SULA MAR 60

Dhi Nyime Timo Dongurok

TUGE

Isepuonjori weche mang’eny e wi Jehova nyaka ne ichak puonjori bugni. Gik misepuonjori, osemiyo ihere ahinya ma samoro isechiwori mi obatisi. To ka pok otisi samoro isechano timo kamano machiegnini. Kata kamano, batiso ok e giko mar timo dongruok. Dwarore ni idhi nyime sudo machiegni gi Jehova nyaka chieng’. E yo mane?

1. Ang’o momiyo onego idhi nyime tego osiep manie kindi gi Jehova?

Nyaka wadhi nyime tego osiep manie kindwa gi Jehova. Nikech ang’o? “Mondo kik waba yo” mi waweye. (Jo-Hibrania 2:1) Ang’o ma nyalo konyowa dhi nyime tiyo ne Jehova? Gima nyalo konyowa en bedo modich e tij lendo kendo manyo yore mamoko ma wanyalo tiyonego e okang’ momedore. (Som Jo-Filipi 3:16.) Tiyo ne Jehova e gima berie mogik ma ng’ato nyalo timo e ngimane!—Zaburi 84:10.

2. Gin ang’o kendo monego idhi nyime timo?

Kata obedo ni koro ichiegni tieko puonjori bugni, ngimani kaka Jakristo to pod biro dhi nyime. Muma wacho ni onego ‘warwak kit dhano manyien.’ (Jo-Efeso 4:23, 24) Kaka idhi nyime puonjori Wach Nyasaye kendo dhi e chokruoge, e kaka ibiro dhi nyime puonjori gik manyien e wi Jehova kod kido ma en-go. Many yore minyalo luwogo ranyisine machiegni kaka nyalore e ngimani. Dhi nyime timo lokruoge ma dwarore mondo imor Jehova.

3. Ere kaka Jehova biro konyi timo dongruok?

Muma wacho kama: ‘Nyasaye owuon biro miyo tiegruok mari obed moromo chuth. Obiro miyo ichung’ matek, obiro tegi, kendo obiro miyo igurri e mise ma ok yiengni.’ (1 Petro 5:10) Waduto wayudoga tembe. Kata kamano, Jehova miyowaga gik ma dwarore mondo wachung’ motegno sama tembego oyudowa. (Zaburi 139:23, 24) Osingo ni obiro miyi teko kod gombo mar tiyone kichung’ motegno.—Som Jo-Filipi 2:13.

TIM NONRO

Non ane kaka inyalo dhi nyime timo dongruok kod kaka Jehova biro guedhi.

4. Dhi nyime wuoyo gi Osiepni mihero ahinya

Lamo kod puonjruok Muma osekonyi bedo osiep Jehova. Ere kaka timo gigo nyalo konyi sudo machiegni kode?

Som Zaburi 62:8, kae to uwuo e wi penjo ma luwoni:

Ere kaka inyalo medo bero lamo magi mondo iteg osiep manie kindi gi Jehova?

Som Zaburi 1:2 kod weche moler piny, kae to uwuo e wi penjo ma luwoni:

Ere kaka inyalo bero yo misomogo Muma mondo okonyi tego osiep manie kindi gi Jehova?

Ang’o minyalo timo mondo puonjruok mari omed konyi? Mondo ine paro moko ma nyalo konyi, tug VIDIO, kae to uwuo e wi penjo ma luwo.

VIDIO: Med Bero Yo Mipuonjorigo Muma (5:22)

Gin paro mage mochiw e vidiono minyalo tiyogo?
Gin weche mage ma diher puonjori?

5. Chan gik ma diher timo e tij Jehova

Chano gik ma diher timo e tij Jehova biro konyi dhi nyime timo dongruok. Tug VIDIO, kae to uwuo e wi penjo ma luwo.

VIDIO: Ngima Maberie Moloyo (3:31)

Gin ber mage ma Cameron noyudo nikech noketo chenro maber mar tiyo ne Jehova?

Ji duto ok nyal dhi lendo e piny machielo. Kata kamano, wanyalo keto chenro mar gik ma wanyalo timo e tij Nyasaye. Som Ngeche 21:5, kae to inon gik minyalo chano timo . . .

e kanyakla.
e tij lendo.

Ere kaka puonj manie ndikono nyalo konyi chopo chenroni mar tiyo ne Nyasaye?

Moko kuom gik minyalo timo

Med bero lamo magi.
Som Muma duto.
Tem mondo ing’e ji duto e kanyaklau.
Many ng’at minyalo puonjoga Muma.
Bed japainia makonyo kata mapile.
Ka in owadwa, tim kinda mondo ibed jakony-tich.

6. Inyalo dak gi mor nyaka chieng’!

Som Zaburi 22:26, kae to uwuo e wi penjo ma luwoni:

Ang’o minyalo timo mondo idag kimor sani kendo nyaka chieng’?

PUONJ MADUONG’

Dhi nyime tego winjruok ma in-go gi Jehova kendo iket chenro ma diher timo e tije. Mano e ma biro miyo idag kimor sani kendo nyaka chieng’!

Ang’o ma ipuonjori?

Ang’o ma nyalo miyo ibed gadier ni Jehova biro konyi mondo isik ka itiyone?
Ere kaka inyalo tego osiep manie kindi gi Jehova?
Ere kaka bedo gi chenro mag tiyo ne Nyasaye nyalo konyi mondo itim dongruok?

Tarik ma atieke bugni:

Gima Inyalo Timo Kuom Kinde Malach

Som buk miluongo ni Sud Machiegni gi Jehova kod ‘Bi Ibed Jalupna.’ Bugego biro konyi mondo idhi nyime timo dongruok kendo imed sudo machiegni gi Wuonu manie polo kaachiel gi Wuode.