SULA MAR 36
Bed Jaratiro e Gik Moko Duto
Ji duto dwaroga bedo gi osiepe ma joratiro. Jehova bende dwaro ni osiepene obed joratiro. Kata kamano, bedo jaratiro ok en gima yot e piny ma ji mang’eny ok gin joratiro. Wayudo ber mage ka wabedo joratiro e gik moko duto?
1. Gima duong’ momiyo onego wabed joratiro en mane?
Sama wabedo joratiro, wanyiso Jehova ni wahere kendo wamiye luor. Par wachni: Jehova ong’eyo gik moko duto ma waparo kod ma watimo. (Jo-Hibrania 4:13) Oneno sama wan joratiro kendo mano moro chunye. Wach Nyasaye nyisowa niya: “Chuny Jehova osin gi ng’at ma wuondore, to obedo osiep ng’at ma yorene tir.”—Ngeche 3:32.
2. Gin yore mage ma wanyalo nyisogo ni wan joratiro e ngimawa ma pile ka pile?
Jehova dwaro ni “ng’ato ka ng’ato owach adiera gi nyawadgi.” (Zekaria 8:16, 17) Mano tiende ang’o? Seche ma wawuoyo gi joodwa, joma watiyogo, Jokristo wetewa, kata jotelo mag sirkal, ok onego wanyisgi miriambo kata adiera ma nusnus. Joratiro ok kwal gige jowetegi kata mayogi e yor miriambo. (Som Ngeche 24:28 kod Jo-Efeso 4:28.) Gichuloga osuru duto midwaro kuomgi. (Jo-Rumi 13:5-7) Ka waluwo yorego kod mamoko, wabedo “joratiro e gik moko duto ma watimo.”—Jo-Hibrania 13:18.
3. Gin ber mage ma wayudo sama wabedo joratiro?
Ka wang’ere kaka joratiro, mano miyo ji genowa ahinya. Wamiyo ji duto manie kanyakla winjo ka gin gi kuwe mana kaka joot moherore. Wabedo gi chuny ma ok ketnwa bura. Ka wabedo joratiro, ‘wabidho puonj mar Jawarwa, ma en Nyasaye,’ kendo mano ywayo jomamoko mondo giriwre kodwa e lamo madier.—Tito 2:10.
TIM NONRO
Non ane kaka bedo jaratiro konyi kendo miyo Jehova bedo mamor. Bende, inyalo nono kaka inyalo bedo jaratiro e yore mopogore opogore.
4. Jehova mor gi joma joratiro
Som Zaburi 44:21 kod Malaki 3:16, kae to uwuo e wi penjo ma luwogi:
-
Ang’o momiyo paro ni wanyalo pando adiera ok en gima nyiso rieko?
-
Iparo ni Jehova winjo nade ka wawacho adiera kata sama timo kamano ok yot?
Sama nyithindo wacho adier, jonyuolgi bedo mamor. Sama wawacho adier, Jehova bedo mamor
5. Bed jaratiro kinde duto
Ji mang’eny paro ni ng’ato ok onego obed jaratiro kinde duto. Kata kamano, non ane gimomiyo onego wabed joratiro kinde duto. Tug VIDIO.
Som Jo-Hibrania 13:18, kae to uwuo e wi kaka wanyalo bedo joratiro . . .
-
ka wan gi joodwa.
-
ka wan kar tich kata e skul.
-
e yore mamoko.
6. Bedo joratiro konyowa
Seche moko bedo jaratiro nyalo nenore ka gima kelonwa chandruoge. Kata kamano, wanyalo fwenyo bang’e ni bedo jaratiro e gima berie mogik. Som Zaburi 34:12-16, kae to uwuo e wi penjo ma luwoni:
-
Ere kaka bedo jaratiro miyo ngimani bedo maber moloyo?
-
Ka joma okendore gin joratiro, kend margi bedo motegno
-
Ka jotich gin joratiro jotendgi biro genogi ahinya
-
Raia ma joratiro bedoga gi winjruok maber gi jotich mag sirkal
PARO MA JOMOKO NIGO: “Riambo matin ok rach.”
-
Ang’o momiyo in gadier ni Jehova osin gi miriambo duto bed ni oduong’ kata otin?
PUONJ MADUONG’
Jehova dwaro ni osiepene obed joratiro e weche duto ma giwacho kod gik moko duto ma gitimo.
Ang’o ma ipuonjori?
-
Moko kuom yore ma wanyalo bedogo joratiro gin mage?
-
Ang’o momiyo paro ni wanyalo pando adiera ok en gima nyiso rieko?
-
Ang’o momiyo diher bedo jaratiro kinde duto?
MED TIMO NONRO
Ere kaka jonyuol nyalo puonjo nyithindgi mondo gibed joratiro?
Gin ber mage ma wayudo sama watimo kaka wasingore?
Ne ane ka be onego wachul osuru kata obedo ni itiyo kodgi marach.
“Osuru—Be En Gima Dwarore ni Ochul?” (Ohinga mar Jarito, Oktoba 1, 2011)
Ang’o ma ne ochwalo ng’at moro ma chon ne ok jaratiro mondo otim lokruok mi obed jaratiro?
“Ne Afwenyo ni Jehova En Ng’at ma Kecho Ji Kendo Weyonegi Kethogi” (Ohinga mar Jarito, Mei 1, 2015)
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
