SULA MAR 53
Yier Yore mag Manyo Mor ma Jehova Oyiego
Jehova en “Nyasaye mamor.” (1 Timotheo 1:11) Odwaro ni wabed mamor e ngima. Obedo mamor sama wakawo thuolo mar yueyo. E sulani, wabiro nono kaka wanyalo tiyo maber gi kinde mag yueyo e yo ma Jehova oyiego kendo ma miyo wabedo mamor.
1. Gin gik mage monego wapar sama wayiero yore mag manyo mor?
Ang’o miheroga timo sama iyueyo? Jomoko oheroga bet e ot kama okuwe ka gisomo, giwinjo thum, gineno muvi, kata gitiyo gi intanet. Jomoko to ohero timo gik moko kanyachiel gi osiepegi kaka dhi bayo, goyo abal, kata tugo tuke moko. Gimoro amora ma wayiero timo mondo omiwa mor, onego bed gima “long’o ne Ruoth.” (Jo-Efeso 5:10) Ber mondo wang’e wachno nikech yore mag manyo mor ma ji mang’eny ohero gin moting’o gik ma Jehova osin-go kaka timbe mag gero, terruok, kod timbe juok. (Som Zaburi 11:5.) Ang’o ma biro konyowa yiero yore mag manyo mor mowinjore?
Ka wayiero osiepe mohero Jehova, ginyalo konyowa mondo wayier yore mag manyo mor mowinjore. E sula moro mokalo, ne wapuonjore ni “ng’at ma wuotho gi jo mariek nobed mariek.” To ka wamako osiep gi joma ok ohero chike mag Nyasaye, ‘wabiro hinyore.’—Ngeche 13:20.
2. Ang’o momiyo ber ka wanono thuolo ma watiyogo e yore mag manyo mor?
Kata ka waseyiero yore mabeyo mag manyo mor, pod onego wabed motang’ mondo kik gikaw thuolowa mang’eny ahinya. Ka ok watimo kamano, to ok wabi bedo gi thuolo moromo mar timo gik ma dwarore moloyo. Muma jiwowa ni ‘wati maber gi kinde ma wan-go.’—Som Jo-Efeso 5:15, 16.
TIM NONRO
Non ane kaka inyalo yiero yore mag manyo mor mowinjore.
3. Tang’ gi yore maricho mag manyo mor
Ang’o momiyo onego wati gi rieko e yiero yore mag manyo mor? Tug VIDIO, kae to uwuo e wi penjo ma luwogi:
-
Ere kaka tuke ma ne ji tugo chon e piny Rumi chalo gi moko kuom yore mag manyo mor ma kindegi?
-
Ang’o ma Danny nopuonjore e wi yore mag manyo mor?
Som Jo-Rumi 12:9, kae to uwuo e wi penjo ma luwoni:
-
Ere kaka ndikoni nyalo konyi yiero yore mag manyo mor mowinjore?
Moko kuom gik ma Jehova osin-go gin mage? Som Ngeche 6:16, 17 kod Jo-Galatia 5:19-21. Bang’ mano, unyalo wuoyo e wi penjo ma luwoni:
-
Gin gik mage ma ndikogi wuoyoe ma yudore e yore mag manyo mor ma kindegi?
Kaka inyalo yiero yore mag manyo mor mowinjore
Inyalo penjri niya:
-
En ang’o? Be oting’o gimoro ma Jehova osin-go?
-
Atime kinde mane? Be omona timo gik ma dwarore moloyo?
-
Atime gi jomage? Be omiyo atudora kinde ka kinde gi joma ok ohero Jehova?
Ber mondo wabed mabor gi gimoro amora ma nyalo hinyowa. Mano e momiyo onego wawere gi yore mag manyo mor ma wachich ni nyalo bedo maricho
4. Ti maber gi thuolo ma in-go
Tug VIDIO, kae to uwuo e wi penjo ma luwoni:
-
Kata obedo ni owadwano ne ok ne gik maricho, notiyoga nade gi thuolo ma en-go?
Som Jo-Filipi 1:10, kae to uwuo e wi penjo ma luwoni:
-
Ere kaka ndikoni nyalo konyowa ng’eyo thuolo monego watigo e manyo mor?
5. Yier yore mag manyo mor mabeyo
Kata obedo ni Jehova ok oyie gi yore moko mag manyo mor, pod nitie moko mang’eny ma more. Som Eklesiastes 8:15 kod Jo-Filipi 4:8, kae to uwuo e wi penjo ma luwoni:
-
Gin yore mage mag manyo mor miheroga?
Nitie gik mang’eny mabeyo minyalo timo mondo ibed mamor
PARO MA JOMOKO NIGO: “Onge gimoro amora marach gi yore mag manyo mor man gi timbe gero, terruok, kata timbe juok, tek mana ni ok atim gigo.”
-
In ineno nade?
PUONJ MADUONG’
Jehova dwaro ni wayier yore mabeyo mag manyo mor.
Ang’o ma ipuonjori?
-
Gin yore mage mag manyo mor ma Jokristo onego otang’go?
-
Ang’o momiyo onego wanon thuolo ma watiyogo e yore mag manyo mor?
-
Ang’o momiyo diher yiero yore mag manyo mor ma Jehova oyiego?
MED TIMO NONRO
Non ane ni en ng’ano ma nigi ting’ mar timonwa yiero e wi yore mag manyo mor.
“Be Joneno mag Jehova Kwedo Buge, Vidio, Kata Wende Moko?” (Sula ma yudore e jw.org)
Ne ane kaka inyalo timo yiero mabeyo e wi yoreni mag manyo mor.
“Be Yoreni mag Manyo Mor Kod Yueyo Gin Makonyo?” (Ohinga mar Jarito, Oktoba 15, 2011)
E sula ma wiye wacho ni “Ne Aloyo Achaya ma ne An-go,” ne ane gimomiyo ng’at moro noloko yore ma ne omanyogo mor.
Ne ane kaka miyo moro notiyo gi rieko mi otamore yore mag manyo mor mopong’ gi timbe juok.
Samoro Inyalo Hero Magi Bende
PENJO MA JI JOPENJO
Ere Kaka Joneno mag Jehova Puonjoga Ji Muma?
E puonjruok Muma ma Joneno mag Jehova tayoga, inyalo tiyo gi Muma moro amora mihero. Bed thuolo gwelo joodu duto kata osiepeni e puonjruok.
