1, 2. Mbamue bantu kayi bavua badie bulunda ne Yehowa?

MMUNTU kayi uutu musue kudia nende bulunda? Mmuntu uudi munange ne unudi numvuangana nende. Mmuntu udi ne bikadilu bimpe ne ngikadilu iudi wanyisha.

² Yehowa utu usungula bamue bantu bua bikale balunda bende. Tshilejilu, Abalahama uvua umue wa ku balunda ba Yehowa. (Yeshaya 41:8; Yakobo 2:23) Yehowa uvua kabidi munange Davidi. Wakamba ne: Davidi uvua ‘muntu uvua usankisha muoyo wende.’ (Bienzedi 13:22) Muprofete Danyele uvua “muntu wa mushinga mukole” kudi Yehowa.—Danyele 9:23.

3. Bua tshinyi Abalahama, Davidi ne Danyele bavua balunda ba Yehowa?

³ Mmunyi muvua Abalahama, Davidi ne Danyele balue balunda ba Yehowa? Yehowa wakambila Abalahama ne: “Udi mumvue dîyi dianyi.” (Genese 22:18) Yehowa udi ulua mulunda wa bantu badi bamutumikila ne budipuekeshi. Nansha tshisamba tshijima tshia bantu tshidi mua kudia nende bulunda. Yehowa wakambila tshisamba tshia Isalele ne: “Tumikilayi dîyi dianyi ne meme nendue Nzambi wenu, ne nuenu nenulue bantu banyi.” (Yelemiya 7:23) Nanku wewe pebe udi ne bua kutumikila Yehowa biwikala bushuwa musue kulua mulunda wende.

4, 5. Mmunyi mudi Yehowa ukuba balunda bende?

⁴ Bible udi wamba ne: Yehowa udi ukeba mishindu ya “kuleja bukole buende kudi bantu badi ne muoyo mujima kudiye.” (2 Kulondolola 16:9) Yehowa udi ulaya balunda bende  mu Misambu 32:8 ne: “Nenkupeshe busunguluji ne nenkulongeshe njila uudi ne bua kuendela. Nenkupeshe mibelu ne dîsu dianyi kuudi.”

⁵ Muena lukuna kampanda wa bukole udi ukeba kukupangisha bua kuikala mulunda wa Nzambi. Kadi Yehowa mmusue kutukuba. (Bala Misambu 55:22.) Mutudi balunda ba Yehowa, tudi tumuenzela mudimu ne muoyo wetu mujima. Tudi ne lulamatu kudiye nansha mu nsombelu mikole. Tudi ne dishindika dia muomumue ne divua nadi mufundi wa misambu. Wakafunda bua Yehowa ne: “Bu mudiye ku tshianza tshianyi tshia balume, tshiakunyungishibua nansha kakese.” (Misambu 16:8; 63:8) Mmunyi mudi Satana ukeba bua kutupangisha bua kuikala balunda ba Nzambi?

6. Ntshinyi tshivua Satana muambe bua bantu?

⁶ Tuvua balonge mu Nshapita wa 11 ne: Satana uvua muluishe bumfumu bua Yehowa ne mumubande mudiye muena dishima ne mudiye kayi muntu muakane pavuaye kayi mulekele bua Adama ne Eva badisunguile tshidi tshimpe ne tshidi tshibi. Mukanda wa mu Bible wa Yobo udi utulongesha ne: Satana udi kabidi ubanda bantu badi basue kulua balunda ba Nzambi. Satana udi wamba mudibu benzela Nzambi mudimu bualu udi ubapesha bintu, kadi ki mbualu mbamunange to. Satana udi mene wamba mudiye mua kumbusha muntu kayi yonso kudi Nzambi. Tumone tshidi tshilejilu tshia Yobo tshitulongesha, ne muvua Yehowa mumukube.

7, 8. a) Mmunyi muvua Yehowa umona Yobo? b) Ntshinyi tshivua Satana muambe bua Yobo?

