Mubadi musuibue,

Yezu Kristo wakamba ne: ‘Luaku, undonde meme.’ (Mâko 10:21) Nansha muvuaye wambila muntu umue mêyi aa, adi atutangila tuetu bonso. Udiku witaba bua kumulonda anyi? Wewe muitabe bua kumulonda, nsombelu webe neashintuluke bikole. Bua tshinyi?

Yehowa wakatuma Muanende mulela umue pa buloba bua kufila muoyo wende bua kupikula bantu. (Yone 3:16) Muanende kavua anu mutufuile to, kadi wakatuleja kabidi nsombelu utudi ne bua kuikala nende. Mu malu onso avuaye wenza, wakalama muoyo wende mutoke ne kusankisha Tatuende. Yezu wakatuleja kabidi tshia kuenza bua kuikala bu Tatuende. Njila ne disua dia Tatu biakamueneka bimpe mu mêyi ne bienzedi bia Muana.​—Yone 14:9.

Bible udi wamba ne: Yezu udi ‘tshilejilu bua tumulonde mu makasa ende.’ (1 Petelo 2:21) Tuetu basue kuikala mu malanda mimpe ne Yehowa, basue kuikala ne nsombelu muimpe mpindieu ne kushala mu njila udi ufikisha ku muoyo wa tshiendelele, tudi ne bua kulonda mu makasa a Kristo.

Bua tuetu kulonda Yezu, tudi ne bua kuanji kumanya nsombelu uvuaye nende pa buloba. Nunku, tudi ne bua kukonkonona bimpe malu adi Bible wamba bua Yezu. Kuela meji bua malu avuaye muambe ne muenze ne kukeba mushindu wa kumuidikija nekutuambuluishe bua kumulonda bimpe.

Tudi tujinga ne: mukanda eu ukuambuluishe bua kukolesha dinanga diebe bua Yezu ne Yehowa. Dinanga edi dikusake bua kulonda mu makasa a Yezu bua usankishe Yehowa mpindieu too ne kashidi ne tshiendelele.