Mu buloba bua Sulia kuvua muana wa bakaji mutekete muena Isalele uvua kule menemene ne kuabu. Bavua bamumbushe kuabu kudi basalayi bena Sulia, ne mpindieu ukavua muena mudimu wa mukaji wa mfumu wa basalayi mukuabu dîna diende Nâmana. Muana eu uvua utendelela Yehowa nansha muvua bantu ba muaba uvuaye au kabayi bamutendelela to.

Nâmna uvua ne disama dia dikoba dibi menemene, ne bivua bimusama dîba dionso. Muana eu uvua ne muoyo wa kumuambuluisha. Wakambila mukaji wa Nâmana ne: ‘Ndi mumanye muntu mukuabu udi mua kuenza bua bayebe umvue bimpe. Mu Isalele mudi muprofete wa Yehowa kampanda dîna diende Elisha. Udi mua kuondopa bayebe.’

Mukaji wa Nâmana wakambila Nâmana tshivua muana wa bakaji eu muambe. Nâmana uvua musue kuenza tshionso tshivuaye mua kuenza bua kumvua bimpe, nunku wakaya ku nzubu kua Elisha mu Isalele. Nâmana uvua wela meji ne: Elisha neamuakidile bu muntu munene. Kadi pamutu pa Elisha kuakula nende mpala ne mpala, wakatuma yeye muena mudimu  wende bua kuakidila Nâmana ne kumupesha mukenji eu ne: ‘Ndaku, wowe mâyi misangu muanda mutekete mu musulu wa Yadene. Pashishe neumvue bimpe.’

Nâmana wakumvua bibi menemene. Wakamba ne: ‘Mvua ngela meji ne: muprofete eu neangondope pa kubikila Nzambi wende ne kulabakaja bianza biende pambidi panyi. Kadi yeye udi ungambila bua kuya ku musulu wa mu Isalele eu. Tudi ne misulu mimpe miwupite mu Sulia. Bua tshinyi tshiena anu mua kuya ku misulu ayi?’ Nâmana wakafiika munda, kumbukaye kua Elisha.

Bena mudimu ba Nâmana bakamuambuluisha bua kuelulula meji bimpe. Bakamuambila ne: ‘Kuena mua kuenza tshionso tshiudi mua kuenza bua kumvua bimpe anyi? Tshidi muprofete eu ukuambila bua kuenza mbualu bupepele tshianana. Bua tshinyi kuena mua kubuenza?’ Nâmana wakabateleja. Wakaya ku musulu wa Yadene, kudielaye mu mâyi misangu muanda mutekete. Panyima pa musangu wa muanda mutekete, Nâmana wakapatuka mu mâyi mumane kumvua bimpe menemene. Uvua ne dianyisha dia bungi, kupinganaye kua Elisha bua kumuela tuasakidila. Nâmana wakamba ne: ‘Ndi mumanye mpindieu ne: Yehowa ke Nzambi mulelela.’ Udi wela meji ne: muana wa bakaji mutekete muena Isalele au uvua mua kuikala mumvue bishi pavuaye mumone Nâmana mualukile mumane kumvua bimpe?