E ISEWINJO ni punda owuoyo? Inyalo wacho ni, ‘Ooyo. Le ok nyal wuoyo.’ Kata kamano, Muma to wuoyo kuom punda ma ne owuoyo. We mondo wane kaka mano ne otimore.

Jo-Israel oseikore mar donjo e piny Kanaan. Balak, ruodh Moab, oluoro Jo-Israel. Kuom mano, ooro mondo oluongne ng’at moro mariek miluongo ni Balaam mondo obi okuong’ Jo-Israel. Balak singo ni obiro miyo Balaam pesa mang’eny ahinya. Kuom mano, Balaam idho pundane, kendo ochako wuoth mar dhi neno Balak.

Jehova ok dwar ni Balaam okuong’ joge. Kuom mano, ooro malaika gi ligangla mabor mondo ochung’ e yo otam Balaam dhi. Balaam ok ne malaikano. Kata kamano, pundane to nene. Kuom mano, pundano temo mondo kik ochom malaikano tir, to gikone onindo mana e yo. Balaam osin ahinya, kendo ochwado pundane gi luth.

Jehova koro miyo Balaam mondo owinj pundane ka wuoyo kode. Pundano penje ni: ‘Atimoni ang’o mondo omi ichwada?’

Balaam wacho ni: ‘Isemiyo anenora ng’ama ofuwo. Dine bed ni an gi ligangla, danegi!’

Pundano penje ni: ‘Be asetimonie gima kamano nyaka nene?’

‘Ooyo,’ Balaam dwoko.

Koro Jehova miyo Balaam neno malaika mochung’ e yo koting’o ligangla. Malaikano wacho ni: ‘Igoyo pundanino kamano nikech ang’o? Asebiro mondo ageng’i nikech ok onego bed ni idhi kuong’o Jo-Israel. Da bed ni pundani ok obaro, di koro asenegi, to daweyo pundani.’

Balaam wacho ni: ‘Aseketho. Ne ok ang’eyo ni ichung’ e yo.’ Malaikano weyo Balaam mondo odhi, kendo Balaam dhi nyime ma nyaka oneno Balak. Podi otemo ni mondo okuong’ Jo-Israel, to kar timo mano, Jehova miyo ogwedho Jo-Israel nyadidek.