⁷ Yobo uvua nganyi? Uvua muntu muimpe uvua ne muoyo pa buloba apa kukadi bidi bitue ku 3600. Yehowa wakaleja ne: tshikondo atshi kakuvua muntu mukuabu uvua bu yeye pa buloba to. Yobo uvua unemeka Nzambi bikole ne  uvua mukine malu mabi. (Yobo 1:8) Eyowa, Yobo uvua mulunda wa Yehowa mulelela.

⁸ Satana wakamba muvua Yobo wenzela Nzambi mudimu bua kupeta bintu. Satana wakambila Yehowa ne: “Wewe kuena muele lupangu lua bukubi lumunyunguluke yeye ne nzubu wende ne bionso bidiye nabi anyi? Udi mubeneshe mudimu wa bianza biende, ne bimuna biende mbitangalake mu buloba. Kadi, bua kushintulula malu, olola tshianza tshiebe ne kuma bionso bidiye nabi, yeye neakudiule bushuwa ku mêsu kuebe.”—Yobo 1:10, 11.

9. Ntshinyi tshivua Yehowa muanyishile Satana bua kuenza?

⁹ Satana wakabanda Yobo muvuaye wenzela Yehowa mudimu anu bua bintu bivuaye mua kupetela kudiye. Satana wakamba kabidi muvuaye mua kufikisha Yobo ku dilekela kuenzela Yehowa mudimu. Yehowa kavua muitabe tshivua Satana muambe to, kadi wakamuanyishila bua atete Yobo bua kumona ni uvua mudie bulunda ne Yehowa bualu uvua mumunange.

10. Mmunyi muvua Satana muluishe Yobo? Yobo wakenza tshinyi?

¹⁰ Tshia kumpala, Satana wakiba anyi kubutula bimuna bia Yobo bionso. Pashishe Satana wakashipa bena mudimu ba Yobo ba bungi. Yobo wakajimija bintu biende bionso. Mu buluishi bua ndekelu, Satana wakashipa bana ba Yobo 10 ku tshipepele tshikole. Kadi Yobo wakashala ne lulamatu kudi Yehowa. Bible udi wamba ne: “Mu malu onso aa, Yobo kakenza mpekatu anyi kubanda Nzambi ne: udi wenza bualu bubi to.”—Yobo 1:12-19, 22.

11. a) Mbualu kayi bukuabu buvua Satana muenzele Yobo? b) Yobo wakenza tshinyi?

¹¹ Satana kakalekela to. Wakelesha Nzambi mpata wamba ne: “Kuma mufuba wende ne musunyi wende, yeye neakudiule bushuwa ku mêsu kuebe.” Ke Satana kutua Yobo disama dibi ditambe. (Yobo 2:5, 7) Musangu eu kabidi, Yobo wakashala ne lulamatu kudi Yehowa. Wakamba ne: “Too  ne pangafua, tshiakulekela muoyo wanyi mutoke to!”—Yobo 27:5.

12. Mmunyi muvua Yobo muleje ne: Satana uvua muena dishima?

¹² Yobo kavua mumanye bualu nansha bumue bua malu avua Satana mumubande nawu anyi bua tshinyi uvua ukenga bikole nunku to. Wakela meji ne: Yehowa ke uvua umukebela ntatu ivuaye nayi. (Yobo 6:4; 16:11-14) Kadi nansha nanku, Yobo wakashala ne lulamatu kudi Yehowa. Mpindieu kakuvua kabidi bualu bua kuelesha mpata to. Yobo kavua mulamate Nzambi bua bintu to. Uvua mulunda wa Nzambi bualu uvua mumunange. Malu onso avua Satana mumubande nawu avua a dishima!

13. Yobo wakapeta tshinyi bua lulamatu luende?

¹³ Nansha muvua Yobo kayi mumanye tshivua tshienzeka mu diulu, uvua ne lulamatu kudi Nzambi ne wakaleja ne: Satana uvua muntu mubi. Yehowa wakafuta Yobo bua muvuaye mulunda wa lulamatu.—Yobo 42:12-17.

14, 15. Mbualu kayi budi Satana ubanda nabu bantu bonso, balume ne bakaji?

