UDI mumanye disambila divua Yezu mulongeshe bayidi bende anyi?​— Wewe kuyi mudimanye, tudi mua kudibala pamue mu Bible, mu Matayo 6:9-13. Mu disambila edi didi ba bungi babikila ne: Disambila dia Tatu wetu, mudi miaku eyi: ‘Bukalenge buebe bulue.’ Udi mumanye tshidi Bukalenge bua Nzambi anyi?​—

Teleja bimpe, mukalenge mmukokeshi wa ditunga kampanda. Ne mbulamatadi wende badi bamubikila ne: bukalenge. Mu amue matunga, muntu udi ku mutu kua mbulamatadi badi bamubikila ne mfumu wa ditunga. Mmushindu kayi udibu babikila mukokeshi wa mbulamatadi wa Nzambi?​— Badi bamubikila ne: Mukalenge. Ke bualu kayi badi babikila mbulamatadi wa Nzambi ne: Bukalenge.

Udi mumanye udi Yehowa Nzambi musungule bua kuikalaye Mukalenge wa mbulamatadi Wende anyi?​— Mmusungule Muanende Yezu Kristo. Bua tshinyi Yezu mmupite mukokeshi kayi yonso udi bantu mua  kusungula?​— Bualu Yezu mmunange Tatuende Yehowa bulelela. Nunku udi wenza misangu yonso malu adi makane.

Kale bangabanga ne Yezu kuledibuaye ku Beteleheme, Bible wakakula bua diledibua diende ne wakamba ne: uvua ne bua kulua Mukokeshi musungula kudi Nzambi. Tuanji tubale bualu ebu mu Yeshaya 9:6, 7. Udi wamba ne: ‘Bualu bua bakutulelela muana, bakutupa muana mulume; bukokeshi nebuikale pa diapa diende. Nebamuinyike dîna ne: Mukalenge wa ditalala. Kuvudija kua bukokeshi buende ne kua ditalala kakuena kuikala ne nshikidilu.’

Muaba eu badi babikila Yezu muikale mukokeshi wa Bukalenge bua Nzambi ne: “Mukalenge.” Udi kabidi Muana wa Mukalenge Munene Yehowa. Kadi Yehowa mmuteke kabidi Yezu Mukalenge wa mbulamatadi Wende, wikala mua kukokesha pa buloba munkatshi mua bidimu tshinunu. (Buakabuluibua 20:6) Kunyima kua Yezu mumane kutambula, wakatuadija ‘kulongesha bantu, ubambila ne: “Kudimunayi mioyo yenu, bualu Bukalenge bua Diulu bukadi pabuipi.’”—Matayo 4:17, MMM.

Buebe wewe, bua tshinyi Yezu uvua wamba ne: Bukalenge bukadi pabuipi?​— Bualu Mukalenge uvua ne bua kukokesha pashishe mu diulu uvua munkatshi muabu! Ke bualu kayi Yezu wakambila bantu ne: “Bukalenge bua [Nzambi] budi munkatshi muenu.” (Luka 17:21, MMM) Kuenaku mua kujinga bua kuikala pabuipi nunku ne Mukalenge udi Yehowa muteke ne kumulenga too ne kumulenga anyi?​—

Ngambilabi tumone, mmudimu kayi wa mushinga mukole uvua Yezu muluile bua kuenza pa buloba?​— Yezu wakandamuna lukonko alu, wamba ne: ‘Ndi ne bua kumanyisha [lumu luimpe lua] bukalenge bua [Nzambi] mu bimenga bikuabu kabidi, bualu ke tshidibu bantumine.’ (Luka 4:43, MMM) Yezu uvua mumanye bimpe ne: kavua mua kuenza mudimu onso wa buambi nkayende to. Nunku, udi wela meji ne: wakenza tshinyi?​—

Yezu wakaya ne bantu ne wakabaleja mushindu wa kuenza mudimu wa kuyisha. Bantu ba kumpala bavuaye  mulongeshe bavua bantu 12 bakasungulaye bu bapostolo bende. (Matayo 10:5, 7) Kadi Yezu uvua mulongeshe anu bapostolo bende mushindu wa kuenza mudimu anyi? Tòo, Bible udi wamba ne: Yezu wakalongesha kabidi bantu bakuabu ba bungi mua kuyisha. Mu tshikondo kampanda, wakatuma bayidi 70 babidi babidi. Ntshinyi tshivuabu balongeshe bantu?​— Yezu wakamba ne: ‘Nubambile ne: ‘Bukalenge bua Nzambi buakulua pabuipi nenu.’’ (Luka 10:9) Mushindu eu bantu bakamanya mianda idi itangila mbulamatadi wa Nzambi.

Kale mu Isalele, bakalenge bapiabapia bavua ne tshibidilu tshia kuendakana mu tshimenga babande pa muana wa nyama wa mpunda bua kudileja kudi bantu. Ke tshidi Yezu wenza padiye ulua mu Yelushalema bua musangu wa ndekelu. Udi mumone, Yezu nealue Mukokeshi wa Bukalenge bua Nzambi. Bantu mbamuitabe bua kuikalaye Mukalenge anyi?​—

Nunku, padiye wenda unyunguluka apu, bantu ba bungi mu musumba badi batuadija kuadija bilamba biabu bia pa mutu mu njila kumpala kuende. Bakuabu badi bakosa matamba a mitshi ne baateka mu njila. Padibu benza nunku badi baleja ne: mbanyishe bua Yezu ikale Mukalenge wabu. Badi bela mbila ne: ‘Mukalenge udi ulua mu dîna dia Nzambi atumbishibue!’ Kadi ki mbantu bonso badi ne disanka to. Bamue bamfumu ba bitendelelu badi bafika too ne ku diambila Yezu ne: ‘Ambila bayidi bebe bapuwe.’​—Luka 19:28-40.

