DILONGESHA DIA 59
Udi mua kunanukila mu dikengeshibua
Dimue dituku, bena Kristo bonso nebamone bantu babaluisha bua kulekelabu Yehowa, anyi mene babakengesha. Mbimpe bualu ebu kukuenzabu buôwa anyi?
1. Bua tshinyi tudi batekemene ne: nebatukengeshe?
Bible udi uleja patoke ne: “Bantu bonso badi basue kuikala balamate Nzambi mu buobumue ne Kristo Yezu nebakengeshibue pabu.” (2 Timote 3:12) Bakakengesha Yezu bualu kavua mu malu a ba pa buloba budi Satana ukokesha to. Tuetu petu katuena mu malu a ba pa buloba to. Ke bualu kayi, kabiena bitukemesha padibu batukengesha kudi mbulamatadi ne bitendelelu bia panu to.—Yone 15:18, 19.
2. Mmunyi mutudi mua kudilongolola bua dîba dia dikengeshibua?
Mbimpe tumanye mua kueyemena Yehowa bikole kubangila anu ku mpindieu. Keba dîba dia kuikala kumulomba mu masambila ne kubala Dîyi diende dituku dionso. Ikala ubuela mu bisangilu pa tshibidilu. Malu aa ke akupetesha bukole budi bukengela bua kunanukila mu dikengeshibua dia mishindu yonso ne dikima, nansha diodi dia bakukengesha kudi bena mu dîku dienu. Mupostolo Paulo uvuabu batambe kukengesha wakafunda ne: “Yehowa mmuambuluishi wanyi; tshiakutshina to.”—Ebelu 13:6.
Tudi kabidi mua kupeta dikima tuetu tuyisha pa tshibidilu. Patudi tuyisha, tudi tumanya mua kueyemena Yehowa ne kutshimuna ditshina dionso dia bantu. (Nsumuinu 29:25) Wewe muikale ne dikima dia kuyisha lelu, newikale mukambane bua kutungunuka ne kuyisha nansha padi mbulamatadi ukandika mudimu wetu.—1 Tesalonike 2:2.
3. Ntshinyi tshituapeta tuetu bananukile mu dikengeshibua?
Bushuwa, katuena tusanka padibu batukengesha to, kadi tuetu bananukile mu dikengeshibua ditabuja dietu didi dikola. Tudi tutamba kusemena kabidi pabuipi ne Yehowa, bualu tudi tubanga kumona mudiye utuambuluisha dîba ditudi tudiumvua katutshiyi ne bukole. (Balayi Yakobo 1:2-4.) Yehowa udi unyingalala patudi tukenga, kadi udi usanka padiye utumona tunanukila. Bible udi wamba ne: “Nuenu nunanukila mu makenga bua munudi nuenza malu mimpe, bualu ebu mbualu buimpe kudi Nzambi.” (1 Petelo 2:20) Tuetu bashale ne lulamatu, Yehowa neatufute muoyo wa tshiendelele mu bulongolodi bupiabupia mutuamuenzela mudimu kakutshiyi wa kutuluisha.—Matayi 24:13.
BUELA MU BUONDOKE
Mona tshiatuambuluisha bua kushala ne lulamatu kudi Yehowa nansha batukengesha, ne muatufutaye bua lulamatu luetu alu.
4. Udi mua kunanukila padi bena mu dîku dienu bakukengesha
Yezu uvua mumanye bimpe ne: bena mu mêku etu badi mua kubenga dipangadika dietu dia kutendelela Yehowa. Balayi Matayi 10:34-36, pashishe nuandamune lukonko elu:
-
Ntshinyi tshidi mua kuenzeka padi muntu umue wa mu dîku kampanda utuadija kuenzela Yehowa mudimu?
Bua kumanya tshidi mua kuenzeka, tangilayi FILME, pashishe nuandamune lukonko ludi lulonda.
-
Ntshinyi tshiwenza bikala mulela anyi mulunda webe ujinga kukupangisha bua kuenzela Yehowa mudimu?
Balayi Misambu 27:10 ne Mâko 10:29, 30. Panudi nubala mvese ne mvese yonso, nuandamune lukonko elu:
-
Mmunyi mudi mulayi eu mua kukuambuluisha bikala bena mu dîku dienu anyi balunda bebe bakuluisha?