¹⁴ Udi mua kupeta malongesha a bungi ku malu avua mafikile Yobo. Lelu, Satana udi utubanda mutudi tuenzela Yehowa mudimu bua bintu bitudi mua kupetela kudiye. Mu Yobo 2:4, Satana udi wamba ne: “Muntu neafile bionso bidiye nabi bua muoyo wende.” Nanku Satana udi ubanda bantu bonso, balume ne bakaji, mudibu benzela Nzambi mudimu bua kupeta bintu, kadi ki nganu Yobo to. Bidimu nkama ya bungi Yobo mumane kufua, Satana utshivua anu upenda Yehowa ne ubanda batendeledi bende. Tshilejilu, tudi tubala mu Nsumuinu 27:11 ne: “Muananyi, ikala ne meji, usankishe muoyo wanyi, bua mmone mua kuandamuna kudi yeye udi unnyobola [anyi umpenda].”

¹⁵ Udi mua kusungula bua kutumikila Yehowa ne kuikala mulunda wende wa lulamatu bua kuleja ne: Satana  mmuena dishima. Nansha bikalabi bikulomba bua kushintulula malu a bungi mu nsombelu webe bua kulua mulunda wa Nzambi, edi ke dipangadika ditambe buimpe diudi mua kuangata! Dipangadika edi mbualu bua mushinga mukole. Satana udi wamba ne: kuakushala ne lulamatu kudi Nzambi paudi upeta ntatu to. Udi ukeba kutushimakaja bua katuikadi ne lulamatu kudi Nzambi to. Mushindu kayi?

16. a) Mmayele kayi adi Satana wenza nawu mudimu bua kushimakaja bantu bua kabenzedi Yehowa mudimu? b) Mmunyi mudi Diabolo mua kukeba bua kukupangisha wewe bua kuenzela Yehowa mudimu?

¹⁶ Satana udi wenza mudimu ne mayele mashilashilangane bua kutupangisha bua kuikala balunda ba Nzambi. Udi utubunda “bu ntambue udi ukungula, ukeba bua kudia muntu.” (1 Petelo 5:8) Kabikukemeshi padi balunda bebe, bena mu dîku dienu anyi bantu bakuabu bakeba kukupangisha bua kulonga Bible ne bua kuenza malu mimpe to. Udi mua kudiumvua anu bu ne: badi bakuluisha. * (Yone 15:19, 20) Satana udi kabidi udivuija “bu muanjelu wa butoke.” Nunku udi mua kukeba bua kutushimakaja bua tubenge kutumikila Yehowa. (2 Kolinto 11:14) Diyele dikuabu didi Satana wenza nadi mudimu bua kutupangisha bua kuenzela Yehowa mudimu nkutufikisha ku diela meji ne: katuena bakumbane bua kuenzela Nzambi mudimu to.—Nsumuinu 24:10.

17. Bua tshinyi tudi tutumikila Yehowa?

¹⁷ Patudi tutumikila Yehowa, tudi tuleja mudi Satana muena dishima. Ntshinyi tshiatuambuluisha bua kumutumikila? Bible udi wamba ne: “Udi ne bua kunanga Yehowa  Nzambi webe ne muoyo webe wonso ne anyima webe yonso ne bukole buebe buonso.” (Dutelonome 6:5) Tudi tutumikila Yehowa bualu tudi bamunange. Padi dinanga ditudi nadi bua Yehowa dikola, netujinge bua kuenza bualu buonso budiye utulomba bua kuenza. Mupostolo Yone wakafunda ne: “Mona tshidi dinanga dia Nzambi diumvuija: bua tutumikile mikenji yende; pabi mikenji yende kayena ne bujitu.”—1 Yone 5:3.

18, 19. a) Ngamue malu kayi adi Yehowa wamba ne: mmabi? b) Mmunyi mutudi bamanye ne: Yehowa katu utulomba bua kuenza bualu butudi katuyi mua kukokesha?

