1. Udi mua kuikala udiebeja tshinyi wewe mumane kulonga mukanda eu bimpe?

UDI mulonge malu malelela a bungi a mu Bible mu mukanda eu, bu mudi mulayi wa Nzambi wa muoyo wa tshiendelele, mushindu udi bafue, ne ditekemena dia dibishibua. (Muambi 9:5; Luka 23:43; Yone 5:28, 29; Buakabuluibua 21:3, 4) Ukadi pamuapa mutuadije kubuela mu bisangilu bia Bantemu ba Yehowa ne muitabe ne: bobu ke badi mu tshitendelelu tshilelela. (Yone 13:35) Ukadi pamuapa mutuadije kukolesha bulunda buebe ne Yehowa, ne muangate dipangadika dia kumuenzela  mudimu. Nunku udi mua kuikala udiebeja ne: ‘Ndi ne bua kuenza tshinyi mpindieu bua kuenzela Nzambi mudimu?’

2. Bua tshinyi muena Etshiopi kampanda uvua musue kubatijibua?

² Ke tshivua muena Etshiopi kampanda uvua ne muoyo mu matuku a Yezu mudiebeje pende. Matuku makese Yezu mumane kubishibua ku lufu, Filipo muyidi wa Yezu wakayisha muntu eu. Filipo wakamujadikila ne: Yezu uvua Masiya. Malu avua muena Etshiopi eu mulonge akamulenga bikole, kumusakabi bua kuamba diakamue ne: “Tangila! Ke mâyi aa; ntshinyi tshidi tshimpangisha bua meme kubatijibua?”—Bienzedi 8:26-36.

3. a) Yezu uvua mutumine bayidi bende dîyi kayi? b) Mmushindu kayi udibu ne bua kubatiza muntu?

³ Bible udi ulongesha patoke ne: wewe musue kuenzela Yehowa mudimu, udi ne bua kubatijibua. Yezu wakambila bayidi bende ne: “Nuvuije bantu ba mu bisamba bionso bayidi, nubabatiza.” (Matayi 28:19) Yezu wakafila kabidi tshilejilu pavuabu bamubatize yeye muine. Bavua bamuine yeye mujima mu mâyi, kabavua bamumiamine mâyi mu mutu patupu to. (Matayi 3:16) Lelu eu padibu babatiza muena Kristo, badi ne bua kumuina, anyi kumutua, yeye mujima mu mâyi.

4. Ntshinyi tshidi batismo webe uleja bantu bakuabu?

⁴ Padibu bakubatiza, bidi bileja bantu bakuabu ne: udi musue bushuwa kulua mulunda wa Nzambi ne kumuenzela mudimu. (Misambu 40:7, 8) Nunku udi mua kuikala udiebeja ne: ‘Ntshinyi tshindi ne bua kuenza bua kubatijibua?’

5. a) Ntshinyi tshiudi ne bua kuenza kumpala kua wewe kubatijibua? b) Bua tshinyi bisangilu bia bena Kristo bidi ne mushinga?

⁵ Kumpala kua wewe kubatijibua, udi ne bua kumanya Yehowa ne Yezu. Ukadi mutuadije kuenza nunku ku diambuluisha  dia dilonga diebe dia Bible. (Bala Yone 17:3.) Kadi ki nkujike to. Bible udi wamba ne: udi ne bua ‘kuwujibua tente ne dimanya dijalame’ dia disua dia Yehowa. (Kolosayi 1:9) Bisangilu bia Bantemu ba Yehowa nebikuambuluishe bua kukolesha malanda ebe ne Yehowa. Ebu mbumue bua ku malu adi ne bua kukusaka bua kubuela mu bisangilu ebi pa tshibidilu.—Ebelu 10:24, 25.

6. Mmalongesha kayi a mu Bible audi ne bua kumanya kumpala kua wewe kubatijibua?

⁶ Bushuwa, Yehowa kena ukulomba bua umanye malu onso a mu Bible kumpala kua wewe kubatijibua to. Kavua mulombe muena Etshiopi bua kumanya malu onso kumpala kua yeye kubatijibua to. (Bienzedi 8:30, 31) Ikala mumanye ne: netutungunuke ne kulonga malu a Nzambi kashidi ne tshiendelele. (Muambi 3:11) Kadi bua wewe kubatijibua, udi ne bua kuanji kumanya malongesha manene a mu Bible ne kuitaba.—Ebelu 5:12.

