MBANTU bungi kayi batuvua bamone mu nshapita ibidi mishale bavuabu babishe ku lufu?​— Bavua batanu. Kadi bana?​— Bavua basatu. Ne muinayi uvua nsongalume. Udi wela meji ne: bualu ebu budi buleja tshinyi?​—

Budi buleja ne: Nzambi mmunange bana ne bansonga. Kadi, neabishe kabidi bantu bakuabu ba bungi. Nzambi neabishe anu bantu bavua benze malu mimpe anyi?​— Tudi mua kuela meji nanku. Pabi, bantu ba bungi kabavuaku balonge bulelela budi butangila Yehowa Nzambi ne Muanende nansha. Nanku bakenza malu mabi bualu bavua babalongeshe malu a dishima. Udi wela meji ne: Yehowa neabisheku bantu ba nanku anyi?​—

Bible udi wamba ne: ‘Dibika dia bafue nedikaleku, ne dia bakane ne dia babi.’ (Bienzedi 24:15) Bua tshinyi nebabishe bantu bavua kabayi bakane, anyi bavua kabayi benza malu mimpe?​— Bualu kabavuaku bapete mushindu wa kulonga malu adi atangila Yehowa ne malu adiye ulomba bantu bua kuenza to.

 Udi wela meji ne: bantu nebabishibue ku lufu dîba kayi?​— Elabi meji dîba divua Lazalo mufue ne Yezu kulaya yayende Mâta ne: “Muanenu neabike kabidi.” Mâta wakandamuna ne: ‘Ndi mumanye ne: yeye neabike dituku dia ku nshikidilu.’ (Yone 11:23, 24) Mâta uvua musue kumvuija tshinyi pavuaye muambe ne: Lazalo neabike “dituku dia ku nshikidilu”?​—

Mâta uvua mumvue dilaya dia Yezu dia ne: ‘Badi mu nkita nebajuke.’ (Yone 5:28, 29) Nunku “dituku dia ku nshikidilu” ng’edi dikala bantu bonso badi Nzambi muvuluke ne bua kubishibua. Dituku dia ku nshikidilu edi ki ndituku dia mêba 24 nansha. Nedikale dituku dia bidimu tshinunu. Bible udi wamba ne: mu dituku adi ‘Nzambi nealumbuluishe ba pa buloba.’ Mu bantu bikalaye ne bua kulumbuluisha nemuikale aba bavua babishibue ku lufu.​—Bienzedi 17:31; 2 Petelo 3:8.

Elabi meji muikaladi dituku dia disanka dia dikema! Munkatshi mua dituku edi dia bidimu tshinunu, bantu miliyo ya bungi bavua bafue nebapete muoyo tshiakabidi. Yezu udi ubikila muaba wikalabu mua kupetela muoyo tshiakabidi ne: Mparadizu. Tumonebi mpindieu muaba wikala Mparadizu ne mushindu wikalaye.

Mêba matue ku asatu kumpala kua Yezu kufua pa mutshi wa tshinyongopelu, wakakula bua Mparadizu ne muntu mukuabu uvua pa mutshi ku luseke luende. Bavua bashipa muntu au bua malu mabi avuaye muenze. Kadi pakatangila muenji wa malu mabi eu Yezu ne kumvua malu avuabu bakula pa bivua bimutangila, wakatuadija kuitabuja  Yezu. Nunku wakamba ne: ‘Pawabuela mu bukalenge buebe, umvuluke.’ Yezu kuandamunaye ne: ‘Bulelela ndi nkuambila [lelu] ne: newikale nanyi mu Mparadizu.’​—Luka 23:42, 43.

Yezu udi usua kuamba tshinyi muaba eu? Mparadizu udi penyi?​— Elabi meji. Mparadizu wa ntuadijilu uvua penyi?​— Vuluka ne: Nzambi wakapesha mulume wa kumpala Adama ne mukajende mparadizu panu pa buloba ebu bua basombelemu. Bavua bamubikila ne: budimi bua Edene. Mu budimi amu muvua nyama, kadi kayivua yenzela muntu bibi to. Ne muvua kabidi mitshi ya bimuma bia bungi bisheme ne musulu munene. Uvua muaba muimpe be wa kusombela!​—Genese 2:8-10

Nenku patudi tubala bualu bua muenji wa bubi au muikalaye mu Mparadizu, tudi tufuanyikija mu lungenyi luetu buloba ebu bulue muaba mulengele wa kusombela. Yezu neikale panu pa buloba pamue ne muenji wa malu mabi au wa kale mu Mparadizu anyi?​— Tòo. Udi mumanye bua tshinyi kakuikala panuapa anyi?​—

Bualu Yezu neikale mu diulu ukokesha bu Mukalenge pa buloba bua Mparadizu. Nenku, Yezu neikale ne muntu au mu mushindu wa se: neamubishe ku bafue ne neakumbaje majinga ende onso. Kadi bua tshinyi Yezu nealekele muenji wa bubi wa kale au bua asombe mu Mparadizu?​— Tuanji kumona ni tuapeta diandamuna.

