1-3. Ntshinyi tshidi tshienzeka padi baledi balua ne bana babu kudi Yezu? Bualu ebu budi butulongesha tshinyi bua Yezu?

 YEZU mmumanye ne: lufu luende lukadi pabuipi. Nkumushadile anu mbingu mikese, kadi utshidi ne malu a bungi a kuenza. Udi uyisha ne bapostolo bende mu Pela, tshitupa tshidi ku Est kua musulu wa Yadene. Badi benda bayisha batangile ku Yelushalema kudi Yezu ne bua kubuela mu tshibilu tshia Kupita kua Yehowa tshiende tshia ndekelu tshidi ne mushinga wa bungi.

² Yezu mumane kukokangana ne bamue bamfumu ba tshitendelelu, kudi kuenzeka tshimvundu tshikese. Bantu badi balua ne bana babu bua kumona Yezu. Bidi bimueneka ne: bana badi ne bidimu bishilangane bualu Mâko udi ubabikila anu muvuaye mubikile muana wa bidimu 12, kadi Luka yeye udi ubabikila ne: “bana bakese.” (Luka 18:15; Mâko 5:41, 42; 10:13) Tudi bamanye ne: muaba wonso utu bana utu anu mutoyi ne dinyemakana. Bayidi ba Yezu badi batandisha baledi ba bana pamuapa bualu badi bela meji ne: Mfumuabu udi ne malu a bungi a kuenza ne kena ne dîba dia kutangila bana to. Yezu udi wenza tshinyi?

³ Yezu udi ufika munda padiye umona tshidi tshienzeka. Mbanganyi badiye ufikila munda? Mbana anyi? Mbaledi anyi? Tòo, mbayidi bende. Udi ubambila ne: ‘Nuitabuje bua bana bakese kulua kundi, kanubakandi; bualu bua bukalenge bua Nzambi mbua badi bu bana. Bulelela, ndi nnuambila ne: Muntu yonso udi kayi witabuja bukalenge bua Nzambi bu muana mukese, kena ubuelamu.’ Pashishe Yezu udi wambula bana ‘mu maboko ende’ ne ubabenesha. (Mâko 10:13-16) Mêyi a Mâko adi aleja ne: Yezu udi wela bana mu tshitupa ne dinanga dionso. Bilondeshile mukudimunyi mukuabu, uvua  mua kuikala mukongoloje bana bakuabu “mu maboko ende.” Bidi bimueneka patoke ne: Yezu mmunange bana bikole. Kadi bualu ebu budi butulongesha kabidi ne: mmumanye kusomba ne bantu.

4, 5. (a) Bua tshinyi tudi tuamba ne: Yezu uvua mumanye kusomba ne bantu? (b) Mu nshapita eu netuandamune nkonko kayi?

⁴ Bu Yezu muikale muntu wa malu makole udi kayi useka ne bantu anyi muikale muena lutambishi, pamuapa bana abu kabavua mua kulua kudiye to. Nansha baledi babu kabavua mua kuikala badiumvua bimpe pavuabu baya kudiye. Paudi wela meji ku bualu ebu, kuenaku mua kufuanyikija mudi baledi batua mimuemue padi muntu muimpe eu uleja mudiye munange bana babu, padiye wamba mudi Nzambi ubangata ne mushinga ne mubanange ne padiye ubabenesha anyi? Bushuwa, nansha muvua Yezu muikale ne bia bungi bia kuenza, uvua mumanye mua kusomba ne bantu.

⁵ Mbanganyi bakuabu bavua bamona Yezu bu muntu muimpe wa kusomba nende? Ntshinyi tshivua tshienza bua ikale nanku? Ntshinyi tshitudi mua kuenza bua kuidikija ngikadilu wa Yezu eu? Ke malu atualonga mu nshapita eu.

6-8. Mbanganyi bavua Yezu utamba kusomba nabu? Uvua mushilangane ne bamfumu ba tshitendelelu ku tshinyi?

⁶ Paudi ubala malu adi Matayo, Mâko, Luka ne Yone bafunde, udi mua kukema bua muvua bantu ba bungi kabayi batshina bua kuya kudi Yezu. Tshilejilu, misangu ya bungi idibu bakula buende yeye, badi bakula kabidi bua “bisumbu binene bia bantu.” Mukanda wa Nzambi udi wamba ne: “Bisumbu bia bantu bia bungi bia mu Galela biakamulonda.” “Bisumbu binene bia bantu biakamunguila.” “Bisumbu binene bia bantu biakalua kudiye.” ‘Bantu ba bungi bakadi baya nende.’ (Matayo 4:25; 13:2; 15:30; Luka 14:25) Bushuwa, pa tshibidilu Yezu uvua anu ne bantu ba bungi muaba uvuaye.