7. Dilonga diebe dia Bible ndikuambuluishe mushindu kayi?

⁷ Bible udi wamba ne: “Kuoku kakuyi ditabuja kakuena mushindu wa kusankisha Nzambi.” (Ebelu 11:6) Nunku udi ne bua kuikala ne ditabuja kumpala kua wewe kubatijibua. Bible udi utuambila ne: bantu bakuabu ba mu tshimenga tshia kale tshia Kolinto bakumvua malu avua bayidi ba Yezu balongesha, ke bobu ‘kuitabuja, kubabatizabu.’ (Bienzedi 18:8) Bia muomumue, dilonga diebe dia Bible ndikuambuluishe bua kupeta ditabuja mu milayi ya Nzambi ne mu bukole bua mulambu wa Yezu udi mua kutusungila ku mpekatu ne ku lufu.—Yoshua 23:14; Bienzedi 4:12; 2 Timote 3:16, 17.

8. Ntshinyi tshiakusaka bua kuambila bantu bakuabu malu audi ulonga?

⁸ Paudi wenda ulonga Bible ne umona mudiye ukuambuluisha mu nsombelu webe, ditabuja diebe  didi dikola. Nebikusake bua kuambila bantu bakuabu malu audi ulonga. (Yelemiya 20:9; 2 Kolinto 4:13) Kadi mbanganyi baudi ne bua kuambila malu aa?

9, 10. a) Mbanganyi baudi mua kutuadija kuambila malu audi ulonga? b) Udi ne bua kuenza tshinyi wewe musue kutuadija kuyisha ne bena mu tshisumbu?

⁹ Udi mua kujinga kuambila bena mu dîku dienu, balunda bebe, bena mutumba, anyi bena mudimu benu malu audi ulonga. Mbimpe kubambilawu, kadi ubambilawu mu mushindu muimpe ne bukalanga. Ndekelu wa bionso, neukumbane bua kutuadija kuyisha ne bena mu tshisumbu. Paudi udiumvua ne: ukadi mukumbane, udi mua kuleja Ntemu udi ukulongesha Bible ne kumuambila ne: udi musue kutuadija kuyisha pamue ne bena mu tshisumbu. Yeye mumone ne: ukadi mukumbane ne udi wenza malu mu diumvuangana ne mikenji ya mu Bible, dîba adi wewe ne yeye nenutuilangane ne bakulu babidi ba mu tshisumbu.

¹⁰ Nenuyukile malu kayi panudi nutuilangana? Bakulu nebayukile nebe bua kumona ni udi mumanye malongesha manene a mu Bible ne uitaba, utumikila tshidi Bible wamba mu nsombelu webe matuku onso, ne musue bulelela kulua Ntemu wa Yehowa. Ikala mumanye ne: bakulu badi batabalela bena mu tshisumbu bonso, nansha wewe pebe. Nunku kutshinyi bua kuyukila nabu to. (Bienzedi 20:28; 1 Petelo 5:2, 3) Nuenu bamane kuyukila, bakulu nebakumanyishe ni udi mukumbane bua kutuadija kuyisha ne bena mu tshisumbu.

11. Bua tshinyi mbimpe kuanji kushintuluka mu amue malu kumpala kua kutuadija kuyisha ne bena mu tshisumbu?

¹¹ Bidi mua kuenzeka ne: bakulu bakuambile bua kuanji kushintuluka mu amue malu kumpala kua kutuadija kuyisha ne bena mu tshisumbu. Bua tshinyi mbimpe kuanji kushintuluka? Bualu patudi tuambila bantu bakuabu malu a Nzambi, tudi baleji mpala ba Yehowa ne  tudi ne bua kuenza malu mu mushindu udi umutumbisha.—1 Kolinto 6:9, 10; Galatiya 5:19-21.

12. Bua tshinyi bantu bonso badi ne bua kunyingalala?

¹² Kudi bualu bukuabu buudi ne bua kuenza kumpala kua wewe kubatijibua. Mupostolo Petelo wakamba ne: “Nunku, nyingalalayi bua mpekatu, shintulukayi bua mpekatu yenu ijimijibue.” (Bienzedi 3:19) Kunyingalala kudi kumvuija tshinyi? Kudi kumvuija kumvua bibi menemene bua bualu bubi butudi benze. Tshilejilu, biwikala uvua wenda masandi, udi ne bua kunyingalala. Nansha biwikala uvua udienzeja bua kuenza malu mimpe mu nsombelu webe, udi anu ne bua kunyingalala, bualu tuetu bonso tudi tuenza mpekatu ne tudi ne bua kulomba Nzambi luse bua atubuikidile.—Lomo 3:23; 5:12.