Kumpala kua muenji au wa malu mabi kuyikila ne Yezu, uvuaku mumanye dijinga dia Nzambi anyi?​— Tòo, kavua mudimanye  to. Wakenza malu mabi bualu kavua mumanye bulelela pa bidi bitangila Nzambi to. Nebamulongeshe dijinga dia Nzambi mu Mparadizu. Nenku, neapete mushindu wa kuleja ne: mmunange Nzambi bulelela pa kuenza disua Diende.

Bantu bonso bikala ne bua kubishibua ku lufu nebasombe mu Mparadizu pa buloba anyi?​— Tòo. Udi mumanye bua tshinyi bonso kabakusombamu anyi?​— Bualu bakuabu nebabishibue ku lufu bua kusomba ne Yezu mu diulu. Nebakokeshe pamue nende bu bakalenge pa buloba bukudimuna Mparadizu. Tumone mpindieu mutudi bamanye bualu ebu.

Butuku bua kumpala kua Yezu kufua, wakambila bapostolo bende ne: ‘Mu nzubu wa Tatu wanyi mudi miaba ya bungi ya kuikala; nenye kunulongoluela muaba.’ Pashishe Yezu wakabalaya ne: ‘Nempingane kabidi, nennuangate kundi meme muine, bua kundi ngikala, nuenu nenuikaleku kabidi.’​—Yone 14:2, 3.

 Yezu udi uya kuepi kunyima kua dibishibua diende?​— Udi upingana mu diulu kudi Tatuende. (Yone 17:4, 5) Nenku Yezu udi ulaya bapostolo bende ne bamue bayidi bakuabu ne: neababishe ku lufu bua bikale nende mu diulu. Nebenze tshinyi muine mu diulu amu ne Yezu?​— Bible udi wamba ne: bayidi bende bikala mu “dibika dia lufu dia kumudilu” nebasombele mu diulu ne nebakokeshe ‘nende bidimu tshinunu’ pa buloba.​—Buakabuluibua 5:10; 20:6; 2 Timote 2:12.

Mbantu bungi munyi bikala mu “dibika dia lufu dia kumudilu” ne bikala ne bua kukokesha ne Yezu bu bakalenge?​— Yezu wakambila bayidi bende ne: ‘Nuenu tshisumbu tshikese tshia mikoko, kanutshinyi; bua Tatu wenu mmusue kunupa bukalenge.’ (Luka 12:32) Bantu badi benza “tshisumbu tshikese” etshi, badi babishibua ku lufu bua kuikala ne Yezu mu Bukalenge buende mu diulu, badi bungi kampanda bujadika. Bible udi uleja ne: bantu “binunu lukama makumi anayi ne binayi.” Nebabishibue pa buloba bua kuya mu diulu.​—Buakabuluibua 14:1, 3, MMM.

Mbantu bungi munyi bikala mua kusomba mu Mparadizu wa pa buloba eu?​— Bible ki muambe bungi buabu to. Kadi Nzambi wakambila Adama ne Eva pavuabu mu budimi bua Edene bua kulelabu bana ne kuuja buloba. Bushuwa, bakapangila bua kuenza nunku. Kadi Nzambi neenze bua dijinga diende dia ne: buloba buwule tente ne bantu bimpe dikumbane.​—Genese 1:28; Yeshaya 45:18; 55:11.

Anji elabi meji muikalabi bilenga bua kusomba mu Mparadizu! Buloba bujima nebuikale anu bu budimi bulengele. Nemuikale nyunyu ya bungi ne nyama ne mulengeja ne mitshi ne bilongo bia mishindu yonso. Muntu nansha umue kakuikala udinyenga bualu udi usama, anyi kakuakuikala muntu ufua to. Muntu yonso neikale mulunda wa muntu yonso. Tuetu basue kusomba mu Mparadizu bua kashidi, ke dîba dia kudilongolola edi.