Pavua Yezu ne bayidi bende mu nzubu wa kuulu, wakabambila ne: ‘Nuenu bonso nenundekele butuku ebu.’ Petelo wakamba ne: ‘Bua meme to! Nansha bakuabu bonso aba bakushiye, meme tshiakukushiya nansha kakese.’ Kadi Yezu wakambila Petelo ne: ‘Kumpala kua tshitala kusama, newambe misangu isatu ne: kuena mummanye to.’

Pavua basalayi bakuate Yezu baye nende ku nzubu kua Kayifa, bapostolo bende ba bungi bakanyema. Kadi babidi ba kudibu bakalonda mu musumba wa bantu. Umue wa kudibu uvua Petelo. Wakabuela mu lubanza lua nzubu wa Kayifa, kuotaye kapia. Nsongakaji kampanda muena mudimu wakamona mpala wa Petelo ku bukenke bua kapia, kuambaye ne: ‘Ndi mukumanye! Nuvua ne Yezu!’

Petelo kuamba ne: ‘Tòo, katuvua nende to! Tshiena mumanye tshiudi wamba atshi to!’ Kuasaye luendu mutangile ku tshiibi tshia lubanza. Kadi katantshi nsongakaji mukuabu muena mudimu kumumonaye, kuambilaye musumba wa bantu ne: ‘Muntu eu uvua ne Yezu!’ Petelo kuamba ne: ‘Meme tshitu nansha mumanye Yezu to!’ Muntu mukuabu kuamba ne: ‘Wewe pebe udi umue wa kudibu! Ngakuilu webe udi undeja ne: udi wa mu Galela, anu bu Yezu.’ Kadi Petelo wakaditshipa wamba ne: ‘Tshiena mumumanye to!’

Dîba adi, tshitala e kusama. Petelo wakamona Yezu ukudimuka umutangila. Wakavuluka mêyi a Yezu, kuyaye pambelu, kudilaye bikole menemene.

Pine apu, bena ku Tshilumbuluidi Tshinene bakadisangisha bua kulumbuluisha Yezu mu nzubu wa Kayifa. Bakavua bangate dipangadika dia kushipa Yezu, ne mpindieu bavua bakeba muaba wa kulambakena bua bobu kumushipa. Kadi kabavua bapete bualu bua kumubanda nabu to. Ndekelu wa bionso, Kayifa wakebeja Yezu buludiludi ne: ‘Wewe udi Muana wa Nzambi anyi?’ Yezu kuandamuna ne: ‘Eyowa, ndi Muana wa Nzambi.’ Kayifa kuamba ne: ‘Katuena kabidi dijinga ne bijadiki bikuabu to. Eku si nkupenda Nzambi!’ Bena ku  kabadi bakangata dipangadika edi: ‘Muntu eu udi ne bua kufua.’ Bakatapa Yezu mapi, kumutuilabu mate, kumujikabu ku mêsu, kumututabu bamba ne: ‘Biwikala muprofete tuambila udi mukutute!’

Pakatshiabu, bakaya ne Yezu ku nzubu wa Tshilumbuluidi Tshinene, kumukonkabu kabidi ne: ‘Wewe udi Muana wa Nzambi anyi?’ Yezu kuandamuna ne: ‘Nuenu nudi nuamba ne: meme nyeye.’ Pashishe bakamumona mupile bua dipenda Nzambi, bobu kuya nende kudi Ponsio Pilato, nguvena wa bena Lomo. Tshinyi tshiakenzeka pashishe? Tutshimonayi.