SULA MAR 15
Yesu En Ng’a?
Yesu en achiel kuom joma ong’ere ahinya. Kata kamano, ji mang’eny ong’eyo mana nyinge to ok ging’eyo weche mathoth kuome. Gin gi paro mopogore opogore e wi Yesu. Muma to wacho ang’o kuome?
1. Yesu en ng’a?
Yesu en malaika ma ratego modak e polo. En e ma Jehova Nyasaye ne okwongo chueye ka pok ochueyo gimoro amora. Mano e momiyo iluonge ni “jal makayo kuom chuech duto.” (Jo-Kolosai 1:15) Muma luongo Yesu ni ‘wuod Nyasaye ma miderma,’ nikech en e ma Jehova ne ochueye achiel kachiel. (Johana 3:16) Yesu ne otiyo kanyachiel gi Wuon-gi ma en Jehova, ka okonye chueyo gik mamoko duto. (Som Ngeche 8:30.) Yesu nigi winjruok maber ahinya gi Jehova. Owuoyoga e lo Nyasaye ka okowo otene kod chikene, to mano e momiyo iluonge ni “Wach.”—Johana 1:14.
2. Ang’o momiyo Yesu ne obiro e piny?
Chiegni higni 2,000 mokalo, Jehova ne odaro ngima Yesu e yor hono koa e polo mokete ei nyako moro ma silili miluongo ni Maria. E yo ma kamano, ne onyuol Yesu kaka dhano. (Som Luka 1:34, 35.) Yesu ne obiro e piny mondo obed Mesia kata Kristo ma nosingi, kendo mondo owar dhano. a Weche duto ma Muma nokoro e wi Mesia nochopo kuom Yesu kendo ne gikonyo ji fwenyo ni en e “Kristo, Wuod Nyasaye mangima.”—Mathayo 16:16.
3. Yesu ni kanye sani?
Bang’ tho Yesu, nochiere gi del mar roho kendo ne odok e polo. Ka en kuno, “Nyasaye ne omiye migawo ma malo moloyo.” (Jo-Filipi 2:9) Sani Yesu nigi teko mang’eny ahinya. Jehova kende e ma oloye gi teko.
TIM NONRO
Non ane weche momedore e wi Yesu kod gimomiyo dwarore ni wang’eye.
4. Yesu ok en Nyasaye Manyalo Duto
Muma puonjo ni kata obedo ni Yesu en malaika ma nigi teko e polo, pod obolore ne Wuon-gi ma en Jehova Nyasaye. Ang’o momiyo wawacho kamano? Tug VIDIO mondo ine gima Muma puonjo e wi migawo ma Yesu nigo kopim gi mar Nyasaye Manyalo Duto.
Ndiko ma luwogi konyowa ng’eyo tudruok manie kind Jehova gi Yesu. Som ndiko ka ndiko, kae to uwuo e wi penjo ma luwo.
Som Luka 1:30-32.
-
Malaikano nolero nade tudruok manie kind Yesu kod Jehova, ma en “Ng’at Mamalo Chutho”?
Som Mathayo 3:16, 17.
-
Ka ne itiso Yesu, dwol ma nowuok e polo nowacho ang’o?
-
Iparo ni mano ne en dwond ng’a?
Som Johana 14:28.
-
E kind wuoro gi wuoyi, ng’ano man gi teko mang’eny kendo mosedak aming’a moloyo wadgi?
-
Yesu ne temo wacho ang’o ka ne oluongo Jehova ni Wuon-gi?
Som Johana 12:49.
-
Be Yesu nenoga ni en gi Wuon-gi gin ng’ato achiel? In ineno nade?
5. Ang’o ma nyiso ni Yesu ne en Mesia?
Muma oting’o weche mang’eny mokor ma ne dhi konyo ji ng’eyo ni Yesu e Mesia ma ne Nyasaye oyiero mondo ores dhano. Tug VIDIO mondo ine e yo machuok weche moko mokor ma Yesu nochopo ka ne en e pinyka.
Som weche mokorgi, kae to uwuo e wi penjo ma luwo.
Som Mika 5:2 mondo ing’e kama nonego onyuolie Mesia. b
-
Be wach ma nokorno nochopo ka ne onyuol Yesu?—Mathayo 2:1.
Som Zaburi 34:20 kod Zekaria 12:10 mondo ine weche ma nokor e wi tho mar Mesia.
-
Be weche ma nokorgo notimore? —Johana 19:33-37.
-
Be iparo ni Yesu e ma ne omiyo weche ma nokorgo otimore?
-
Mano puonji ang’o e wi Yesu?
6. Puonjruok e wi Yesu kelonwa ber
Muma lero gimomiyo ber ka wapuonjore e wi Yesu kod migawo ma Jehova omiye. Som Johana 14:6 kod 17:3, kae to uwuo e wi penjo ma luwoni:
-
Ang’o momiyo dwarore ni wapuonjre e wi Yesu?
Yesu noyawonwa yo mar bedo osiepe Nyasaye. Nopuonjo adiera e wi Jehova, kendo kokalo kuome, wanyalo yudo ngima ma nyaka chieng’
PARO MA JOMOKO NIGO: “Joneno mag Jehova ok oyie kuom Yesu.”
-
Inyalo dwoko nade?
PUONJ MADUONG’
Yesu en malaika ma nigi teko. En Wuod Nyasaye kendo en e Mesia.
Ang’o ma ipuonjori?
-
Ang’o momiyo iluongo Yesu ni “jal makayo kuom chuech duto”?
-
Yesu ne timo ang’o ka ne pok obiro e piny?
-
Wang’eyo nade ni Yesu e Mesia?
MED TIMO NONRO
Puonjri weche momedore e wi migawo ma Yesu nigo kaka Mesia.
“Be Weche ma Nokor e Wi Mesia Nyiso ni Yesu e Mesia?” (Sula ma yudore e jw.org)
Non ane ka be Muma puonjo ni Jehova nonyuolo Yesu kaka dhano nyuologa nyithindo.
“Ang’o Momiyo Iluongo Yesu ni Wuod Nyasaye?” (Sula ma yudore e jw.org)
Ne ane gimomiyo Muma ok oyie gi puonj mar Nyasaye ma Nyadidek.
“Be Yesu En Nyasaye?” (Ohinga mar Jarito, April 1, 2009)
Som ane sigand miyo moro ma ngimane ne olokore bang’ nono gima Muma wacho e wi Yesu.
“Miyo Moro ma Nya-Yahudi Lero Gimomiyo Nochako Nono Yie ma ne En-go Kendo” (Nenuru!, Mei 2013)
a Sula mar 26 kod mar 27 biro leronwa gimomiyo onego owar dhano kod kaka Yesu nowarowa.
b Som Weche Momedore namba 2 mondo ine wach ma nokor ma nyiso kinde sie ma Yesu ne dhi fwenyore e piny.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
