NYAKO mineno kae, en jahigini apar gariyo. Yesu omako lwete, to min gi wuon mare ochung’ machiegni kanyo. Be ing’eyo gimomiyo gimor ahinya? We mondo wane.

Wuon nyakono en ng’at maduong’ mong’ere ma nyinge Jairo. Chieng’ moro, nyare bedo matuwo, kendo ipiele e otanda. Kata kamano, ok ochangi. Tuwone medore ameda. Jairo gi chiege chandore ahinya e chunygi, nikech nenore ka gima nyargi matinni dhi tho. En nyargi makende. Kuom mano, Jairo dhi manyo Yesu. Osewinjo wach honni ma Yesu osebedo ka timo.

Jairo ka yudo Yesu, onwang’o ni nitie ji mang’eny molwore. Kata kamano, Jairo kalo e kind ji kendo opodho e tiend Yesu. Owacho kosayo ni: ‘Nyara tuwo matek ahinya. Yie mondo ibi ichange.’ Yesu wachone ni obiro.

Seche ma giwuotho ka gidhi, ji medo dhirore mondo gisud machiegni. Apoya nono, Yesu chung’. Openjo ni: ‘Ng’ano momula?’ Yesu ne owinjo ka teko a kuome, omiyo ong’eyo ni ng’ato oa mule. To en ng’ano momule? En dhako moro mosetuwore kuom higini apar gariyo. Ne osudo machiegni momulo law Yesu ma ochango!

Mani miyo Jairo winjo maber nikech oneno kaka yot ne Yesu chango ji. Kata kamano, jaote moro biro kar sechego. Onyiso Jairo ni, ‘Kik ichand Yesu kendo. Nyari osetho.’ Yesu ka winjo wachno onyiso Jairo ni: ‘Kik iparri, obiro bedo mangima.’

Gikone ka gichopo e od Jairo, ginwang’o ni ji ywagre gi kuyo mang’eny. Kata kamano, Yesu wacho ni: ‘Kik uyuagi. Nyathino ne ok otho. Onindo aninda.’ Gin to ginyiero kendo gijaro Yesu, nikech ging’eyo ni nyathino otho.

Yesu koro kawo wuon nyakono gi min mare kod jootene moko adek, kendo odhi kodgi e ot kama opielie nyathino. Omako lwete to owacho ni: ‘A malo!’ Kendo nyathino chier mana kaka ineno kae. Ochung’ malo, kendo ochako wuotho koni gi koni! Mano e gimomiyo min kod wuon mare mor ahinya.

Mani ok e ng’at ma Yesu okwongo chiero. Ng’at mokwongo ma Muma wuoyo kuome en wuod dhako moro ma chi liel modak e dala mar Nain. Bang’e Yesu bende chiero Lazaro, ma owadgi Mariam kod Maritha. Kinde ma Yesu biro locho kaka ruoth ma Nyasaye oketo, obiro chiero ji mang’eny ahinya. Donge wanyalo bedo mamor nikech mano?