DILONGESHA DIA 18
Mua kumanya bena Kristo ba bushuwa
Bantu miliyare ya bungi batu badiamba mudibu bena Kristo. Kadi malongesha abu atu abengangana, ne kabatu batumikila mikenji imue to. Nanku, mmunyi mutudi mua kumanya bena Kristo ba bushuwa?
1. Kuikala muena Kristo kudi kumvuija tshinyi?
Bena Kristo mbayidi ba Yezu Kristo. (Balayi Bienzedi 11:26.) Ntshinyi tshidibu ne bua kuenza bua kuleja ne: mbayidi ba Yezu? Yezu wakamba ne: “Nuenu bashale mu dîyi dianyi, nudi bushuwa bayidi banyi.” (Yone 8:31) Bualu ebu budi bumvuija ne: bena Kristo balelela badi ne bua kutumikila malongesha a Yezu. Anu muvua Yezu wimanyina mu Mifundu bua kushindika malongesha ende, bena Kristo balelela badi bangatshila pabu malongesha abu mu Bible.—Balayi Luka 24:27.
2. Bena Kristo ba bushuwa mbanangangane mushindu kayi?
Yezu wakambila bayidi bende ne: “Nunangangane anu bu mundi mununange.” (Yone 15:12) Ntshinyi tshivua Yezu muenze bua kuleja ne: uvua munange bayidi bende? Uvua usomba nabu, ubakankamija, ne ubambuluisha. Wakafila too ne muoyo wende bua bualu buabu. (1 Yone 3:16) Bena Kristo ba bushuwa pabu ki mbanangangane anu mukana patupu to. Mbanangangane kabidi mu mêyi ne mu bienzedi.
3. Bena Kristo ba bushuwa batu batamba kuenza mudimu kayi?
Yezu wakapesha bayidi bende mudimu. “Wakabatuma bua kuyisha Bukalenge bua Nzambi.” (Luka 9:2) Bena Kristo ba mu bidimu lukama bia kumpala kabavua bayisha bantu anu miaba ya ntendelelu to, bavua kabidi babayisha miaba ya tshinsangansanga ne babatantshila ku mabu. (Balayi Bienzedi 5:42; 17:17.) Lelu, bena Kristo ba bushuwa badi pabu bayisha bantu muaba wonso udibu mua kubapeta. Bu mudibu banange bantu, badi ne disanka dia kufila dîba diabu ne makanda abu bua kubayisha mukenji wa mu Bible udi ufila ditekemena ne busambi.—Mâko 12:31.
BUELA MU BUONDOKE
Mona muudi mua kutapulula bena Kristo ba bushuwa ne bantu badi kabayi balonda malongesha a Yezu ne tshilejilu tshiende.
4. Badi bakeba bulelela bua mu Bible
Bena Kristo ba mu bidimu lukama bia kumpala bavua bangata Dîyi dia Nzambi ne mushinga
Bonso badi badiamba mudibu bena Kristo kabatu batumikila malu a mu Bible to. Tangilayi FILME, pashishe nuandamune lukonko ludi lulonda.
-
Mmunyi muvua bitendelelu bidi bidiamba mudibi bia bena Kristo bipangishe bantu bua kumanya malu avua Yezu mulongeshe?
Yezu wakalongesha bulelela budi mu Dîyi dia Nzambi. Balayi Yone 18:37, pashishe nuandamune lukonko elu:
-
Bilondeshile Yezu, mmunyi mutudi mua kumanya bena Kristo badi ku “luseke lua bulelela”?
5. Badi bayisha bulelela bua mu Bible
Bena Kristo ba mu bidimu lukama bia kumpala bavua bayisha bakuabu
Kumpala kua Yezu kubanda mu diulu, wakapesha bayidi bende mudimu utshidi wenzeka too ne lelu. Balayi Matayi 28:19, 20 ne Bienzedi 1:8, pashishe nuandamune lukonko elu:
-
Mudimu wa kuyisha ngua kuenza too ne penyi ne too ne dîba kayi?
6. Badi batumikila malu adibu bayisha
Ntshinyi tshivua tshijadikile muntu mukuabu diende Tom ne: uvua mupete bena Kristo ba bushuwa? Tangilayi FILME, pashishe nuandamune nkonko idi ilonda.
-
Mu filme eu, ntshinyi tshivua tshisake Tom bua kulekela malu a kutendelela?
-
Bua tshinyi mmutuishibue ne: mmupete bulelela?
Bienzedi bidi ne bukole kupita mêyi. Balayi Matayi 7:21, pashishe nuandamune lukonko elu:
-
Ntshinyi tshidi ne mushinga wa bungi kudi Yezu: kuamba mutudi bena Kristo anyi kuleja buena Kristo buetu ku bienzedi?
7. Mbanangangane
Bena Kristo ba mu bidimu lukama bia kumpala bavua banangangane
Bena Kristo bakadi bateke mioyo yabu mu njiwu bua kupandisha bena Kristo nabu anyi? Tangilayi FILME, pashishe nuandamune nkonko idi ilonda.
-
Mu filme eu, bua tshinyi Lloyd uvua muteke muoyo wende mu njiwu bua kupandisha muanetu Johansson?
-
Buebe wewe, mmuenze malu bu muena Kristo wa bushuwa anyi?
Balayi Yone 13:34, 35, pashishe nuandamune nkonko eyi:
-
Bayidi ba Yezu (bena Kristo ba bushuwa) batu benzela bantu ba dikoba anyi ditunga dikuabu malu mushindu kayi?
-
Mmunyi mudibu mua kuenza nanku mu tshikondo tshia mvita?
BAMUE BATU BAMBA NE: “Bena Kristo mbenze malu mabi matambe, mmunyi mudibu mua kuikala mu tshitendelelu tshilelela?”
-
Mmvese kayi udi uleja mutudi mua kumanya bena Kristo balelela uudi mua kubadila muntu?
TSHIA KUKUATA
Bena Kristo balelela badi batumikila malongesha a mu Bible, mbanangangane ne muoyo mujima, ne badi bayisha bulelela budi mu Bible.
Diambulula
-
Bena Kristo balelela badi bangatshila malongesha abu penyi?
-
Bena Kristo balelela batu babamanyina ku tshikadilu kayi?
-
Bena Kristo balelela batu benza mudimu kayi?
BIA KUTANGILA KABIDI
Mona malu makuabu a tshitendelelu tshidi tshidienzeja bua kulonda malongesha a Yezu Kristo ne tshilejilu tshiende.
Mona tshiakafikisha muntu mukaji uvua mansere ku dipeta “dîku dilelela dia mu nyuma.”
“Bavua bandamuna nkonko yanyi yonso ne Bible!” (Tshibumba tshia Nsentedi 1/4/2014)
Mona mudi bena Kristo balelela banange bena Kristo nabu badi bakengela bintu.
Katupa ka filme wa Kuambuluisha bana betu padi bipupu bibakuata (3:57)
Mona mudi bena Kristo ba mu bidimu lukama bia kumpala ne bena Kristo balelela ba lelu bakumbaja malu akamba Yezu bua kumanya bayidi bende.
“Nku tshinyi kutudi mua kumanyina bena Kristo balelela?” (Tshibumba tshia Nsentedi 1/3/2012)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
