YEHOWA utu wenza misangu mikuabu malu a dikema bua kulama anyi kukuba bana ne bakuabu bantu badi kabayi ne mushindu wa kudikuba buobu nkayabu. Wewe muye kuendakana mu tshisuku, udi mua kumona mushindu utu Yehowa wenza nunku eu. Kadi kumpala kuena mua kuanji kumvua menemene tshidi tshienda tshienzeka to.

Udi umona nyunyu panshi pabuipi nebe. Nyunyu eu udi umueneka bu mutapike. Udi ukoka dipuapua dimue panshi ne unyema paudi uteta bua kusemena papuipi nende. Paudi wenda ulonda nyunyu au, udi uya anu kumpala kakuyi mushindu wa kumukuata to. Pashishe nyunyu udi ubuka diakamue. Kavua nansha ne mputa ku dipuapua diende adi to! Udi mumanye tshivua nyunyu au wenza anyi?​—

Kutshiambi, pabuipi ne muaba uvua nyunyu au muikile panshi ku luseke luebe, uvua musokoke tuana tuende mu tshisuku. Mamuende wa tuana tua nyunyu etu uvua utshina bua kulu kupeta tunyunyu atu ne kutuenzela bibi. Ke bualu kayi uvua wenza anu bu se: mmutapike mputa bua kusemenyi kudi tuana tuende to. Udi mumanye muntu udi mua kutukuba anu bu mutu nyunyu wenza ne tuana tuende anyi?​— Badi bafuanyikija Yehowa mu Bible ne nyunyu udibu babikila ne: mukanku, utu wambuluisha tuana tuende.​—Dutelonome 32:11, 12.

 Muana wa Yehowa wa mushinga wa bungi udiye munanga bikole eu n’Yezu. Pavua Yezu mu diulu, uvua muntu wa bukole wa mu nyuma bu Tatuende. Uvua mua kudikuba nkayende. Kadi pakaledibuaye pa buloba, kavua ne bukole bu kumpala to. Bivua bilomba bua bamukube.

Bua kukumbaja tshivua Nzambi musue buende yeye pa buloba, Yezu uvua ne bua kukola kulua muntu mukulumpe mupuangane. Kadi Satana wakakeba bua kushipa Yezu kumpala kua kukolaye. Muyiki wa mushindu uvuabu bakeba kushipa Yezu patshivuaye muana mutekete ne kabidi mushindu uvua Yehowa mumukube mmuyiki mulenga be. Udi musue kuuteleja anyi?​—

Matuku makese panyima pa diledibua dia Yezu, Satana wakapatuisha tshintu tshivua tshimueneka bu mutoto bua kukenkatshi mu diulu lua ku luseke lutu dîba dipatukila. Bantu batu babuka malu ku diambuluisha dia mitoto ya muulu bakalonda mutoto au mutantshi wa kilometre nkama ya bungi too ne ku Yelushalema. Buobu kuebeja muaba uvua muntu uvua ne bua kulua mukalenge wa bena Yuda ne bua kuledibua. Pakebejabu bantu bavua bamanye tshidi Bible wamba pa bualu abu, bakandamuna ne: “Mu Beteleheme.”​—Matayo 2:1-6.

 Pakumvua Helode, mukalenge wa muoyo mubi wa mu Yelushalema ne: bavua bafumina ku dilelela mukalenge mupiamupia mu tshimenga tshia Beteleheme tshivua katshiyi mutantshi mule, wakambila bena lubuku lua mitoto abu ne: ‘Ndayi nukonke bimpe bua muana. Panuamusangana, nummanyishe.’ Udi mumanye tshivua Helode ukebela bua kumanya muaba uvua Yezu anyi?​— Bualu uvua ne mukawu ne kabidi uvua ukeba bua kushipa Yezu!

Nzambi udi wenza tshinyi bua kukuba Muanende?​— Bena lubuku lua mitoto aba bakapeta Yezu, bakamulambula milambu. Pashishe, Nzambi kuloteshaye bena lubuku lua mitoto abu ubadimuija bua kabapinganyi kudi Helode. Nunku badi bapinganyina kuabu mu njila mukuabu kabayi balukidila kabidi mu Yelushalema to. Pakamanya Helode ne: bena lubuku lua mitoto bakavua baye, wakumvua tshiji tshikole. Bua kufika ku dishipa Yezu, Helode wakashipesha bana bonso batekete ba balume ba ku Beteleheme bavua ne bidimu muinshi mua bibidi! Kadi pine apu, Yezu katshivua kabidi muaba au to.

Udi mumanye muvua Yezu mupanduke anyi?​— Pavua bena lubuku lua mitoto bumuke muaba eu bapingane kuabu, Yehowa wakamanyisha Yozefe bayende wa Mariya bua kujuka ne kunyemena kule mu Ejipitu. Kuine aku Yezu wakapanduka mu bianza bia Helode, muntu wa muoyo mubi. Pakapita bidimu, ne pakapingana Mariya ne Yozefe bafumina mu Ejipitu ne Yezu, Nzambi wakambila Yozefe bualu bukuabu. Wakamuambila mu tshilota bua kuyaye ku Nazaleta, kuvua Yezu ne bua kukolela bimpe kakuyi uvua mua kumuenzela bibi.​—Matayo 2:7-23.

