1-3. Njiwu kayi idi ifikila Yezu? Ntshinyi tshidiye wenza?

 TSHISUMBU tshia bantu tshidi tshienda tshikeba Yezu bua kumukuata. Munkatshi muabu mudi bantu badi bambula miele ne mitshi, ne mudi kabidi basalayi. Badi benda mu njila ya mu Yelushalema idi ne mîdima ne badi basabuka tshibanda tshia Kidilona batangile ku Mukuna wa Olive, benze anu bu ne: badi ku bukokeshi bua bukole kampanda bubi. Nansha mudi ngondo mukenkeshe bikole, badi ne bimunyi ne miendu. Mbambule bimunyi ne miendu bualu biululu mbijike bukenke bua ngondo anyi? Peshi badi bela meji ne: udibu bakeba udi mua kusokoma miaba idi mîdima? Katuena bamanye tshidibu bambuluile bintu ebi, kadi tshitudi bamanye ntshia se: muntu udi wela meji ne: Yezu udi mua kunyema bua buôwa ki mmumumanye bimpe to.

² Yezu mmumanye bimpe njiwu ikadi pa kumukuata. Nansha nanku, udi ushala muyindile. Tshisumbu tshia bantu tshidi tshifika muaba udiye, tshilombola kudi Yudasa uvua mulunda munene wa Yezu kumpala. Yudasa udi utungila Yezu uvua mfumuende kumpala kayi ne bundu, umumanyisha kudi bakuabu padiye umuela muoyo ne umutua mishiku ya lubombo. Kadi Yezu kena ulubakana to. Udi uya kudi tshisumbu tshia bantu ne ubebeja ne: “Nudi nukeba nganyi?” Badi bamuandamuna ne: ‘Yezu wa ku Nazaleta.’

³ Bantu ba bungi bavua mua kuzakala kumpala kua bantu bavua ne bia mvita abu. Pamuapa ke tshivua bantu abu basue bua Yezu kuenza. Kadi kena utshina, kena unyema anyi ushima bua kudisungila to. Udi ubambila ne: “Mmeme” eu. Bantu abu badi bakema bua lutulu ne dikima bidi nabi Yezu. Badi bapingana tshianyima ne bakuluka panshi!​—Yone 18:1-6; Matayo 26:45-50; Mâko 14:41-46.

4-6. (a) Bible udi ufuanyikija Muana wa Nzambi ne tshinyi? Bua tshinyi? (b) Tela mishindu isatu ivua Yezu muleje dikima.

 ⁴ Bua tshinyi Yezu wakatantamena lutatu lukole elu ne lutulu luonso? Bualu uvua ne dikima. Dikima didi munkatshi mua ngikadilu idi mfumu ne bua kuikala nayi, ne kakuena muntu ukatu muleje ngikadilu eu bu Yezu to. Mu nshapita mushale, tuvua balonge muvua Yezu udipuekesha ne muikale mupole malu. Ke bualu kayi bavua bamubikila ne: ‘Muana wa mukoko.’ (Yone 1:29) Kadi Bible udi ubikila Yezu mu mushindu mukuabu bua dikima diende. Udi wamba bua Muana wa Nzambi ne: ‘Tangila, Ntambue wa mu tshisamba tshia Yuda.’​—Buakabuluibua 5:5.

⁵ Nyama wa ntambue utu uleja dikima. Ukatu mutuilangane mpala ne mpala ne ntambue mukole anyi? Pikalabi bikadi bikuenzekele, uvua mua kuikala mu bukubi bualu nyama eu uvua mu lupangu luende lua tukanu, muaba utubu balamina nyama. Nansha nanku, uvua mumvue anu buôwa. Paudi utangila nyama eu wa bukole bupite bungi, kuena mua kuela meji ne: udi mua kutshina peshi kunyema tshintu nansha tshimue to. Bible udi wamba ne: ‘Nyama wa ntambue udi upita nyama yonso bukole, kena wapuka bua kushila mukuabu njila.’ (Nsumuinu 30:30) Kristo udi ne dikima anu bua dia ntambue.

⁶ Tukonkonone mishindu isatu ivua Yezu muleje dikima bu dia ntambue eyi: pavuaye wakuila bulelela, wimanyina buakane ne pavuabu bamuluisha. Netumone kabidi ne: tuetu bonso tudi mua kuidikija Yezu bua kuikala ne dikima, nansha tuetu katuyi nadi dia ku tshilelelu.

