Bang’ ka nosebatis Zarina mobedo achiel kuom Joneno mag Jehova, nodar mowuok e piny Russia modok thurgi ma ni Central Asia. Nong’ado e chunye ni ne nyaka opuonj nyige ariyo adiera mag Muma. Nikech weche mag yuto ne ok yot ne Zarina, ne ochune dak e ot moro gi jonyuolne kaachiel gi owadgi gi chi owadgi. Jonyuolne nokwere ni kik opuonj nyigego adiera mag Muma. Bende, ne ginyiso nyirigo ni kik giwuo gi min-gi e wi gimoro amora motudore gi Muma.

 Zarina noparo matut kaka nonyalo puonjo nyigego weche Jehova. (Ngeche 1:8) Nolemo gi kinda kokwayo Jehova mondo otaye kendo omiye rieko. Zarina nochako timo gik ma ne luwore gi lamo mage. Nojadhiga bayo gi nyigego kendo sama ne gin e bayogo, nowuoyoga kodgi e wi gik miwuoro ma Jehova nochueyo. Mano nokonyo nyigego hero Jachuech.

 Bang’ mano, Zarina nofwenyo yo moro ma nonyalo chako puonjorego gi nyige bug Ang’o ma Muma Puonjo Kuom Adier? a Nondiko paragraf moko mag bugno kod penjo mogol e bugno e kalatese matindo tindo. Nondiko bende sentens moko mayot mondo okony nyigego winjo tiend weche moko. Kae to nopando gigo kaachiel gi kalatese kod pensil e bwo masin mar lwoko lewni ma ne nitie e baf. Sama nyigego ne ni kama ginindoe, ne ginyalo somo paragrafgo kendo ndiko dwoko mag penjo e kalatese ma Zarina nomiyogi.

 Zarina notiyo gi yorno e puonjore sula ariyo mag bug Muma Puonjo gi nyige, ka ne pok oyudo ot machielo ma ne ginyalo dakie gi nyigego. Bang’ dar ma gidhi e odgi, koro nonyalo puonjo nyigego Muma ma onge ng’at ma tame. E dwe mar Oktoba 2016, nyiri ariyogo nobatisi, kendo ne gimor ahinya ka ne giparo kaka min-gi notiyo gi rieko mondo opuonjgi weche Nyasaye.