KABIVUA mua kuikalaku bimpe bu muntu yonso muikale wenza anu malu mimpe anyi?​— Kadi kakuena muntu utu yeye wenza anu malu mimpe, kayi wenza malu mabi to. Udi mumanye bua tshinyi tuetu bonso tutu tuenza malu mabi imue misangu nansha patudi basue kuenza malu mimpe anyi?​— Bualu tuetu bonso tudi baledibue ne mpekatu. Kadi bantu bakuabu batu benza malu mabi menemene a bungi. Mbakine bantu nabu ne batu babenzela bibi ku makanda. Udi wela meji ne: badi mua kushintuluka ne kulonga mua kuikala bantu bimpe anyi?

Tangila nsongalume udi mulame bilamba bia bantu badi basa Stefano mabue aba. Dîna diende dia mu tshiena-Ebelu n’Shaula, kadi dia tshiena-Lomo m’Paulo. Udi ne disanka bualu badi bashipa Stefano, muyidi wa Mulongeshi Munene. Bua tshinyi Shaula udi wenza malu mabi a buena aa?

Shaula mmuena mu tshisumbu kampanda tshia malu a Nzambi tshidibu babikila ne: Bafalese. Bafalese mbamanye Dîyi dia Nzambi, kadi badi batamba kulonda malongesha a bamue bamfumu ba tshitendelelu tshiabu. Bualu ebu ke budi bufikisha Shaula ku dienza malu mabi.

Pavuabu bakuate Stefano mu Yelushalema, Shaula uvua muaba au. Bakaya ne Stefano ku kabadi kuvua balumbuluishi bakuabu bikale Bafalese. Nansha muvuabu bamuamba malu mabi, Stefano kavua utshina to. Wakakula diakamue ne dikima dionso ne kuyishaye balumbuluishi bikole pa bidi bitangila Yehowa Nzambi ne Yezu.

Kadi balumbuluishi abu kabavua basue malu avuabu bateleja au to. Bakavua bamanye malu a bungi a Yezu. Umanye ne: bavua bashipeshe Yezu anu matuku makese kumpala kua kukuatabu Stefano! Kadi Yehowa  wakabisha Yezu e kupinganaye mu diulu. Mpindieu, pamutu pa kushintululabu lungenyi luabu, balumbuluishi aba bavua buobu baluisha bayidi ba Yezu.

Balumbuluishi bakakuata Stefano ne kuya nende pambelu pa tshimenga. Bakamukuma bikole e kudishindaye panshi, bobu kumuasabu mabue. Anu muudi mumone mu tshimfuanyi etshi, Shaula mmuimane utangila. Udi wela meji ne: padibu bashipa Stefano badi benza bimpe.

Udi mumanye tshivua Shaula welela meji a nanku anyi?​— Munkatshi mua matuku a bungi Shaula uvua muikale Mufalese, nenku tshikondo atshi uvua wela meji ne: malongesha a Bafalese avua mimpe. Uvua wangata Bafalese bu tshilejilu, ke bualu kayi uvua ubidikija.​—Bienzedi 7:54-60.

Ntshinyi tshiakenza Shaula kunyima kua bamane kushipa Stefano?​— Wakakeba bua kushipesha bayidi ba Yezu bonso bavua bashale! Uvua ubuela mu nzubu yabu ne upatula bonso ne balume ne bakaji. Pashishe uvua ubelesha bonso mu buloko. Bayidi ba bungi bakumuka mu Yelushalema, kadi kabakalekela kuyisha bualu bua Yezu to.​—Bienzedi 8:1-4.

 Bualu ebu buakasaka Shaula bua kukina kabidi bayidi ba Yezu bikole. Nenku wakaya kudi Muakuidi Munene Kayifa bua kupeta dianyisha dia kuya kukuata bena Kristo ba mu tshimenga tshia Damaseke. Shaula uvua musue kulua nabu ku Yelushalema basuika nkanu bua kubakengesha. Kadi pavuaye mu njila mutangile ku Damaseke, tshintu tshia dikema tshiakenzeka.

Dinkenke diakafumina mu diulu, ne dîyi diamba ne: ‘Shaula, Shaula, udi unkengesha bua tshinyi?’ Yezu ke uvua wakuila mu diulu! Dinkenke adi divua ne butoke bua bungi, kuvuijadi ne Shaula mufofo, ne bantu bavua ne Shaula bavua ne tshia kumulombola too ne ku Damaseke.