7-9. (a) Ntshinyi tshivua tshienzeke pavua Yezu ne bidimu 12? Buebe wewe, ntshinyi tshivua mua kukuenza buôwa mu bualu abu? (b) Mmushindu kayi uvua Yezu muleje dikima kumpala kua balongeshi ku ntempelo?

⁷ Bu mudi Satana ‘tatu wa dishima’ ukokesha buloba, tudi ne bua kuikala ne dikima bua kuakuila bulelela. (Yone 8:44; 14:30)  Yezu kavua muindile bua alue muntu mukole bua kuakuila bulelela to. Tshilejilu, patshivuaye ne bidimu 12, wakashala nkayende mu Yelushalema kunyima kua tshibilu tshia Kupita kua Yehowa. Baledi bende Yosefe ne Mariya bakamukeba munkatshi mua matuku asatu. Ndekelu wa bionso kumupetabu ku ntempelo. Uvua wenzaku tshinyi? Uvua ‘mushikame munkatshi mua bayishi, umvua mêyi abu, ubakonka malu.’ (Luka 2:41-50) Tukonkonone muaba ne mushindu uvua muyuki au muenzeke.

⁸ Bafundi ba malu a kale badi bamba ne: bamue bamfumu ba tshitendelelu tshia bena Yuda bavua ne tshibidilu tshia kushala ku ntempelo kunyima kua bibilu ne balongesha bantu mu lutanda kampanda lua mu ntempelo. Bantu bavua basomba ku makasa abu bua kubateleja ne kubela nkonko. Balongeshi abu bavua bamanye mukanda bikole. Bavua bamanye bikole Mikenji ya Mose ne mikenji mikuabu ivua bantu bele ne bilele bipite bungi bivua bienda bivulangana mu kupita kua bidimu. Uvua mua kudiumvua mushindu kayi bu wewe musombe munkatshi muabu? Kuvuaku mua kuikala uditshina anyi? Kadi elabi meji bu wewe muikale ne bidimu 12. Bana ba bungi batu ne bundu. (Yelemiya 1:6) Bamue ba kudibu batu benza muabu muonso bua kubenga kukoka ntema ya balongeshi babu mu kalasa, batu batshina bua kababedi nkonko, kababasungulu anyi kababaseki.

⁹ Kadi Yezu uvua yeye musombe munkatshi mua balongeshi banene abu, ubela nkonko mikole ne dikima dionso. Kavua anu mushikile apu to. Bible udi wamba ne: ‘Bantu bonso bakadi bumvua mêyi ende bakakema bualu bua lungenyi luende ne bualu bua mêyi akabandamunaye.’ (Luka 2:47) Bible kena utuambila tshivuaye muambe to, kadi tudi batuishibue ne: kavua muambulule malongesha a dishima avua matangalake munkatshi mua balongeshi abu to. (1 Petelo 2:22) Wakakula malu malelela adi mu Dîyi dia Nzambi, ne bantu bakakema bua dimanya ne dikima bivua nabi muana wa bidimu 12 au.

10. Mmushindu kayi udi bana bena Kristo baleja dikima bu dia Yezu lelu?

 ¹⁰ Lelu eu, bana ba bungi bena Kristo badi balonda tshilejilu tshia Yezu. Kabena bapuangane bu Yezu to, kadi anu bu yeye kabena bindila pakolabu bua kushishabu kuakuila bulelela to. Mu tulasa ne miaba idibu basombele, badi bela bantu nkonko ne bukalanga, babateleja ne pashishe babaleja tshidi Bible wamba ne kanemu kuonso. (1 Petelo 3:15) Bana aba mbambuluishe balongi nabu, balongeshi ne bena mutumba bua kuluabu bayidi ba Kristo. Dikima diabu didi disankisha Yehowa bikole. Dîyi dia Nzambi didi difuanyikija bana aba ne lumuma bualu badi bakolesha bantu bakuabu, babasankisha ne bikale ba bungi.​—Musambu 110:3.

11, 12. Mmushindu kayi uvua Yezu muakuile bulelela pakakolaye?

¹¹ Nansha pakakola Yezu, uvua anu wakuila bulelela ne dikima dionso. Pakatuadijaye mudimu wende wa kuyisha wakapetangana ne bualu budi mua kuenza bantu ba bungi buôwa. Tshikondo atshi Yezu kavua mfumu wa banjelu to, uvua muntu wetu wa mâyi ne mashi eu. Kadi uvua ne bua kutuilangana ne Satana muluishi mutambe bunene wa Yehowa. Yezu wakabenga tshivua Satana umuambila ne kuleja muvuaye mukonyangaje mêyi a mu Bible. Yezu wakakosa muyuki wabu au pakamuambilaye ne dikima dionso ne: “Satana, umuka.”​—Matayo 4:2-11.

