JOGO ma ne ok odonjo e yie, ne dhi nyime gi ngimagi kaka pile. Ne pod ok giyie ni Ataro mar pi ne dhi biro. Nyaka bed ni ne ginyiero wachno ahinya. Kata kamano, nyierogino ne orumo bang’ kinde manok.

Apoya nono pi ne ochako o. Pi ne o ka wuok e kor polo, mana ka pi mipuko koa e ndowo. Kare Noa ne owacho adier! Thuolo mar mondo ng’at machielo odonj ei yie ne onge kendo. Jehova ne oloro dhood yie matek ma ok yawre.

Bang’ kinde matin, pi ne oimo kuonde duto man piny. Pi ne obedo kaka aore madongo. Pi ne lworo kite madongo ka goyo yien piny, kendo ne okelo koko mang’eny ahinya. Luoro ne omako ji. Ne giidho gode. Nyaka bed ni ne gichako parore ni ma dine giwinjo wach Noa mondo gidonj ei yie kane podi ok olor dhoot! To thuolo koro ne onge kendo.

Pi ne omedo idho malo. Kuom ndalo 40 odiechieng’ gi otieno pi ne o piny kawuok e kor polo. Pi ne idho gode, kendo bang’ kinde matin ne oumo kata gode madongo moloyo. Kuom mano, mana kaka Nyasaye ne osewacho, dhano duto gi le ma ne ni oko mar yie, ne otho. To ji duto ma ne odonjo ne okwo.

Noa gi yawuote ne otimo maber gero yie. Pi ne oting’o yie malo, kendo ne olewore e wi pi. Bang’e, chieng’ moro ka koth osechok, chieng’ ne ochako rieny. Ne en gimiwuoro! Nikech ne nitie mana ataro achiel mar pi ma ne okwako piny mangima. Yie ma ne lewore e wi pi ema ne nenore kende.

Joma ne robedeka koro ne onge. Ne ok gidhi betie kendo mondo gihiny ji. Giduto ne githo, kaachiel gi minegi koda ji mamoko maricho duto. To ang’o ma ne otimore ni wuonegi?

Wuone rabedego ne ok gin dhano kaka wan. Ne gin malaike ma ne olor obiro dak e piny kae kaka dhano. Kuom mano, kane Ataro obiro, ne ok githo gi ji mamoko. Ne giweyo tiyo gi ringre mar dhano ma ne giloso, ma gidok e polo kaka malaike. Kata kamano, Nyasaye ne ok orwakogi ei kanyakla mar malaikene. Omiyo ne gibedo malaike mag Satan. Ei Muma, iluongogi ni jochiende.

Nyasaye koro ne omiyo yamo okudho, ma pi atarono ne ochako dok piny. Bang’ dweche abich, yie ne opie e wi got moro. Ndalo mang’eny ne okalo, kendo joma ne ni e yie, ne nyalo neno wi godego ka ging’iyo oko. Pi ne omedo dok piny mos mos.

Kendo Noa ne ogolo oko mar yie winyo marateng’ miluongo ni agak. Ne ofuyo matin koni gi koni kae to kendo oduogo, nikech ne onge kama ber ma ne donyon. Ne omedo timo kamano to oduogo yueyo e yie.

Noa ne dwaro ng’eyo ka be pi ne oseduono e piny, omiyo bang’e ne ochako ooro akuru oko mar yie. Kata kamano, akuru bende ne oduogo nikech ne ok oyudo kar dak. Noa ne ochako oore kendo, to ne oduogo gi it zeituni e dhoge. Kuom mano, Noa ne ong’eyo ni pi osedok piny. Noa ne ochako ooro akuru kendo ndalo mar adek, to wang’ni akuru ne oyudo kar dak.

Koro Nyasaye ne owuoyo gi Noa. Ne owachone niya: ‘Wuogi ia e yie. Kaw joodi kod le duto man kodi.’ Ne oyudo ka gisebedo e yieno kuom ndalo makalo higa achiel. Omiyo wanyalo paro mor ma ne gin-go mar bedo oko mar yie kod mor mar bedo mangima!