⁷ Bantu aba bavua bantu ba tshianana bavua bamfumu ba  tshitendelelu babikila ne kapeja konso ne: “Bena buloba.” Bafalese ne bakuidi bakamba patoke ne: ‘Bantu ba tshisumbu etshi badi kabayi bamanye mikenji ya Nzambi badi bedibue mulawu.’ (Yone 7:49) Mikanda ya balongeshi ba mikenji yakalua kuleja ne: Bafalese ne bakuidi bavua bapepeja bantu bushuwa. Bamfumu ba bungi ba tshitendelelu bavua bamona bantu abu bu bantu bapuekele, babenga too ne bua kudia nabu, kusumba bintu biabu anyi kusomba nabu. Bakuabu mene bavua bamba ne: bantu bavua kabayi bamanye mikenji ivua kayiyi mifunda kabavua ne ditekemena dia kubishibua ku lufu to. Bantu bapuekele ba bungi bavua mua kuikala banyema balombodi abu pamutu pa kubalomba diambuluisha anyi mibelu. Kadi Yezu yeye kavua nanku to.

⁸ Yezu uvua usomba ne bantu bapuekele kakuyi bualu. Uvua udia nabu, ubondopa, ubalongesha ne ubaleja malu mimpe avua Nzambi mubalaye. Uvua mumanye ne: ba bungi ba kudibu bavua ne bua kubenga kuenzela Yehowa mudimu. (Matayo 7:13, 14) Kadi uvua utekemena ne: yonso wa kudibu uvua mua kuitaba lumu luimpe ne kuenza malu mimpe. Yezu uvua mushilangane bikole ne bakuidi ne Bafalese bavua ne malu makole. Kadi bualu bua dikema, too ne bakuidi ne Bafalese bakaya kudiye ne ba bungi bakashintulula nsombelu wabu ne kulua bayidi bende. (Bienzedi 6:7; 15:5) Bamue babanji ne bamfumu bavua pabu bamone muvua Yezu mumanye kusomba ne bantu.​—Mâko 10:17, 22.

9. Bua tshinyi bantu bakaji bavua basue kuya kudi Yezu?

⁹ Bantu bakaji kabavua batshina bua kuya kudi Yezu to. Misangu ya bungi bavua bamona muvua balongeshi babu ba malu a Nzambi babapuekesha milongo. Ba bungi ba kudibu kabavua bitaba bua kulongesha bantu bakaji to. Tshikondo atshi, kabavua bitabila bakaji bua kuikalabu bantemu mu bilumbu to, bualu bavua babamona bu bantu bavuabu kabayi mua kueyemena. Balongeshi abu bavua benza too disambila bela Nzambi tuasakidila bua muvuaye kayi mubafuke bantu bakaji. Kadi bantu bakaji bakamona muvua Yezu mushilangane nabu. Ba bungi bakaya kudiye ne kuteleja  malongesha ende ne muoyo mujima. Tshilejilu, dituku dikuabu Mariya muanabu ne Lazalo uvua musombe ku makasa a Yezu umuteleja ne ntema yonso pavua muanabu Mata mufuile anu ku dilamba biakudia. Yezu wakela Mariya kalumbandi bua muvuaye musungule luseke luimpe.​—Luka 10:39-42.

10. Leja muvua Yezu mushilangane ne balongeshi ba mikenji mu mushindu uvuaye wenzela babedi malu.

¹⁰ Babedi pabu bavua baya kudi Yezu bapite bungi nansha muvua bamfumu ba tshitendelelu kabayi bitaba bua kusemena pabuipi nabu. Mikenji ya Mose ivua yamba ne: bena nsudi bavua ne bua kuikala muaba wa pa nkayabu, kadi abi kabivua biumvuija ne: bavua ne bua kubakina to. (Lewitiki nshapita wa 13) Balongeshi ba mikenji bakalua kuamba pashishe ne: bena nsudi bavua anu bu bunyawu. Bakuabu bavua babasa too ne mabue bua kabasemenyi pabuipi nabu to. Mbikole bua kuela meji ne: bantu bavuabu benzela malu mushindu eu bavua mua kupeta dikima dia kusemena kudi mulongeshi kampanda wa mikenji, kadi bena nsudi bavua balua kudi Yezu. Tshilejilu, umue wa kudibu wakaleja muvuaye ne ditabuja pakambilaye Yezu ne: ‘Mukalenge, biwasua, udi mumanye mua kundengeja.’ (Luka 5:12) Netumone tshivua Yezu mumuandamune mu nshapita udi ulonda. Tshitudi mua kuamba mpindieu ntshia ne: Yezu kavua wenza bantu buôwa to.

