UDIKU mumanye muntu utu yeye musue kuikala anu wa kumpala misangu yonso anyi?​— Udi nansha mua kusakila mukuende anu bua ne: yeye ikale muntu wa kumpala mu mulongo. Ukadiku mumone bualu bua nunku anyi?​— Mulongeshi Munene wakamona too ne bantu bakulumpe bafuila bua kuikala pa miaba ya kumpala peshi miaba minene. Kakasanka bua bualu abu to. Tumonayi tshiakenzeka.

Badi batulondela mu Bible ne: bakabikila Yezu ku difesto kampanda ku nzubu wa Mufalese kansanga uvua muikale muntu munene mu malu a ntendelelu wabu. Pakavua Yezu mumane kufikaku, wakatuadija kutangila muvua bantu bakuabu bavuabu babikile ku difesto adi babuela ne basungula miaba anu ya mimpe menemene. Nanku wakalondela bavuabu babikile ku difesto adi muyiki. Udi musue kuuteleja anyi?​—

 Yezu wakamba ne: ‘Padi muntu ukubikila mu difesto dia dibaka, kusombi pa muaba wa kumpala, anyi muaba wa munene.’ Udi mumanye tshivua Yezu muambile nanku anyi?​— Wakumvuija ne: badi mua kuikala babikile muntu mukuabu udi mukupite wewe. Nanku anu muudi mumone mu tshimfuanyi etshi, muntu udi wenzeja difesto udi ulua wamba ne: ‘Juka ushile muntu eu muaba, wewe uye kuaka.’ Muntu udibu babikile au neadiumvue munyi?​— Neumvue bundu bualu bantu bakuabu bonso nebamutangile mudiye uya bua kusomba pa muaba mushadile.

Yezu uvua uleja ne: ki mbimpe kukeba miaba minene to. Nanku kuambaye ne: ‘Padibu bakubikila mu difesto dia dibaka, uye kusomba muaba wa ndekelu. Nenku pafika uvua mukubikile, akuambe ne: ‘Mulunda [wanyi], bandila kumpala.’ Dîba adi newikale ne lumu ku mêsu a bonso banudi nabu muine amu.’​—Luka 14:1, 7-11, MMM.

Udiku mumvue lungenyi lunene luvua Yezu musue kuleja mu muyuki wende eu anyi?​— Tuanji kuangata tshilejilu bua kumona ni udi mumvue. Elabi meji ne: udi ubuela mu bise muwule tente ne bantu. Neufuilakane bua kuya kusomba ulekela muntu mukulumpe muimane kuulu anyi?​— Yezu udi mua kuanyisha wewe muenze bualu bua mushindu au anyi?​—

Muntu mukuabu udi mua kuamba ne: malu atudi tuenza kaena atangila Yezu to. Kadi wewe udi pebe witaba bualu ebu anyi?​— Pavua Yezu muye ku difesto dinene adi ku nzubu wa Mufalese, uvua utangila bantu mushindu uvuabu basungula miaba ya kusomba. Kuenaku umona ne: nansha lelu’eu kabidi udi utangila bitudi tuenza anyi?​— Mpindieu udi Yezu muikale mu diulu, udi ne mushindu menemene wa kutangila bionso bitudi tuenza.

Padi muntu ufuila bua kuikala anu kumpala, bidi mua kukeba bilumbu. Misangu ya bungi dikokangana ditu dituadija ne bantu bafika  munda. Imue misangu bualu ebu butu buenzeka padi bana baya bua kubuela mu bise pamue. Padibu anu bunzulula bibi bia ku bise, bana badi bafuilakana bua kupeta miaba ya kumpala. Batu basue miaba ya mimpe, miaba idi pabuipi ne madidishi. Ntshinyi tshidi mua kuenzeka pashishe?​— Badi mua kufikilangana munda.

Dikeba kuikala kumpala didi mua kujula bilumbu bia bungi. Diakajula bilumbu nansha munkatshi mua bapostolo ba Yezu kabidi. Anu bu mutuvua bamone mu Nshapita 6 wa mukanda eu, bakakokangana munkatshi muabu bua kumanya udi mutambe bakuabu. Ntshinyi tshiakenza Yezu?​— Wakababela. Kadi kunyima kua matuku bakakokangana kabidi. Tumonayi muvuabi bituadije.

