Kukavua bidimu bitue ku 70 katshia bena Isalele ba bungi bapingana ku Yelushalema, kadi kuvua bakuabu batshivua basombele mu bitupa bishilashilangane bia mu bukalenge bua Pelasa. Umue wa kudibu uvua Ezela, muakuidi uvua ulongesha mikenji ya Yehowa. Ezela wakumvua ne: bantu bavua ku Yelushalema kabavua balonda mikenji ya Nzambi to, ne uvua musue kuya kubambuluisha. Atashasete mukalenge wa Pelasa wakamuambila ne: ‘Nzambi mmukuvuije muena meji bua ulongeshe mikenji yende. Ndaku, uye ne muntu yonso udi musue kuya nebe.’ Ezela wakatuilangana ne bantu bonso bavua basue kupingana ku Yelushalema. Bakasambila Yehowa bua abalame mu luendu lule alu, pashishe bobu kuasa luendu.

Ngondo inayi pashishe, bakafika ku Yelushalema. Bakokeshi bavua kuntu aku bakambila Ezela ne: ‘Bena Isalele ki mbatumikile Yehowa to; mbasele kabidi bakaji badi batendelela nzambi ya dishima.’ Ezela wakenza tshinyi? Wakatua binu kumpala kua tshisamba tshijima, kusambilaye ne: ‘Yehowa, udi mutuenzele malu a bungi be, kadi tuetu tudi bakuenzele malu mabi.’ Bantu bakanyingalala, kadi batshivua anu benza malu avua kaayi mimpe to. Ezela wakasungula bakulu ne balumbuluishi bua kutangila tshilumbu etshi. Munkatshi mua ngondo isatu yakalonda, bakipata bantu bavua kabayi batendelela Yehowa.

Bidimu 12 biakapita. Munkatshi mua bidimu abi, bakibakulula bimanu bia Yelushalema. Nunku Ezela wakasangisha bantu muaba wa tshinsangansanga bua kubabadila mikenji ya Nzambi. Pavua Ezela mubulule mukanda, bantu bakimana kuulu. Wakatumbisha Yehowa, bobu kuela bianza muulu bua kuleja muvuabu banyisha tshivua Ezela wamba. Pashishe Ezela wakabala mikenji ya Nzambi, kuyumvuijaye, ne bantu bavua bateleja ne ntema yonso. Bakitaba ne: bavua kabidi basesuke kule ne Yehowa, bobu kudila. Dituku diakalonda, Ezela wakatungunuka ne kubabadila mikenji. Bakajingulula ne: bivua bikengela bua benze Tshibilu tshia Bitanda, ne kuvua kubashadile anu matuku makese tshianana. Bakabanga kudilongolola musangu umue bua tshibilu atshi.

 Bantu bakasanka mu matuku muanda mutekete a tshibilu atshi, kuelabu Yehowa tuasakidila bua muvuabu bapete bia pa madimi bia bungi. Kakuvua kuenzeke Tshibilu tshia Bitanda tshia buena atshi katshia ku matuku a Yoshua to. Tshibilu tshimane kujika, bantu bakadisangisha, kusambilabu ne: ‘Yehowa, uvua mutumbushe ku bupika, wewe kutudisha mu tshipela, ne kutupesha buloba buimpe ebu. Kadi tuakabenga kukutumikila misangu ne misangu. Uvua utuma baprofete bua kutudimuija, kadi katuvua tubateleja to. Nansha nanku, wewe uvua anu ne lutulu. Wakakumbaja bualu buuvua mulaye Abalahama. Mpindieu tudi tukulaya ne: netukutumikile.’ Bakafunda dilaya diabu edi; bakokeshi, bena Lewi, ne bakuidi kutuabu tshitampi pa mukanda uvua ne dilaya adi.