11. Ntshilejilu kayi tshidi tshileja ne: bantu bavua badipisha kabavua batshina bua kuya kudi Yezu? Bua tshinyi bualu ebu budi ne mushinga?

¹¹ Bantu bavua badipisha bua malu mabi abu bavua baya pabu kudi Yezu kakuyi lutatu to. Tshilejilu, dituku dikuabu pavua Yezu udia kua Mufalese kampanda, mukaji mukuabu uvua mumanyike bikole bua malu ende mabi wakalua kutua binu ku makasa a Yezu, udila bua muvuaye muenze malu mabi. Wakabolesha makasa a Yezu ne binsonji ne kuakupula ne nsuki yende. Muena kumbelu wakalukila tshianyima ne kutuadija kupisha Yezu bua muvuaye mulekele mukaji au umulenga. Kadi Yezu wakela mukaji au kalumbandi bua muvuaye munyingalale ne muoyo mujima ne  kumujadikila mudi Yehowa mumufuile luse. (Luka 7:36-50) Nangananga lelu, muntu yonso udi udipisha bua bubi budiye muenze udi ne bua kuya kayi utshina kudi bantu badi mua kumuambuluisha bua kulengeja malanda ende ne Nzambi. Bua tshinyi Yezu uvua mumanye kusomba ne bantu?

12. Bua tshinyi kabiena bitukemesha bua muvua Yezu mumanye kusomba ne bantu?

¹² Tuvuluke ne: Yezu uvua widikija Tatuende wa mu diulu mu malu onso. (Yone 14:9) Bible udi utuambila ne: Yehowa ‘kena netu kule kudi muntu ne muntu.’ (Bienzedi 17:27) Yehowa utu ‘umvua milombu’ udi witaba basadidi bende bonso ba lulamatu ne bantu bonso badi bamukeba ne muoyo mujima bua kumuenzela mudimu. (Musambu 65:2) Kabienaku bikukemesha bua kumona ne: Muntu udi ne bukole kupita bantu bonso ne udi ku mutu kua bionso udi kabidi pabuipi ne bantu anyi? Anu bu Tatuende, Yezu mmunange bantu. Mu nshapita yalonda, netuakule bua dinanga dikole divuaye nadi. Kadi bantu bavule bavua balua kudiye bualu bivua bimueneka patoke muvuaye mubanange. Tumonayi imue ya ku ngikadilu yende ivua ileja dinanga edi.

13. Baledi badi mua kuidikija Yezu bishi?

¹³ Bantu bavua bamona diakamue muvua Yezu utabalela yonso wa kudibu. Nansha pavuaye mu ntatu, kavua upanga kutabalela bantu to. Anu mutuvua bamone, pavua baledi balue ne bana babu kudi Yezu, wakabakidila bimpe nansha muvuaye ne bia bungi bia kuenza ne muikale ne majitu a bungi. Mmushile baledi tshilejilu tshimpe tshitambe. Lelu eu kukolesha bana ki mbualu butekete to. Kadi mbimpe bana bamone mudi baledi babu basue kuikala pabuipi nabu. Biwikala udi muledi, udi mumanye ne: kutu misangu iutu ne bia bungi bia kuenza ne upangila dîba dia kusomba ne bana bebe mudibi bikengela. Kadi mbimpe kubajadikila ne: neutangile bualu buabu diakamue paudi ujikija tshiudi wenza. Wewe mukumbaje dilaya  diebe, bana nebamone: kuikala ne lutulu kutu kufuta. Nebamone kabidi ne: nansha bobu balue kukukuatshila bualu bua mushindu kayi, neubakidile bimpe.

14-16. (a) Mbualu kayi buvua busake Yezu bua kuenza tshishima tshiende tshia kumpala? Bua tshinyi tshivua tshishima tshia dikema? (b) Tshishima tshia Yezu tshidi tshileja ne: uvua muntu wa mushindu kayi? Udi upesha baledi dilongesha kayi?

