Mulombodi wa Groupe de la banque mondiale mmufile didimuija mu luapolo lua mu ngondo 6 wa 2022 ne: “Buloba bujima mbufuane kubuelulula kabidi mu lutatu lua malu a makuta. Bua musangu eu, bintu bidi bienda bibanda mushinga bikole kadi mfranga ya kubisumba yenda ikola.”

 Bena Fonds monétaire international badi baleja ne: “Kasolonyi ne biakudia mbibande mushinga anu ne lukasa, bibueje bantu ba mu matunga mapele mu lutatu lupite bukole.”

 Bible udi utuambuluisha bua kumanya bua tshinyi tudi tutuilangana ne ntatu ya malu a makuta ya nunku, mutudi mua kupita nayi, ne ditekemena dia kuikala nadi dia muajika malu aa bua kashidi.

•   Bible udi ubikila tshikondo tshitudi etshi ne: ‘Mmatuku a ku nshikidilu.’​—2 Timote 3:1.

•   Yezu wakamba muvua “malu adi akuatshisha buôwa” mua kuenzeka mu matuku etu aa. (Luka 21:11) Bantu badi ne buôwa bua mudi bintu bibanda mushinga bikole. Badi basamisha mutu bua tshikalabu matuku kumpala anyi badiebeja muikalabu mua kukumbajila mêku abu bidiwu akengela.

•   Mukanda wa Buakabuluibua ukavua muakule bua dibanda dia biakudia mushinga mu tshikondo etshi mu mêyi aa: “Meme kumvua bu diyi . . ., diamba ne: ‘Kilo umue wa ntete ya kuenza bukula, nansha kilo isatu ya ntete ya orje ikale [mushinga wa] difutu dia mudimu wa dituku dimue.’”​—Buakabuluibua 6:6, Mukanda wa Mvidi Mukulu [wa Mishonyi].

 Bua kumanya malu makuabu a “matuku a ku nshikidilu” ne a mêyi a buprofete adi mu mukanda wa Buakabuluibua, tangila filme wa Malu a panu mmashintuluke katshia ku 1914, ne ubale tshiena-bualu tshia “Bendeshi ba tubalu banayi mbanganyi?”

•   “Nebase nzubu ne nebasombelamu, ne nebadime madimi a tumuma tua mvinyo ne nebadie tumuma tuawu. Kabakuibaka bua muntu mukuabu asombelamu, ne kabakukuna bintu bua bantu bakuabu babidie.”​—Yeshaya 65:21, 22.

•   “Nekuikale ntete ya bungi pa buloba; neyivulangane bikole pa nsongo ya mikuna.”​—Misambu 72:16.

•   “‘Bu mudibu bakengesha bakengi ne bua mikemu ya bapele, nenjuke bua kuenza bualu,’ ke mudi Yehowa wamba.”​—Misambu 12:5. a

 Mu katupa kîpi emu, Nzambi neajikije kansungansunga mu malu a mabanji pa buloba bujima. Bua kumanya tshienzaye, bala tshiena-bualu tshia “Bantu bonso pa buloba badi mua kulua babanji anyi?”

 Nansha mpindieu kabidi, Bible udi mua kukuambuluisha bua kumanya mua kupita ne malu a dibanda dia bintu mushinga. Mushindu kayi? Udi ne mibelu mimpe ya meji ya mua kulobelela makuta. (Nsumuinu 23:4, 5; Muambi 7:12) Bua kumanya malu makuabu, bala tshiena-bualu tshia “Kuba makuta ne bintu biebe” ne tshia “Muudi mua kutula makuta makese audi nawu.”