NSHAPITA 6
Bamanyishi—Bamanyishi badi badifila ku budisuile
Bua tshinyi Yezu uvua mutuishibue ne: uvua ne bua kuikala ne bantu bavua mua kudifila ku budisuile mu matuku a ku nshikidilu? Ntshinyi tshiudi mua kuenza bua kuleja ne: udi ukeba tshia kumpala Bukalenge?
NSHAPITA 7
Mishindu ya kuyisha—Kuyisha mu mishindu yonso bua kupeta bantu
Bala mishindu idi bantu ba Nzambi benze mudimu ne bintu bishilashilangane bua kuyisha bantu ba bungi kumpala kua nshikidilu kuluaye.
NSHAPITA WA 8
Bintu bia kuyisha nabi—Kupatula mikanda bua mudimu wa pa buloba bujima
Mmunyi mudi mudimu wetu wa dikudimuna uleja ne: Mukalenge udi utuambuluisha? Mmalu kayi adi atangila mikanda yetu adi aleja ne: Bukalenge mbualu bulelela?
NSHAPITA WA 9
Bipeta bia mudimu wa diyisha—‘Madimi adi matoke bua kunowa’
Yezu wakalongesha bayidi bende malu abidi a mushinga bua bidi bitangila mudimu munene wa dinowa dia mu nyuma. Mmunyi mudi malu abidi aa atutangila petu lelu?