¹⁴ Yezu uvua uleja bantu muvua ntatu yabu imutonda pende. Tshilejilu, tuakule bua tshishima tshia kumpala tshiakenzaye. Uvua mubuele mu tshibilu tshia dibaka mu Kana, tshimenga kampanda tshia mu Galela. Lutatu lua tshimpitshimpi luakamueneka bualu mvinyo uvua mujike. Mamuende Mariya wakamukuatshila lutatu alu. Yezu wakenza tshinyi? Wakambila bena mudimu bua kuuja milondo minene isambombo ne mâyi. Pakalabula mulombodi wa tshibilu mâyi au, biakamukemesha bua muvuawu malue mvinyo muimpe mutambe. Yezu uvuaku muenze mayele bua kudinga bantu anyi? Tòo, mâyi avua ‘makudimuke mvinyo’ wetu wa bushuwa eu. (Yone 2:1-11) Bantu mbatete katshia ku kale bua kukudimuna tshintu kampanda bua kuluatshi tshintu tshikuabu. Tshilejilu, bantu batu bateta kukudimuna biamu kampanda mu bikuabu mbatete munkatshi mua bidimu bia bungi bua kushintulula tshiamu tshia plomb bua kuluatshi tshia or. Kabatu banji kukokesha nansha mudi plomb ne or bienza ne bintu bifuanangane. * Netuambe tshinyi bua mâyi ne mvinyo? Mâyi mmenza ne bintu binene bibidi patupu. Kadi mvinyo yeye mmuenza ne bintu binene bitue ku tshinunu, biobi pabi bikale ne bintu bia bungi munda muabi. Bua tshinyi Yezu uvua muenze tshishima tshinene atshi anu bua kujikija lutatu lukese lua mvinyo uvua mujike mu tshibilu tshia dibaka?

¹⁵ Lutatu alu kaluvua lukese bua bantu bavua baselangane to. Kale mu Isalele, kuakidila bantu kuvua ne mushinga wa  bungi. Bu mvinyo mujike mu tshibilu tshia dibaka, mulume ne mukaji bavua baselangane bavua mua kumvua bundu bua bungi. Bualu abu buvua mua kunyanga tshibilu tshiabu ne bavua mua kushala banyingalala munkatshi mua bidimu bia bungi. Bualu abu buvua bubatonde ne buvua butonde kabidi Yezu. Ke bualu kayi wakenza tshishima bua kubambuluisha. Udiku umona tshivua tshisaka bantu bua kulua kumukuatshila malu abu anyi?

¹⁶ Baledi badi kabidi mua kulongela bualu bukuabu mu tshivua tshienzeke atshi. Udi mua kuenza tshinyi muanebe yeye mulue kukuatshila bualu budi bumutonde? Udi mua kumvua bua kumuambila mudi bualu buende bukese anyi udi nansha mua kumvua tuseku bua bualu abu. Paudi ufuanyikija malu audi nawu, udi mua kumona ne: bualu bua muana mbukese menemene. Kadi kupu muoyo ne: ki mbukese kudiye to. Pikala bualu abu butonda muntu uudi munange bikole, kabuenaku mua kukutonda pebe anyi? Wewe uleja muanebe ne: malu adi mamutonde mmakutonde pebe, kakuikala utshina bua kukukuatshila malu ende to.

17. Yezu mmushiye tshilejilu kayi tshia bupole malu? Bua tshinyi ngikadilu eu udi uleja bukole budi nabu muntu?

 ¹⁷ Anu mutuvua balonge mu nshapita 3, Yezu uvua mupole malu ne udipuekesha. (Matayo 11:29) Bupole malu nngikadilu mulenga bikole udi uleja mudi muntu muikale udipuekesha mu muoyo wende. Ngumue wa ku ngikadilu idi nyuma wa Nzambi usaka bantu bua kupeta ne udi umvuangana ne meji a Nzambi. (Galatia 5:22, 23; Yakobo 3:13) Yezu uvua udikanda nansha pavuabu bamuamba mêyi mabi. Kavua mutebelele bualu uvua mupole malu to. Muntu mukuabu wakamba bua ngikadilu eu ne: “Munyima mua bupole malu mudi bukole bu bua tshiamu.” Bushuwa, bitu bikole bua kudikanda ne kuenzela bantu malu ne lutulu. Kadi ne diambuluisha dia Yehowa, tudi mua kuidikija Yezu ne kulua bapole malu ne bantu kabakuikala batshina bua kulua kutudi.

18. Fila tshilejilu tshidi tshileja muvua Yezu kayi muena malu makole. Udi wela meji ne: ngikadilu eu udi wenza bua muntu amanye kusomba ne bantu bua tshinyi?

