BE DHANO nyalo siko komakore motegno gi Nyasaye sama oromo gi tembe mager, kendo sama oneno ni luwo chike mag Nyasaye ok kelne ber moro amora? Dwoko mar penjono nonenore maler e wi gima notimore ne ng’at moro miluongo ni Ayub.

E kinde ma ne Jo-Israel pod ni Misri, Ayub ma ne en wat Ibrahim nodak kama sani iluongo ni Arabia. E kindeno, malaike manie polo ne ochokore e nyim Nyasaye, kendo Satan ma noseng’anyo bende ne nie kindgi. Jehova nopwoyo Ayub kaka en jatichne momakore kode e nyim jogo duto. Nowacho ni onge ng’ato ang’ata ma timne tir kaka Ayub. Kata kamano, Satan nowacho ni Ayub ne tiyo ne Nyasaye mana nikech Nyasaye ne oseguedhe kendo orite. Nodhi nyime wacho ni ka Nyasaye nyalo mayo Ayub gik moko duto mosemiye, to Ayub nyalo kwede.

Nyasaye noyiene Satan mondo oma Ayub mwandu ma ne en-go, oneg nyithinde, kendo bang’e ogoye gi tuo. Ayub ne ok ong’eyo ni Satan e ma ne kelone tembego duto, omiyo, ne owuoro awuora gimomiyo Nyasaye noweyo mondo tembego oyude. To e ma pod Ayub nodhi nyime makore motegno gi Nyasaye.

Ji adek moko ma ne wuondore ni gin osiepe Ayub nobiro lime. Jogo notemo keto ketho kuom Ayub ka giwacho ni Nyasaye ne kume nikech richo moko ma nosetimo aling’ ling’. Thoth weche ma ne giwachogo ondik e bug Ayub. Bende, ne giwacho ni Nyasaye ok mor gi jotichne kendo ok ogenogi. Ayub notamore yie gi wechegi mag miriambogo. Ayub nowacho gi chir ni obiro siko komakore gi timne matir nyaka otho!

Kata kamano, Ayub noketho ka notemo nyiso ni en ng’at makare ahinya. Rawera moro miluongo ni Elihu, nochiko ite adimba sama jogo duto ne wuoyo. Kae to en bende nochako wuoyo mondo orie paro ma Ayub kod osiepene adekgo ne nigo. Elihu nokonyo Ayub mondo ong’e ni gimaduong’ monego oket e pache en ratiro ma Jehova nigo mar locho, kar keto pache mana kuom timne matir. Bende, ne ok oyie kata matin gi paro mag chwo adek ma ne wuondore ni gin osiepe Ayub.

Jehova noduogo owuoyo gi Ayub korieyo pache. Notiyo gi chuech mondo okony Ayub ng’eyo kaka dhano en chuech matin ahinya kopim gi Nyasaye. Ayub nobolore morwako paro ma nomiyeno. Nikech Jehova “ogundho gi hera matut kendo okecho ji,” nomiyo Ayub obedo gi ngima maber, noduokone mwandune nyadiriyo, kendo noguedhe gi nyithindo apar. (Jakobo 5:11) Nikech Ayub nosiko komakore gi Jehova kata sama noromo gi tembe mager, nonyiso maler ni Satan noriambo ka nowacho ni dhano ok nyal siko komakore gi Nyasaye sama giromo gi tembe.

​—Kaluwore gi weche manie bug Ayub.