Matuku asatu pashishe Yezu udi umuenekela muyidi wende umue wa ku Damaseke mu tshikena-kumona, dîna diende divua Anania. Yezu wakambila Anania bua kuya kumona Shaula bua kutabeja mêsu ende ne kuyikila nende. Pakayikila Anania nende, Shaula wakitaba bulelela bua Yezu. Lumonu luende luakapingana. Nsombelu wende mujima wakashintuluka ne kuluaye musadidi wa Nzambi wa lulamatu.​—Bienzedi 9:1-22.

Udi mumone mpindieu tshivua Shaula wenzela malu mabi anyi?​— Bualu bavua bamulongeshe malu a dishima. Uvua ulonda bantu bavua kabayi ne lulamatu kudi Nzambi. Ne uvua mu tshisumbu tshia bantu bavua bateka ngenyi ya bantu kumpala kua Dîyi dia Nzambi. Kadi bua tshinyi Shaula wakashintulula nsombelu wende ne kutuadijaye kuenza malu mimpe, nansha muvua Bafalese bakuabu batungunuka ne kuluisha Nzambi?​— Bualu Shaula kavua mukine bulelela menemene to. Nunku pakamulejabu bulelela, wakatuadija kubutumikila.

Udi mumanye ne: Shaula wakalua nganyi pashishe?​— Wakalua mupostolo Paulo, mupostolo wa Yezu. Vuluka kabidi ne: Paulo ke uvua mufunde mikanda ya bungi ya mu Bible.

Kudi bantu ba bungi badi mua kushintuluka bu Shaula. Kadi ki mbipepele to, bualu kudi muntu udi wenza muende muonso bua ne: bantu  benze anu malu mabi. Udi mumanye muntu au anyi?​— Yezu wakakula bualu buende pavuaye mumuenekele Shaula mu njila wa ku Damaseke. Kuine aku Yezu mu diulu wakakula ne Shaula wamba ne: ‘Ndi nkutuma kudi bisamba bia bende bua wewe kubulula mêsu abu, bele nyima ku midima batangile ku munya, bele nyima ku bukole bua Satana batangile kudi Nzambi.’​—Bienzedi 26:17, 18.

Bulelela, Satana Diabolo ke udi ukeba bua bantu bonso benze malu mabi. Utu umona misangu mikuabu bikukolela bua kuenza malu mimpe anyi?​— Bitu bitufikila nanku tuetu bonso. Satana udi ubivuija bikole. Kadi kudi bualu bukuabu budi buvuija kuenza malu mimpe bualu bukole. Udi mumanye bualu abu anyi?​— Mbua patudi baledibue bena mpekatu.

Mpekatu eu ke utu wenzeja misangu ya bungi bua bitupepelele bua kuenza malu mabi kupita malu mimpe. Nunku, ntshinyi tshitudi ne bua kuenza?​— Bushuwa, tudi ne bua kuluangana bua kuenza malu mimpe. Patudi tuenza nanku, tudi tushala bashindike ne: bu mudi Yezu mutunange neatuambuluishe.

Pavua Yezu pa buloba, wakaleja ne: uvua munange bantu bavua benza malu mabi kadi balue kushintuluka. Uvua mumanye muvuabi bibakolele bua kushintuluka. Tshilejilu, kuvua bakaji  bavua ne balume ba bungi. Bualu ebu buvua bubi. Bible udi ubikila bakaji ba nunku ne: bakaji ba ndumba.

Dituku dikuabu mukaji kampanda wa ndumba wakumvua bakula bua Yezu, nenku wakalua kuvuaye ku nzubu wa Mufalese kampanda. Wakapongolola manyi pa makasa a Yezu ne wakakupula binsonji biende bivua bimata pa makasa a Yezu ne nsuki yende. Uvua unyingalala bikole bua mpekatu yende, ke bualu kayi Yezu wakamufuila luse. Kadi Bafalese bavua bela meji ne: kabivua bikengela kumufuila luse to.​—Luka 7:36-50.

Udi mumanye tshivua Yezu muambile bamue Bafalese anyi?​— Wakabambila ne: “Bakaji ba ndumba nebadianjile kubuela mu Bukalenge bua Diulu kumpala kuenu.” (Matayo 21:31, MMM) Yezu wakamba nunku bualu bakaji ba ndumba bavua bamuitabuje ne bashintulule ngikadilu yabu mibi. Kadi Bafalese bavua batungunuke ne kuenzela bayidi ba Yezu bibi.

Nunku padi Bible uleja ne: tshitudi tuenza ntshibi, tudi ne bua kudiakaja bua kushintuluka. Ne patudi tulonga malu adi Yehowa musue ne: tuenze, tudi ne bua kuenza muetu muonso bua kuenza. Nanku Yehowa neasanke bua bualu buetu ne neatupeshe muoyo wa kashidi.