¹² Muaba eu Yezu wakaleja muvuaye ne bua kuikala wenza mudimu wende wa kuakuila Dîyi dia Tatuende kumpala kua bantu bavua badikonyangaja ne badiumvuija bibi. Mu tshikondo atshi bavua bashima bantu mu malu a Nzambi anu bu mudibi lelu. Yezu wakambila bamfumu ba tshitendelelu ne: ‘Nudi nuona dîyi dia Nzambi bualu bua tshilele tshienu tshinuakuyisha bantu.’ (Mâko 7:13) Nansha muvua bantu batumbisha bamfumu abu, Yezu wakabela patoke ne dikima dionso, kubambilaye muvuabu balombodi bafofo ne bena lubombo. * (Matayo 23:13, 16) Mmushindu kayi utudi  mua kuidikija dikima dia Yezu?

13. Nansha mutudi ne bua kuidikija Yezu, ntshinyi tshitudi ne bua kuvuluka? Kadi ndiakalenga kayi ditudi nadi?

¹³ Tuvuluke ne: tuetu katuena ne bukokeshi bua kumanya malu adi munda mua bantu bu Yezu anyi bua kubalumbuluisha to. Kadi tudi mua kuikala ne dikima bu diende bua kuakuila bulelela. Tshilejilu, patudi tuela patoke malongesha a dishima adi bena mu bitendelelu bia dishima balongesha bua Nzambi, bua malu adiye mulongolole ne bua Dîyi diende, tudi tukenkeshila bantu badi Satana mupambuishe butoke. (Matayo 5:14; Buakabuluibua 12:9, 10) Tudi tupikula bantu ku bupika bua malongesha a dishima adi uwuja mitshima yabu ne buôwa ne anyanga malanda abu ne Nzambi. Tudi ne diakalenga dia kumona dikumbana dia mêyi a Yezu a ne: ‘Bulelela nebunupe budishikaminyi.’​—Yone 8:32.

14, 15. (a) Mmushindu kayi uvua Yezu muleje tshidi “malu mimpe” anyi buakane? (b) Ndungenyi kayi lubi luvua Yezu kayi nalu pakayukilaye ne mukaji muena Samalea?

¹⁴ Bible ukavua mudianjile kuamba ne: Masiya uvua ne bua kumvuija bantu tshidi “malu mimpe” anyi buakane. (Matayo 12:18; Yeshaya 42:1) Yezu wakatuadija kuenza bualu ebu pavuaye pa buloba. Uvua wenzela bantu malu makane ne dikima dionso ne kavua ne kansungasunga to. Tshilejilu, wakabenga bua kulonda lungenyi lua ditapululangana ne lua  kusungulujangana luvua lutangalake mu tshikondo tshiende.

¹⁵ Bayidi bende bakakema bikole pakamusanganabu uyukila ne mukaji muena Samalea ku tshina tshia mâyi tshia Suka. Bua tshinyi? Bualu bena Yuda bavua bakine bena Samalea kukavua bidimu bia bungi. (Ezela 4:4) Pashishe, balongeshi ba mikenji bakuabu kabavua bangata bantu bakaji ne mushinga to. Mikenji yabu yakaluabu kufunda pashishe, ivua ikandika bantu balume bua kuyukila ne bantu bakaji ne ivua ileja kabidi ne: kabivua bimpe bua kulongesha bakaji mikenji ya Nzambi to. Bavua bamona bakaji bena Samalea bu bantu kabayi bakezuke. Yezu kakalonda lungenyi luabu alu to, kadi wakalongesha mukaji muena Samalea uvua ne nsombelu mubi, ne kumuleja patoke ne: uvua Masiya.​—Yone 4:5-27.

16. Bua tshinyi bena Kristo badi ne bua kuikala ne dikima dia kushilangana ne bantu badi ne kansungasunga?

¹⁶ Ukatuku mutuilangane ne bantu badi ne kansungasunga ka bungi anyi? Badi mua kuikala ne tshilele tshia kuneka bantu ba tshisamba tshikuabu anyi ba dikoba dikuabu, kupepeja bantu bakaji anyi bantu balume peshi kuakula bibi bua bapele anyi babanji. Bayidi ba Kristo kabatu bitaba meji mabi a mushindu eu to, ne batu benza muabu muonso bua kumbusha mu mioyo yabu kansungasunga kuonso. (Bienzedi 10:34) Tuetu bonso tudi ne bua kuikala ne dikima bua kubenga kuikala ne kansungasunga.

