Yehoshafata mukalenge wa Yuda wakabutula bioshelu bia Bâla ne mpingu yende yonso mu buloba. Uvua musue ne: bantu bonso bamanye mikenji ya Yehowa. Ke bualu kayi wakatuma bakokeshi ne bena Lewi mu Yuda muonso mujima bua kulongesha bantu mikenji ya Yehowa.

Bisamba bivua pabuipi apu biakapeta buôwa bua kulua kuluisha Yuda bualu bivua bimanye ne: Yehowa uvua ne tshisamba tshiende. Bivua bitumina too ne mukalenge Yehoshafata mapa a bungi. Kadi pashishe bena Moaba, bena Amona, ne bantu ba mu buloba bua Seî bakalua kuluisha Yuda. Yehoshafata uvua mumanye ne: uvua dijinga ne diambuluisha dia Yehowa. Wakabikidisha balume, bakaji, ne bana bonso bua kudisangishabu mu Yelushalema. Wakasambila kumpala kua bantu bonso aba ne: ‘Yehowa, katuena mua kutshimuna wewe kuyi netu to. Tuambila koku tshitudi mua kuenza.’

Yehowa wakandamuna disambila diende wamba ne: ‘Kanuikadi ne buôwa to. Nennuambuluishe. Dilongololayi, nushale bimane, ne numone munganusungila.’ Yehowa uvua mubasungile mushindu kayi?

Mu dinda Yehoshafata wakasungula bimbi ba misambu, kubambilaye bua bende kumpala kua tshiluilu. Bakenda kumbukila ku Yelushalema too ne muaba uvua mvita ne bua kuenzekela ku Tekoa.

Pavua bimbi ba misambu benda batumbisha Yehowa ne disanka ne dîyi dikole, Yehowa uvua uluila tshisamba tshiende mvita. Wakela bena Amona ne bena Moaba mu kayumbayumba, kutuadijabu kuluishangana nkayabu, kushipangana bonso, kakuyi muntu ushala ne muoyo. Kadi Yehowa wakakuba tshisamba tshiende tshia Yuda, ne basalayi, ne bakuidi. Bantu bonso bavua mu matunga avua pabuipi bakumvua tshivua Yehowa muenze, kumanyabu ne: Yehowa utshivua uluila tshisamba tshiende mvita. Mmushindu kayi udi Yehowa usungila bantu bende? Mu mishindu mishilashilangane. Kena dijinga ne diambuluisha dia muntu bua kubasungila.