13. ‘Kushintuluka’ kudi kumvuija tshinyi?

¹³ Kumvua bibi patupu bua malu mabi auvua wenza nkukumbane anyi? Tòo. Petelo wakamba ne: udi kabidi ne bua ‘kushintuluka.’ Bidi biumvuija ne: udi ne bua kulekela tshikadilu tshibi tshionso tshiuvua natshi ne kutuadija kuenza malu mimpe. Tuangate tshilejilu etshi: fuanyikija ne: udi wenza luendu uya muaba kampanda bua musangu wa kumpala. Wewe mumane kuya tshitupa tshia njila, udi umona ne: udi muangate disangu dikuabu. Newenze tshinyi? Kakuyi mpata, neutekeshe luendu, wewe kuimana, kukudimuka, ne pashishe kuangata disangu dimpe. Bia muomumue, paudi wenda ulonga Bible, udi mua kumona ne: kudi malu anyi bilele kampanda mu nsombelu webe biudi ne bua kushintulula. Ikala mudiakaje bua ‘kushintuluka’ anyi kukudimuka, mmumue ne: kushintulula malu adi akengedibua, ne kutuadija kuenza malu mimpe.

14. Mmushindu kayi uudi udilambula kudi Nzambi?

¹⁴ Bualu bukuabu bua mushinga buudi ne bua kuenza kumpala kua wewe kubatijibua nkudilambula kudi Yehowa. Paudi udilambula kudi Yehowa, udi umulaya mu disambila bua kumutendelela anu yeye nkayende ne bua kuteka disua diende pa muaba wa kumpala mu nsombelu webe.—Dutelonome 6:15.

15, 16. Ntshinyi tshidi tshisaka muntu bua kudilambula kudi Nzambi?

¹⁵ Kulaya bua kuenzela anu Yehowa nkayende mudimu kudi anu bu kulaya bua kusomba ne muntu uudi munange matuku ebe onso a muoyo. Fuanyikija ne: nsongalume kampanda udi utantshila nsongakaji kansanga. Padi nsongalume wenda ulonga bikadilu bia nsongakaji au, ubimona bimusankisha, udi umunanga bikole ne ujinga kumusela. Nansha mudi dipangadika dia kumusela dikale dinene, nsongalume udi witaba bua kuambula bujitu ebu bualu mmunange nsongakaji eu.

¹⁶ Bia muomumue, paudi wenda ulonga malu a Yehowa, udi ufika ku dimunanga ne ujinga kuenza muebe muonso bua kumuenzela mudimu. Bualu ebu nebukusake bua kumulaya mu disambila bua kumuenzela mudimu. Bible udi wamba ne: muntu yonso udi musue kulonda Yezu udi ne bua ‘kudibenga.’ (Mâko 8:34) Bidi biumvuija tshinyi? Bidi biumvuija ne: udi uteka ditumikila Yehowa pa muaba wa kumpala mu nsombelu webe. Malu adi Yehowa musue adi ne mushinga wa bungi kupita majinga ebe ne bipatshila biebe.—Bala 1 Petelo 4:2.

17. Bua tshinyi bantu bakuabu badi babenga kudilambula kudi Yehowa?

¹⁷ Bantu bakuabu badi babenga kudilambula kudi Yehowa bualu badi batshina ne: kabakukumbaja dilaya diabu  dia kumuenzela mudimu to. Ki mbasue kuela Yehowa mâyi ku makasa to, anyi badi mua kuikala bela meji ne: bobu kabayi badilambule kudi Yehowa, Yehowa kakubalumbuluisha bua malu adibu benza to.

18. Ntshinyi tshidi mua kukuambuluisha bua kubenga kutshina bua kuela Yehowa mâyi ku makasa?

¹⁸ Dinanga diudi nadi bua Yehowa nedikuambuluishe bua kubenga kutshina bua kumuela mâyi ku makasa. Bu muudi mumunange, newenze muebe muonso bua kukumbaja dilaya diudi mumulaye. (Muambi 5:4; Kolosayi 1:10) Kuakuela meji ne: mbikole bua kuenza disua dia Yehowa to. Mupostolo Yone wakafunda ne: “Mona tshidi dinanga dia Nzambi diumvuija: bua tutumikile mikenji yende; pabi mikenji yende kayena ne bujitu.”—1 Yone 5:3.