17. Ntshinyi tshivua Yezu muenze ku ntempelo? Bua tshinyi?

¹⁷ Dikima divua kabidi disake Yezu bua kudifilaye bikole bua kulama tshisamba tshia Nzambi ne ntendelelu wende bikezuke. Dituku dikuabu ku ntuadijilu kua mudimu wende, wakumvua bibi pakamonaye bangenda mushinga ne bashintakaji ba makuta bendela mushinga wabu ku ntempelo mu Yelushalema. Wakumvua tshiji ne kuipata bantu abu mu ntempelo ne bintu biabu. (Yone 2:13-17) Wakenza bualu bua muomumue pabuipi ne ku ndekelu kua mudimu wende. (Mâko 11:15-18) Kakuyi mpata, malu aa avua mamukebele baluishi ba bungi, kadi kavua utshina to. Bua tshinyi? Bualu katshia  ku buana buende, uvua ubikila ntempelo ne: nzubu wa Tatuende ne ke tshivua nzubu au menemene. (Luka 2:49) Kunyanga muaba uvuabu batendelela Tatuende mbualu bubi buvuaye kayi mua kuitaba to. Tshisumi tshiende tshiakamusaka bua kuenza tshivua tshikengela ne dikima dionso.

18. Mmushindu kayi udi bena Kristo mua kuleja dikima bua kulama tshisumbu tshikezuke?

¹⁸ Lelu, bayidi ba Kristo badi baditatshisha bia muomumue bua kulama tshisamba tshia Nzambi ne ntendelelu wende bikezuke. Padibu bamona muena Kristo nabu wenza bualu bubi, kabena babuikila mêsu to. Badi bamuleja bubi buende ne dikima dionso anyi bambila bakulu. (1 Kolinto 1:11) Badi benza muabu muonso bua bakulu ba mu tshisumbu bamanye bualu abu. Bakulu badi mua kuambuluisha muanetu udi muenze bubi, ne kuenza kabidi tshidi tshikengela bua kulama tshisumbu tshia mikoko ya Yehowa tshikezuke.​—Yakobo 5:14, 15.

19, 20. (a) Mmalu mabi kayi avuaku mu tshikondo tshia Yezu? Bakamusaka bua kuenza tshinyi? (b) Bua tshinyi bayidi ba Kristo kabena babuelakana mu malu a tshididi ne a tshikisu? Ndisanka kayi didibu bapete?

¹⁹ Nunku, tudiku mua kuamba ne: Yezu uvua musue kujikija kansungasunga pa buloba bujima anyi? Malu mabi avua enzeka miaba yonso. Ditunga diabu divua ku bukokeshi bua bena Lomo. Basalayi ba bena Lomo bavua bakengesha bena Yuda, babafutshisha bitadi bia bungi ne badibuejakaja too ne mu malu a ntendelelu wabu. Kabiena bikemesha bua muvua bantu ba bungi bajinga bua Yezu aditue mu malu a tshididi a mu tshikondo tshiende. (Yone 6:14, 15) Mu muanda eu kabidi, Yezu uvua ne bua kuikala dikima.

²⁰ Yezu wakambila bantu ne: Bukalenge buende kabuvua bua pa buloba to. Tshilejilu tshiende tshiakalongesha bayidi bende bua kababuelakanyi mu malu a tshididi a mu tshikondo atshi, kadi badifile mu mudimu wa kuyisha lumu luimpe lua Bukalenge bua Nzambi. (Yone 17:16; 18:36) Pakaluabu bua kumukuata, wakabalongesha bua kubenga kubuelakana mu malu a pa buloba. Petelo wakatula diakamue  muele wende ne kutapa umue wa ku bantu bavua balue kukuata Yezu. Mbipepele bua kuditeka pa muaba wa Petelo. Bivua mua kumvuika bua muvuaye mutule muele wende butuku abu, bualu kukuata Muana wa Nzambi kayi bualu kuvua bualu bubi butambe. Kadi Yezu wakambila Petelo dîyi divua ne bua kuludika bayidi bende too ne lelu pakambaye ne: ‘Pingaja muele webe mu muaba wawu; bualu bua bonso badi bangata muele nebashipibue ku muele.’ (Matayo 26:51-54) Bayidi ba Kristo bavua ne bua kuikala ne dikima bua kutumikila dîyi dia ditalala edi anu bu mudibi lelu. Bu mudi basadidi ba Nzambi kabayi babuelakana mu malu a panu lelu, ku muele wabu kakuena mashi a bantu badi bafua mu mvita, mu dishipa bantu ba bisamba bikuabu, mu bimvundu ne bienzedi bikuabu bia tshikisu. Dikima ke didi dibambuluishe bua kuikala ne lumu luimpe lua mushindu eu.

