Yesu nowacho ni Jokristo nyaka batisi. (Som Mathayo 28:19, 20.) Kata kamano, batiso en ang’o? To en ang’o ma ng’ato nyaka tim mondo obatise?

1. Batiso en ang’o?

E dho Grik, wach molok ni “batiso” tiende en “nyumo” ei pi. Ka ne obatis Yesu, ne onyume ei Aora Jordan kae to ne “owuok e pi.” (Mariko 1:9, 10) Jokristo madier bende ibatisoga ka inyumo dendgi te ei pi.

2. Batiso nyiso ang’o?

Sama obatis ng’ato, mano nyiso ni osechiwore ne Jehova Nyasaye. Ere kaka ng’ato chiwore ne Jehova? Ka pok obatis ng’ato, olemo kar kende konyiso Jehova ni odwaro tiyone nyaka chieng’. Osingore ni obiro lamo Jehova kende kendo ni obiro keto timo dwach Jehova obed mokwongo e ngimane. ‘Okwerre owuon kendo odhi nyime luwo’ puonj mag Yesu kod ranyisi ma noketo. (Mathayo 16:24) Chiwruok kod batiso mare miyo obedo gi winjruok maber gi Jehova kod Jokristo wetene.

3. Ang’o ma ng’ato onego otim mondo ochop e batiso?

Inyalo ikori ne batiso ka ipuonjori e wi Jehova kendo bedo gi yie motegno kuome. (Som Jo-Hibrania 11:6.) Kaka imedo ng’eyo Jehova kendo bedo gi yie motegno kuome, e kaka ibiro medo here. Timo kamano biro miyi siso mar puonjo jomoko e wi Jehova kendo dak kaluwore gi chikene. (2 Timotheo 4:2; 1 Johana 5:3) Sama ng’ato ochako dak ‘e yo mowinjore e wang’ Jehova mondo obed malong’one chuth,’ onyalo yiero mondo ochiw ngimane ne Nyasaye kendo obatise.​—Jo-Kolosai 1:9, 10. a

 TIM NONRO

4. Nitie gik ma wanyalo puonjore e yo ma ne obatisgo Yesu

Som Mathayo 3:13-​17 mondo ing’e weche momedore e wi kaka nobatis Yesu, kae to uwuo e wi penjo ma luwogi:

• Be ne obatis Yesu ka en nyathi matin?

• Ne obatise nade? Be ne okir mana pi kuome?

Yesu nochako timo migawo makende ma ne Nyasaye omiye e piny bang’ kosebatise. Som Luka 3:21-​23 kod Johana 6:38, kae to uwuo e wi penjo ma luwoni:

• Bang’ ka nosebatis Yesu, en tich mane ma ne oketo mokwongo e ngimane?

5. Inyalo timo kinda mi batisi

Chiwruok ne Nyasaye mi batiswa nyalo nenore ka gima tek. Kata kamano, inyalo timo dongruok ma chop kama iwinjo ka iikori mondo obatisi. Mondo iyud ranyisi mag joma notimo kamano, tug VIDIO.

Som Johana 17:3 kod Jakobo 1:5, kae to uwuo e wi penjo ma luwoni:

• Ang’o ma nyalo konyo ng’ato mondo oikre ne batiso?

1. Wachiwore ne Jehova ka wanyise ni wadwaro tiyone nyaka chieng’

2. Sama itisowa, wanyiso e lela ni wasechiwore ne Nyasaye

 6. Batiso miyo ng’ato bedo e riwruok mar oganda Jehova

Sama otiswa, wabedo e riwruok mar oganda Jehova manie piny mangima. Kata obedo ni wawuok kuonde mopogore opogore kendo wapon e yo mopogore, puonj ma wayiego kendo ma waluwo chalre. Som Zaburi 25:14 kod 1 Petro 2:17, kae to uwuo e wi penjo ma luwoni:

• Sama obatis ng’ato, obedo gi winjruok ma chalo nade gi Jehova kod Jokristo wetene?

 PUONJ MADUONG’

Yesu nopuonjo ni onego obatis Jokristo. Mondo obatisi, nyaka ibed gi yie motegno kuom Jehova, idag kaluwore gi chikene, kendo ichiwrine.

Ang’o ma ipuonjori?

• Batiso en ang’o, to ang’o momiyo odwarore?

• Batiso nyiso ang’o?

• Mondo ng’ato ochiwre ne Nyasaye mi obatise, gin okenge mage monego okaw?