Matuku atanu kunyima badi bakuata Yezu ne baya nende kumpala kua ngovena Pontio Pilato. Baluishi ba Yezu badi bamba ne: Yezu udi udiamba mudiye mukalenge, ne se: udi uluisha mbulamatadi wa bena Lomo. Nunku Pilato udi webeja Yezu bualu ebu. Yezu udi umuambila ne: kêna ujinga kuangata nkuasa mu mbulamatadi au to. Udi wambila Pilato ne: ‘Bukalenge buanyi kabuena bua pa buloba ebu.’​—Yone 18:36.

Pashishe Pilato udi uya pambelu ne wambila bantu ne: kêna musangane Yezu ne bualu bubi to. Kadi bantu buobu ki mbasue Yezu alue Mukalenge wabu to. Ki mbasue ne: bamulekele to. (Yone 18:37-40) Kunyima kua yeye mumane kuyukila kabidi ne Yezu, Pilato udi utuishibua ne: Yezu ki mmuenze bualu bubi nansha bumue. Ndekelu wa bionso, padiye  upatula Yezu pambelu bua musangu wa ndekelu, Pilato udi wamba ne: ‘Monayi Mukalenge wenu!’ Kadi bantu badi bela mbila ne: ‘Umumushe, umumushe, umushipe ku mutshi!’

Pilato udi ukonka ne: ‘Nshipe Mukalenge wenu anyi?’ Bakuidi banene badi bandamuna ne: ‘Katuena ne mukalenge mukuabu, anu Kaisa.’ Anji elabi meji bua bualu bua mushindu au! Bakuidi ba muoyo mubi abu bavua basake bantu bua babenge Yezu!​—Yone 19:1-16.

Lelu’eu, nsombelu ki mmushilangane ne wa mu tshikondo tshia Yezu to. Bantu ba bungi ki mbasue ne: Yezu alue Mukalenge wabu to. Badi mua kuamba ne: badi bitabuja Nzambi, kadi ki mbasue Nzambi anyi Kristo babambile  tshia kuenza to. Mbasue mbulamatadi yabu nkayabu idi anu pa buloba apa.

Tuetu tudi ne meji kayi? Patudi tulonga malu adi atangila Bukalenge bua Nzambi ne malu onso a dikema ikalabu ne bua kuenza, bidi bitufikisha ku didiumvua munyi kumpala kua Nzambi?​— Tudi tumunanga, ki mmuomu anyi?​— Mmushindu kayi mpindieu utudi mua kuleja Nzambi ne: tudi bamunange, ne se: tudi basue Bukalenge buende butukokeshe?​—

Tudi mua kuleja mutudi tumvua patudi tulonda tshilejilu tshia Yezu. Kadi ntshinyi tshivua Yezu muenze bua kuleja ne: uvua munange Yehowa?​— Yezu wakumvuija ne: “Matuku onso ntu ngenza malu adi amusankisha.” (Yone 8:29) Eyowa, Yezu uvua mulue pa buloba ‘bua kuenza disua dia Nzambi’ ne ‘bua kujikija mudimu wende.’ (Ebelu 10:7; Yone 4:34) Tangila tshivua Yezu muenze kumpala kua kutuadijaye mudimu wende wa buambi.

Yezu wakapueka kudi Yone Mubatiji ku musulu wa Yadene. Bamane kuenda mu mâyi, Yone wakina Yezu mujima mu mâyi ne pashishe yeye kumujula kuulu. Udi mumanye bua tshinyi Yone uvua mutambuishe Yezu anyi?​—

Yezu wakalomba Yone bua amutambuishe. Kadi ntshinyi tshidi tshileja ne: Nzambi uvua musue bua Yezu atambule?​— Tshidi tshileja  nanku mbualu pakapatuka Yezu mu mâyi, wakumvua dîyi dia Nzambi diumukila mu diulu diamba ne: “Wewe udi Muana wanyi munanga, wewe udi unsankisha bimpe.” Nzambi wakatuma nyuma wende muimpe bu nyunyu wa nkutshi upueka pamutu wa Yezu. Nunku pakatambula Yezu, wakaleja ne: uvua musue kuenzela Yehowa mudimu matuku ende onso a muoyo, eyowa, kumuenzelawu bua kashidi.​—Mâko 1:9-11.

Mpindieu wewe utshidi muana. Kadi newenze tshinyi pawakola?​— Newikale bu Yezu ne neutambule anyi?​— Udi ne bua kulonda tshilejilu tshiende, bualu Bible udi wamba ne: uvua mukushile ‘tshilejilu bua wewe umulonde mu makasa ende.’ (1 Petelo 2:21) Wewe mutambule, neuleje ne: udi musue bua Bukalenge bua Nzambi bukukokeshe. Kadi kutambula ki nkukumbane nkayaku to.

Bidi bikengela tutumikile malu onso avua Yezu mulongeshe. Yezu wakamba ne: katuena ne bua kuikala ‘ba pa buloba.’ Netuikale tumutumikila bituikala tuenza malu a bena pa buloba anyi? Yezu ne bapostolo bende kabavua babuelakana mu malu aa to. (Yone 17:14) Kadi bakenza tshinyi?​— Bakambila bantu bakuabu bualu bua Bukalenge bua Nzambi. Au ke uvua mudimu munene mu nsombelu wabu. Tudi petu mua kuwenza anyi?​— Eyowa, netuwenze patudi tusambila ne muoyo mujima bua Bukalenge bua Nzambi bulue.