Udi mumone mushindu uvua Yehowa mukuba Muanende anyi?​— Nnganyi uudi mua kuamba ne: udi bu tuana tua nyunyu tusokoka kudi mamuatu mu tshisuku peshi udi bu Yezu patshivuaye muana mutekete?  Wewe si udi bu buobu, ki mmomu anyi? Kudi bantu badi basue kukuenzela bibi. Udi mubamanye anyi?​—

Bible udi wamba ne: Satana udi bu nyama wa ntambue udi ukungula ukeba mua kutudia. Nenku anu mutu nyama ya ntambue ikuata tuana tua nyama, ke mutu Satana ne bademon bende bakuata bana misangu ya bungi. (1 Petelo 5:8) Kadi Yehowa udi ne bukole kupita Satana. Yehowa udi mua kukuba bana bende anyi kumbusha malu mabi onso adi Satana mua kubenzela.

Utshidi muvuluke tshituvua bamone mu nshapita wa 10 wa mukanda eu bua malu adi Diabolo ne bademon bende bakeba bua tuetu kuenza anyi?​— Badi bakeba bua kutufikisha ku dienza malu a busenji pabi bikale bualu budi Nzambi kayi musue to. Kadi anu mbanganyi badi mua kusangila mushindu eu?​— Anu bantu bakole babidi mulume ne mukaji badi baselangane.

Kadi bia dibungama, bamue bantu bakulumpe batu basue kuangatangana ne bana batekete. Padibu benza nunku, bana ba balume ne ba bakaji badi mua kubanga kuenza malu mabi a bundu adibu balongele kudi bantu bakulumpe aba. Badi kabidi batuadija kuenza mudimu ne butaka buabu mu mushindu mubi. Ke tshivua tshienzeke kale mu tshimenga tshia Sodoma. Bible udi wamba ne: bantu ba mu Sodoma, ‘ne bansongalume ne bantu banunu’ bakakeba bua kusangila ne balume bavua balue kutangila Lota.​—Genese 19:4, 5.

Nunku, anu bu muvuabi bikengela kukuba Yezu, bidi bikengela kukukuba wewe pebe kudi bantu bakulumpe, nansha kudi bakuabu bana badi mua kukeba bua nuenu kuenzangana nabu malu a busenji. Pa tshibidilu bantu ba nanku batu badileja mudibu balunda. Badi nansha mua kukupesha tshintu kampanda bu wewe mua kubalaya ne: kuakuambila muntu bualu budibu basue kuenza nebe ebu to. Kadi bantu aba mbasue kuenza malu au anu bua disanka diabu nkayabu anu bu mudi Satana ne bademon bende bakeba, bualu mbasue kudisankisha pabu anu buobu nkayabu. Ne bantu abu mbasue kudisankisha nunku pa kukeba bua kuenza malu a busenji ne bana batekete. Ebu si mbualu bubi bua dikema be!

Udi mumanye tshidibu mua kuenza bua kudisankishabu nunku anyi?​— Badi mua kukeba bua kulenga ku butaka buebe. Anyi badi nansha mua kutua  butaka buabu ku buebe. Kadi kuitabi bua muntu nansha umue kunayaye ne butaka buebe nansha. Kuitabi, kuitabi nansha muntu au yeye muikale muanenu wa balume, muanenu wa bakaji anyi mamuebe peshi tatuebe nansha bia munyi. Bitupa ebi bia mubidi webe mbiebe wewe nkayebe.

Mmushindu kayi uudi mua kukuba mubidi webe kudi bantu badi benza malu mabi a nunku?​— Tshia kumpala, kulekedi muntu nansha umue unaya ne butaka buebe to. Bikala muntu uteta mua kunaya ne butaka buebe nunku, umuambile ne dîyi dikole kuyi utshina ne: “Lekela, lekela biudi wenza abi! Tshianana ndi nya kukufunda!” Kadi muntu au yeye mukuambile ne: nebakutandishe bua tshidi tshienzeke atshi, kumuitabi to. Ki mmuomu nansha. Wewe ndaku umufunde nansha yeye muikale nganyi! Udi ne bua kumufunda nansha yeye mukuambile ne: tshinudi nuenza nende atshi muntu mukuabu kakutshimanya to anu nuenu babidi. Nansha yeye mukulaye bua kukupesha bintu bilenga anyi nansha yeye mukukanyine, udi ne bua kumunyema ne kuya kumufunda.

Kuena ne bua kumvua buôwa to, kadi bidi bikengela kuikala mudimuke. Udi ne bua kuteleja baledi bebe padibu bakupesha mibelu bua kuepuka bantu anyi kubenga kuya miaba idi mua kukukebela njiwu. Wewe muteleje, muntu mubi kakupeta mushindu wa kukuenzela bibi to.