1, 2. Ntshilejilu kayi tshidi tshileja ne: tudi dijinga ne dîyi dia kulonda didi mua kutuludika mu malu adi atangila ntendelelu?

 MMUNYI mutudi mua kumanya Nzambi? Bidi bikengela kukonkonona malongesha onso a mu bitendelelu bidi bungi kabuyi kubala ebi anyi? Ebu ki mbualu butekete to. Nansha tuetu mua kuakonkonona onso, mmunyi mutudi mua kufika ku dimanya ne: dilongesha edi ndilelela anyi ndia dishima?

² Eyowa, bu mudiku malongesha a mishindu mishilangane pa bidi bitangila Nzambi, mbimpe kukeba mushindu wa kumanya tshidi bulelela, mbuena kuamba ne: dîyi dia kulonda didi mua kutuangaja bantu ku bualu bumue. Tshilejilu: Fuanyikijabi ne: bantu badi bakokangana mu tshisalu bua bule bua mpesa wa tshilamba. Musumbishi udi wamba ne: mpesa wa tshilamba eu udi bule bua metre asatu, kadi musumbi yeye udi wela meji ne: mmushadile ku metre asatu. Tshilumbu etshi tshidi mua kujika munyi? Mpa kuangata metre ne kupima nawu bule bua tshilamba etshi.

3. Bua tshinyi bakafunda Bible?

³ Kudiku tshintu bu metre a kupima nawu, tuamba ne: dîyi dinene didi diambuluisha bua kumona mua kukosa tshilumbu tshia malu a ntendelelu etshi anyi? Eyowa, tshintu atshi m’Bible. Nzambi mmufundishe Bible bua bantu ba miaba yonso bamanye bulelela budi bumutangila. Bakadi bapatule Bible miliyare ne miliyare. Bakadi bamukudimune mu bitupa anyi mujima mu miakulu mipite pa 2 100. Bionso ebi anu bua muntu pa kuamba yonso apete mushindu wa kubala bulelela budi butangila Nzambi mu muakulu wabu.

4. Mmalu kayi adi mu Bible?

 ⁴ Bible ndipa dia mushinga wa bungi didi Nzambi mutupeshe. Bible udi umvuija malu atuvua katuyi nansha mua kumanya to. Udi utuambila bua badi mu miaba ya mu nyuma. Udi utuleja ngenyi ya Nzambi, bumuntu buende ne tshidiye mulongolole bua kuenza. Udi utulondela bua nsombelu uvua nende Nzambi ne bantu kale kukadi bidimu nkama ne nkama. Udi wakula bua malu alua kuenzeka mu matuku adi kumpala eku. Udi kabidi utuleja mushindu utudi mua kuendela mu njila udi ufikisha ku muoyo wa tshiendelele.

5. Ntshilejilu kayi tshidi tshileja ne: Bible udi mu diumvuangana ne malu a siyanse?

⁵ Kudi malu a bungi atudi ne bua kuitabila se: Bible n’Dîyi dia Nzambi menemene. Bumue bua ku malu aa mbua se: Bible udi mu diumvuangana ne malu a siyanse. Tshilejilu, kale bantu bavua bela meji ne: buloba ebu butu pa tshintu kampanda. Mu Afrike wa ku Ouest tshilejilu, tshikondo kampanda bantu bavua bamanye ne: buloba ebu bavua babukuate kudi nkata ya nyoka, nkata 3 500 pamutu pabu ne mikuabu 3 500 muinshi muabu. Kadi mufundi mukuabu wa Bible wakamba malu mumvuangane ne siyanse kukadi bidimu bipite pa 3 500 ne: Nzambi mmufuke buloba “kabuyi bukudika ku tshintu.”​—Yobo 26:7.

6. Ntshijadiki tshinene kayi tshidi tshileja se: Bible mmufumine kudi Nzambi?

⁶ Tshijadiki tshitamba bunene tshia se: Bible mmufumine bulelela kudi Nzambi ntshia kudianjila kumanyisha malu adi alua kuenzeka mu matuku atshilualua kayi utupakana. Bishilangane ne bena mbuku, Nzambi yeye mmumanye tshienzeka makelela; tshintu tshionso tshituye wamba tshitu tshienzeka.

7. Ng’imue milayi kayi ya mu Bible yakakumbana kale?

⁷ Binunu ne binunu bia milayi ya mu Bible biakakumbana kale. Tshilejilu, bidimu 700 kumpala, Bible wakamba kujadika ne: Yezu uvua ne bua kuledibua mu Beteleheme, ne ke tshiakenzeka bushuwa. (Mika 5:2; Matayo 2:3-9) Bible wakamanyisha kabidi ne: Yezu uvua ne bua kuledibua kudi nsongakaji utshivua kamama ne bavua ne bua kumutungila tshitungu bua bijanja bia argent 30. Milayi eyi yakakumbana payi. Bushuwa, muntu wetu wendenda eu kavua mua kudianjila kumanyisha malu aa to!​—Yeshaya 7:14; Zekâya 11:12, 13; Matayo 1:22, 23; 27:3-5.

8. Ng’imue milayi kayi ya mu Bible idi yenda ikumbana lelu’eu, ne idi tshijadiki tshia tshinyi?

⁸ Milayi ya bungi ya mu Bible idi yenda ikumbana  mu tshikondo tshietu etshi. Mona imue ya kudiyi:

•   ‘Tshisamba tshikuabu netshiluangane ne tshinga, bukalenge bukuabu nebuluangane ne bunga, buloba nebutambe kutaka, biyole ne bipupu nebikale ku nseke ne ku nseke.’​—Luka 21:10, 11.

•   Kuvua ne bua kulua “divulangana dia bubi.”​—Matayo 24:12, Mukanda wa Mvidi Mukulu [Katolike, MMM].

•   ‘Palua matuku a ku nshikidilu bantu nebikale badisu, banangi ba biuma, kabayi batumikila mêyi a baledi babu, kabayi mua kudikanda, bena luonji, kabayi basue malu mimpe, buujibue ne diambu, banangi ba masanka, kabayi banangi ba Nzambi.’​—2 Timote 3:1-5.

 Kuenaku umona bua se: malu aa adi enda enzeka lelu’eu anyi? Bulelela ne bujalame bua milayi ya mu Bible bidi bileja se: Bible kêna bu mukanda wetu wa tshianana eu to. N’Dîyi dia Nzambi difundisha ku nyuma wende!​—2 Timote 3:16.

9, 10. Tshidi tshileja ne: Nzambi ki mmulekele bantu bua kushintululabu Bible ntshinyi?

⁹ Fuanyikijabi ne: udi ne ditanda kampanda, ne udi mufunde mêyi ne mikandu pa dibeji ne mulamike ku tshimanu bua bena mudimu bebe. Kadi tshiwenza ntshinyi bikala muluishi webe kampanda muyishintulule? Kuakuyilongolola anyi? Bia muomumue, Nzambi ki mmulekele bantu bua kushintululabu bulelela bua mu Bible udi Dîyi diende to.

¹⁰ Bantu buonso bakakeba bua kushintulula malongesha a mu Dîyi dia Nzambi kabakakokesha to. Patudi tufuanyikija Bible wa lelu ne ivuaku kale, kakuena dishilangana to. Bualu ebu budi buleja ne: mu bidimu bionso bikadi bipite ebi, Bible ki mmushintuluke to.