21, 22. (a) Ndiambuluisha kayi diakapeta Yezu kumpala kua kupetaye makenga makole? (b) Mmunyi muvua Yezu muikale ne dikima too ne ku ndekelu?

²¹ Muana wa Yehowa ukavua mumanye ne: neapete buluishi bukole pa buloba. (Yeshaya 50:4-7) Bavua basue kumushipa misangu ya bungi too ne muakamufikila bualu butudi balonde ku ntuadijilu kua nshapita eu. Ntshinyi tshivua tshiambuluishe Yezu bua kuikala ne dikima kumpala kua ntatu yonso ivuaye mupete? Ntshinyi tshivuaye wenza kumpala kua tshisumbu tshia bantu kuluatshi bua kumukuata? Uvua usambila Yehowa ne muoyo mujima. Yehowa wakenza tshinyi? Bible udi wamba ne: Yehowa ‘wakamumvuila.’ (Ebelu 5:7) Wakatuma muanjelu bua akoleshe Muanende uvua ne dikima.​—Luka 22:42, 43.

²² Muanjelu mumane kumukolesha, Yezu wakambila bapostolo bende ne: ‘Bikayi tuye.’ (Matayo 26:46) Mêyi aa adi aleja dikima diende. Pakambaye ne: ‘Bikayi tuye,’ uvua mumanye bimpe ne: uvua ne bua kuambila baluishi  bua balekele balunda bende, balunda bende bonso bavua ne bua kumunyema, ne uvua ne bua kushala nkayende bua kutantamena diteta ditambe onso akavuaye mupete. Uvua nkayende pavuabu bamulumbuluishe mu mushindu uvua kauyi ulonda mikenji, bamuseke, bamukengeshe ne bamushipe mu mushindu mubi. Kadi uvua anu ne dikima kumpala kua ntatu yonso eyi.

23. Bua tshinyi tudi mua kuamba ne: Yezu kavua wenza malu kayi muele meji bua mushindu uvuaye mutantamene ntatu ne lufu?

²³ Yezu uvuaku wenza malu kayi wanji kuela meji anyi? Tòo. Bualu kuenza malu nunku kakuena kupetangana ne kuikala ne dikima dilelela to. Yezu uvua mulongeshe bayidi bende bua kuikalabu ne budimu ne kunyema njiwu bua kutungunuka  ne kuenza disua dia Nzambi. (Matayo 4:12; 10:16) Kadi mu bualu ebu, Yezu uvua mumanye ne: kavua ne tshikuabu tshia kuenza to. Uvua mumanye tshivua disua dia Nzambi dilomba. Bu muvuaye mudisuike bua kushala ne lulamatu, uvua ne bua kutantamena dikenga adi.

24. Ntshinyi tshidi tshitujadikila ne: tudi mua kutantamena mateta a mishindu yonso ne dikima?

²⁴ Misangu ya bungi bayidi ba Yezu batu balonda tshilejilu tshia dikima tshia Mfumuabu. Ba bungi ba kudibu batu bashala ne lulamatu padibu babaseka, babakengesha bikole, babakuata, babela mu maloko nansha padibu kumpala kua lufu. Nkuepi kudi bantu bena mapanga bapetela dikima dia mushindu eu? Kabena badipeta mu bobu nkayabu to. Anu bu Yezu, Nzambi udi ubambuluisha bua kuikalabu ne dikima. (Filipoi 4:13) Nunku, kuikadi ne buôwa bua tshikala mua kukufikila matuku atshilualua to. Ikala mudisuike bua kushala mulamate anu Yehowa ne yeye neakupeshe dikima. Tshilejilu tshia Mfumuetu Yezu tshikukoleshe, bualu wakamba ne: ‘Nukoleshe mitshima yenu; ngakupita ba pa buloba bukole.’​—Yone 16:33.