5. Tungunuka ne kutendelela Yehowa nansha bobu bakukengesha
Bitu bilomba dikima bua kuenzela Yehowa mudimu padibu batupangisha bua kumuenzelawu. Tangilayi FILME, pashishe nuandamune lukonko ludi lulonda.
-
Malu adi mu filme eu mmakukoleshe mushindu kayi?
Balayi Bienzedi 5:27-29 ne Ebelu 10:24, 25. Panudi nubala mvese ne mvese yonso, nuandamune lukonko elu:
-
Bua tshinyi mbia mushinga bua kutungunuka ne kutendelela Yehowa nansha padi mbulamatadi ukandika mudimu wa diyisha ne bisangilu?
6. Yehowa neakuambuluishe bua kunanukila
Bantemu ba Yehowa ba pa buloba bujima, bakulumpe ne bana, mbatungunuke ne kuenzela Yehowa mudimu ne lulamatu nansha pavuabu babakengeshe. Bua kumanya tshivua tshibambuluishe, tangilayi FILME. Pashishe nuandamune lukonko ludi lulonda.
-
Mu filme eu, tshivua tshiambuluishe Bantemu aba bua kunanukila ntshinyi?
Balayi Lomo 8:35, 37-39 ne Filipoyi 4:13. Panudi nubala mvese ne mvese yonso, nuandamune lukonko elu:
-
Mmunyi mudi mvese eu ukujadikila ne: udi mua kunanukila mu lutatu kayi luonso?
Balayi Matayi 5:10-12, pashishe nuandamune lukonko elu:
-
Bua tshinyi udi mua kuikala anu ne disanka nansha bobu bakukengesha?
Batendeledi ba Yehowa miliyo ne miliyo mbananukile mu buluishi. Si udi pebe mua kunanukila!
BAMUE BATU BAMBA NE: “Tshiakukokesha bua kunanukila dîba dia dikengeshibua to.”
-
Mmvese kayi idi mua kubapesha muoyo mukole udi ukengedibua?
TSHIA KUKUATA
Yehowa udi wanyisha kudienzeja kuetu bua kumutendelela nansha padibu batukengesha. Neatuambuluishe, nunku netunanukile!
Diambulula
-
Bua tshinyi bena Kristo badi ne bua kutekemena ne: nebakengeshibue?
-
Tshiudi mua kuenza kubangila ku mpindieu bua kudilongolola bua dîba diabangabu kukukengesha ntshinyi?
-
Ntshinyi tshidi mua kukupetesha muoyo mukole wa ne: neushale mulamate Yehowa nansha mu dikenga?
BIA KUTANGILA KABIDI
Mona mudi muanetu utshidi nsonga umvuija muakamuambuluisha Yehowa bua kunanukila pakamuelabu mu buloko bua dibenga kulamata luseke kampanda lua bena panu.
Mona tshiakambuluisha bena dibaka kampanda bua kuenzela Yehowa mudimu bidimu bia bungi nansha muvuabu babaluisha.
Bakenzela Yehowa mudimu nansha pavua malu ashintuluka (7:11)
Mmunyi muudi mua kushala ne dikima padibu bakukengesha?
“Dilongolola ku mpindieu bua dikengeshibua” (Tshibumba tshia Nsentedi, 7/2019)
Bobu batuluisha mu dîku dietu, mmunyi mutudi mua kumona buluishi abu? Mmushindu kayi utudi mua kunanukila mu lutatu alu?
“Bulelela kabuena bufila ‘ditalala, kadi muele wa mvita’” (Tshibumba tshia Nsentedi, 10/2017)
Mona bikuabu:
NKONKO ITU BANTU BATAMBA KUELA
Programe wa dilongeshangana Bible wa Bantemu ba Yehowa ntshinyi?
Programe wa nuenda nuyukila wa kuyi ufuta wa Bantemu ba Yehowa eu udi mua kumulonga ne nkudimuinu kayi yonso wa Bible uudi nende. Bikila nansha dîku dienu dijima anyi balunda bebe bonso baudi musue bua nuikale nulonga nabu tshiapamue.