19. Bua tshinyi kuena ne bua kutshina bua kudilambula kudi Yehowa?

¹⁹ Kabiena bikengela bua wikale mupuangane bua wewe kudilambula kudi Yehowa to. Kena utulomba bua kuenza malu atudi katuyi mua kukokesha bua kuenza to. (Misambu 103:14) Neakuambuluishe bua kuenza malu mimpe. (Yeshaya 41:10) Eyemena Yehowa ne muoyo webe wonso, ne “yeye nealulamije njila yebe.”—Nsumuinu 3:5, 6.

20. Wewe mumane kudilambula kudi Nzambi, mbualu kayi budi bulonda buudi ne bua kuenza?

²⁰ Udi wela meji ne: ukadi mukumbane bua kudilambula kudi Yehowa anyi? Wewe mumane kudilambula kudi Yehowa, ukadi mukumbane bua kuenza bualu budi bulonda ebu: udi ne bua kubatijibua.

21, 22. Mmushindu kayi uudi mua ‘kujikula patoke’ ditabuja diebe?

²¹ Ambila mutangidi wa malu a kasumbu ka bakulu wa mu tshisumbu tshienu ne: ukadi mudilambule kudi  Yehowa ne udi musue kubatijibua. Pashishe neasungule bakulu badi ne bua kukonkonona nebe malongesha manene a mu Bible. Bobu bamone ne: udi mukumbane, nebakuambile ne: udi mua kubatijibua mu mpuilu anyi mu mpungilu wa Bantemu ba Yehowa udi ulonda. Mu mpuilu amu, nebenze muyuki udi uleja tshidi batismo umvuija. Ngamba-malu udi wenza muyuki eu neele pashishe bantu badi bakumbane bua  kubatijibua nkonko ibidi mipepele. Paudi wandamuna nkonko eyi, udi ‘ujikula patoke’ ditabuja diebe.—Lomo 10:10.

²² Pashishe badi bakubatiza. Nebakuine wewe mujima mu mâyi. Batismo webe nealeje bantu bonso ne: ukadi  mudilambule kudi Yehowa ne udi mpindieu Ntemu wa Yehowa.

23. Kubatijibua “mu dîna dia Tatu, dia Muana, ne dia nyuma muimpe” kudi kumvuija tshinyi?

²³ Yezu wakamba ne: bayidi bende bavua ne bua kubatijibua “mu dîna dia Tatu, dia Muana, ne dia nyuma muimpe.” (Bala Matayi 28:19.) Bidi biumvuija tshinyi? Bidi biumvuija ne: udi witaba bumfumu bua Yehowa ne mudimu udi nawu Yezu mu malu adi Nzambi mulongolole, ne mushindu udi Nzambi wenza mudimu ne nyuma wende bua kukumbaja disua diende.—Misambu 83:18; Matayi 28:18; Galatiya 5:22, 23; 2 Petelo 1:21.

24, 25. a) Bua tshinyi batismo udi ne mushinga wa bungi? b) Ntshinyi tshituamona mu nshapita wa ndekelu?

²⁴ Batismo mbualu bua mushinga mukole. Padibu bakuina mu mâyi, bidi bileja ne: udi mufue ku nsombelu webe wa kale anyi mumulekele. Padibu bakupatula mu mâyi, neutuadije nsombelu mupiamupia wa dienza disua dia Nzambi. Bidi bileja ne: kutuadijila ku mpindieu newikale wenzela Yehowa mudimu. Ikala mumanye ne: kuena mudilambule kudi muntu, kudi bulongolodi kampanda, anyi ku mudimu kansanga to. Udi mulambule muoyo webe kudi Yehowa.

²⁵ Didilambula diebe nedikuambuluishe bua kukolesha bulunda buebe ne Nzambi. (Misambu 25:14) Kabiena biumvuija ne: muntu neasungidibue anu bualu mmubatijibue to. Mupostolo Paulo wakafunda ne: “Nutungunuke ne kudienzeja bua lupandu luenu ne ditshina ne dizakala.” (Filipoyi 2:12) Batismo udi anu bualu bua ntuadijilu budi bufikisha muntu ku lupandu. Kadi mmushindu kayi uudi mua kushala pabuipi ne Yehowa? Nshapita wa ndekelu neandamune lukonko elu.