Bapostolo ne bantu bakuabu bavua mu luendu pamue ne Yezu bua musangu wa ndekelu batangile ku tshimenga tshia Yelushalema. Yezu uvua wenda ubalondela malu adi atangila Bukalenge buende, nanku Yakobo ne Yone bavua bakeba bua kuikalabu pabu bakalenge. Bavua bambile too  ne mamuabu Salome bualu abu. (Matayo 27:56; Mâko 15:40) Pavuabu mu njila batangile ku Yelushalema apu, Salome udi uya kudi Yezu, utua binu kumpala kuende ulomba bua kuyikilaye nende.

Yezu kumuebejaye ne: “Udi musue tshinyi?” Mamu kuandamunaye ne: uvua musue bua Yezu angate bana bende basombe ku luseke luende mu Bukalenge buende, umue ku dia balume ne mukuabu ku dia bakaji. Kadi pakalua bapostolo bakuabu dikumi abu kumvua bualu buvua Yakobo ne Yone batume mamuabu bua kulombaye, udi wela meji ne: bakumvua tshinyi?​—

Bushuwa bakafikila Yakobo ne Yone tshiji tshikole. Nanku Yezu wakapesha bapostolo bende bonso imue mibelu mimpe. Yezu wakabambila ne: bamfumu ba bantu batu basue bikole kuikala bantu banene ba mushinga mukole. Batu basue mianzu minene bua bantu bonso kubatumikilabu. Kadi Yezu yeye udi wambila bayidi bende ne: buobu kabena ne bua kuikala  nanku to. Pamutu pa nanku, Yezu udi wamba ne: “Udi musue kuikala wa kumpala munkatshi muenu, adienze mupika wenu.” Ela meji bua bualu ebu!​—Matayo 20:20-28, MMM.

Udi mumanye tshitu mupika wenza anyi?​— Utu wenzela bantu bakuabu mudimu, kayi utekemena bua bakuabu bamuenzele yeye mudimu to. Utu wangata muaba mushadile ku yonso, ki mmuaba wa kumpala to. Utu wenza malu a muntu wa mushinga mukese menemene, ki nga muntu wa mushinga wa bungi to. Vuluka kabidi ne: Yezu uvua muambe ne: muntu udi musue kuikala wa kumpala udi ne bua kuenza malu bu mupika wa bakuabu.

Mpindieu, udi wela meji ne: bidi ne diumvuija kayi buetu tuetu?​— Mupika udi mua kukokangana ne mfumuende bua kumanya udi ne bua kusomba pa muaba wa kumpala anyi? Peshi udi mua kukokangana nende pa bualu bua muntu udi ne bua kudia kumpala anyi? Udi wela meji kayi?​— Yezu wakumvuija ne: mupika utu misangu yonso uteka mfumuende kumpala kuende.​—Luka 17:7-10.

Nanku pamutu pa kufuila anu bua kuikala kumpala, tshitudi ne bua kuenza ntshinyi?​— Tudi ne bua kuikala anu bu bapika ba bakuabu. Mmuomumue ne: kuteka bakuabu kumpala kuetu. Kabidi kumona ne: bakuabu mbatupite kule ne kule. Udiku mua kuela meji pa mishindu mishilashilangane iudi mua kuenza bua kuteka bakuabu kumpala anyi?​— Anyishaku upingane mu dibeji dia 40 ne dia 41 utangile kabidi imue mishindu iudi mua kuenza bua kuteka bakuabu kumpala kuebe pa kubenzela mudimu.

Neuvuluke ne: Mulongeshi Munene uvua uteka bakuabu kumpala kuende pa kubenzela mudimu. Dilolo dia ndekelu diakasombaye ne bapostolo bende, wakajuka panshi kuboweshaye too ne mâyi ku makasa. Tuetu petu tuetu bateke bakuabu kumpala pa kubenzela mudimu, netusankishe Mulongeshi Munene ne Tatuende Yehowa Nzambi.