¹⁸ Kadi ngamue malu kayi adi Yehowa utuambila ne: mmabi? Kudi amue a kudiwu mu kazubu ka ne: “ Kina malu adi Yehowa mukine.” Kumpala, udi mua kuela meji ne: amue a ku malu aa ki mmabi menemene to. Kadi paudi ubala mvese ya mu Bible ne welelanganapu meji bimpe, neujingulule ne: mbia meji bua kutumikila mikenji ya Yehowa. Udi kabidi mua kumona ne: bidi bikengela kushintulula  amue malu mu nsombelu webe. Nansha mudibi mua kuikala bikole imue misangu, wewe mushintulule malu aa, newikale ne ditalala ne disanka bidi bifumina ku dikala mulunda wa Nzambi wa lulamatu. (Yeshaya 48:17, 18) Mmunyi mutudi bamanye ne: kudi mushindu wa tuetu kushintuluka?

¹⁹ Yehowa katu utulomba bua kuenza bualu butudi katuyi mua kukokesha to. (Dutelonome 30:11-14) Bu mudiye Mulunda wetu mulelela, mmutumanye bimpe kupita ne mutudi badimanye. Mmumanye malu atudi tukokesha bua kuenza ne matekete etu. (Misambu 103:14) Mupostolo Paulo udi utukankamija ne: “Nzambi ngua lulamatu, ne kakulekela bua nutetshibue ne diteta dinudi kanuyi mua kutantamena, kadi mu diteta adi yeye nealongolole kabidi njila wa kupatukila, bua numone mua kunanukila mu diteta adi.” (1 Kolinto 10:13) Tuikale bashindike ne: Yehowa neikale anu utupesha bukole bua kuenza malu mimpe. Neakupeshe “bukole budi bupite bua pa tshibidilu” bua kukuambuluisha bua kunanukila mu nsombelu mikole. (2 Kolinto 4:7)  Paulo mumane kudimuenena muvua Yehowa mumuambuluishe mu bikondo bia nunku, wakamba ne: “Bua malu onso ndi ne bukole ku diambuluisha dia yeye udi umpesha bukole.”—Filipoyi 4:13.

20. Nngikadilu kayi iudi ne bua kuidikija? Bua tshinyi?

²⁰ Tuetu basue kulua balunda ba Yehowa, tudi ne bua kulekela kuenza malu adi Yehowa wamba ne: mmabi, kadi tudi ne bua kuenza malu makuabu kabidi. (Lomo 12:9) Balunda ba Nzambi mbanange malu adiye munange. Mbaleje malu aa mu Misambu 15:1-5. (Bala.) Balunda ba Yehowa badi bidikija ngikadilu yende ne baleja “dinanga, disanka, ditalala, lutulu, bulenga, buimpe, ditabuja, bupole, didikanda.”—Galatiya 5:22, 23.

21. Mmunyi muudi mua kufika ku dileja ngikadilu idi Nzambi munange?

²¹ Mmunyi muudi mua kufika ku dileja ngikadilu milenga eyi? Ikala ne tshibidilu tshia kubala Bible ne kumulonga bua ufike ku dimanya malu adi Yehowa munange. (Yeshaya 30:20, 21) Paudi wenza nunku, dinanga diudi nadi bua Yehowa nedikole, ne padi dinanga diebe edi dikola, neujinge bua kumutumikila.

22. Ntshinyi tshiwapeta wewe utumikila Yehowa?

²² Malu audi mua kujinga bua kushintulula mu nsombelu webe adi anu bu kuvula bilamba bia kale ne kuvuala bipiabipia. Bible udi utuambila ne: “Vulayi bumuntu bua kale” ne vualayi “bumuntu bupiabupia.” (Kolosayi 3:9, 10) Nansha mudibi kabiyi mua kuikala bipepele, patudi tuenza mashintuluka aa ne tutumikila Yehowa, udi ulaya bua kutupesha “difutu dinene.” (Misambu 19:11) Eyowa, sungula bua kutumikila Yehowa bua uleje ne: Satana mmuena dishima. Enzela Yehowa mudimu kabiyi bua difutu diudi muindile kumpala eku, kadi bualu udi mumunange ne muoyo mujima. Nunku neulue mulunda mulelela wa Nzambi!