Mu dia matuku 9/10/2024, Fonds mondial pour la nature (Bulongolodi budi butangila malu a nyama pa buloba bujima) buakapatula luapolo lubi lua dikema lua tshidi bantu benzela nyama. Luakaleja ne: “Mu bidimu bipite pa 50 bishale ebi (1970-2020), bungi bua nyama mbukepele bikole bia pa lukama 73 kupita muvuayi.” Luapolo alu luakafila didimuija edi: “Ki mbanekeshe padibu bamba ne: malu enzeka mu bidimu bitanu kumpala eku adi aleja muikala nsombelu pa buloba.”

 Kabiena bikemesha bua mudi bantu ba bungi banyingalala bua luapolo ya nunku to. Tutu banange buloba buetu bulenga ebu bikole ne katutu basue kumona nyama ikenga to. Tutu tumvua nanku bualu Nzambi mmutufuke bua tuikale tutabalela nyama.​—Genese 1:27, 28; Nsumuinu 12:10.

 Nunku udi pamuapa udiebeja ne: ‘netukokeshe bua kukuba nyama anyi? Ntshinyi tshidi Bible wamba?’

 Nansha mutudi tuenza muetu muonso bua kukuba nyama, anu Nzambi ke wakumbana bua kuyikuba. Bible udi ulaya mu Buakabuluibua 11:18 ne: Nzambi ‘neabutule badi babutula buloba anyi babunyangakaja.’ Mvese eu udi utulongesha malu abidi aa:

1.  1. Nzambi neajimije bua kashidi bantu badi babutula buloba anyi babunyangakaja.

2.  2. Mmushindu kayi utudi bamanye ne: Nzambi neenze bualu ebu? Bualu bidi bimueneka lelu ne: bantu nebanyange buloba mu mushindu mubi kupita kumpala.

 Nzambi neenze tshinyi bua kujikija lutatu elu? Neenze mudimu ne mbulamatadi wende wa mu diulu anyi Bukalenge buende bua kukokesha pa buloba bujima. (Matayi 6:10) Mbulamatadi eu nealongeshe bantu badi batumikila malu adi akengela bua bobu kutabalela nyama ne kuyikuba.​—Yeshaya 11:9.