¹⁸ Yezu kavua muena malu makole to. Pavuaye muye mu Tulo, mamu mukuabu wakalua kudiye bualu muanende uvua ‘ukenga bikole bua demon uvua munda muende.’ Yezu wakamuleja mu mishindu isatu ne: kavua musue kumuenzela tshivuaye ukeba to. Tshia kumpala, wakashala mupuwe; tshibidi, wakamuambila tshivuaye ubengela ne tshisatu, wakamupesha tshilejilu bua kumumvuija bimpe tshivuaye ubengela. Kadi uvuaku mumuandamune ne tshibengu anyi mu mushindu mubi anyi? Uvuaku mumuleje ne: uvua mu njiwu bualu uvua ubenga tshivua muntu munene bu yeye umuambila anyi? Tòo, mamu au kavua mudimone mu njiwu to. Kakalomba anu diambuluisha to, kadi wakatungunuka ne kumusengelela nansha muvuabi bimueneka ne: kavua musue kumuambuluisha. Yezu wakamona ditabuja dikole divua disaka mamu au bua kutungunuka ne kumusengelela, ke kuondopaye muanende. (Matayo 15:22-28) Kakuyi mpata, bantu bavua balua kudi Yezu bualu kavua ne malu makole, uvua ubateleja ne ushintulula lungenyi luende pavuabi bikengela.

19. Ntshinyi tshidi mua kutuambuluisha bua kumanya ne: tudi bamanye kusomba ne bantu?

¹⁹ Bantu batu basue kudiumvua ne: mbamanye kusomba ne bantu. Tshilejilu, bantu badi ne bumfumu kampanda batu basue kuamba ne: tshiibi tshiabu tshitu anu tshiunzulula bua bantu badibu balombola balue kubakuatshila malu abu. Kadi Bible udi utudimuija wamba ne: ‘Ba bungi badi badiamba ne: Tudi bena luse; kadi udi mua kusangana muntu udi mua kueyemenyibua nganyi?’ (Nsumuinu 20:6) Mbipepele bua kuamba mutudi bamanye kusomba ne bantu, kadi tudiku tusomba nabu bimpe bu Yezu anyi? Tudi mua kupeta diandamuna ku lukonko elu bilondeshile mudi bakuabu batumona, kadi ki mmutudi tudimona. Paulo wakamba ne: ‘Bupole buenu bumanyishibue kudi bantu bonso.’ (Filipoi 4:5) Mbimpe yonso wa kutudi adiebeje ne: ‘Mmushindu kayi utu bakuabu bammona? Ntu ne lumu kayi?’

20. (a) Bua tshinyi mbimpe bakulu bena Kristo bamanye kusomba ne bantu? (b) Bua tshinyi tudi ne bua kuikala ne lungenyi luimpe bua malu atudi tuindila kudi bakulu?

²⁰ Nangananga bakulu bena Kristo ke badi badienzeja bua kumanya kusomba ne bantu. Mbasue kukumbaja tshidi Yeshaya 32:1, 2 wamba ne: ‘Muntu neikale bu tshisokomenu ku tshipepele, ne tshinyemenu tshia ku tshipupu, neikale bu misulu ya mâyi mu muaba muume, bu dileji dia dibue dinene mu buloba budi butondesha bantu.’ Bua mukulu kulamaye bantu bimpe, kubakolesha ne kubasamba, udi ne bua kumanya  kusomba nabu. Kabitu anu bipepele bua bakulu kuenza nunku to, bualu badi ne majitu a bungi mu tshikondo tshikole etshi. Nansha nanku, badi badienzeja bua kubenga kuleja bu ne: kabena ne dîba dia kutangila majinga a mikoko ya Yehowa. (1 Petelo 5:2) Bena mu tshisumbu bakuabu badi badienzeja bua kuikala ne lungenyi luimpe bua malu adibu bindila kudi bakulu ba lulamatu aba, ne badi badipuekesha ne babelesha diboko.​—Ebelu 13:17.

21. Ntshinyi tshidi baledi ne bua kuenza bua bana kabikadi batshina bua kuyukila nabu? Netuakule bua tshinyi mu nshapita udi ulonda?

²¹ Baledi batu badienzeja bua kuteleja bana babu dîba dionso didibu nabu dijinga. Kadi ki mbipepele to. Mbasue bua bana babu bamanye ne: badi mua kubeyemena. Ke bualu kayi batu badienzeja bua kuikala bapole malu, kabayi ne malu makole, kabayi batandisha muana diakamue padiye ubatondela tshilema kampanda anyi uleja lungenyi lubi. Padi baledi balongesha bana babu ne lutulu luonso, badi badienzeja bua kuikala kuyukila nabu misangu yonso. Bushuwa, tuetu bonso tudi basue kusomba bimpe ne bantu anu bu Yezu. Mu nshapita udi ulonda, netuakule bua muvua Yezu mumanye kuditeka pa muaba wa bakuabu ne ngikadilu eu uvua kabidi ukoka bantu kudiye.