Ka Nebukadneza nosetero yawuot Juda moko Babilon, noketogi e bwo jatelo ma niluongo ni Ashpenaz. Bang’e Nebukadneza nonyiso Ashpenaz mondo oyier yawuoyi moko ma dendgi ber kendo mariek. Joma oyiergo ne idhi tieg kuom higni adek, mondo bang’e gibi gibed jotelo madongo e Babilon. Omiyo, ne nyaka puonjgi dho Akadia ma nitiyogo ahinya e piny Babilon. Ne nyaka ging’e somo dhokno, ndike, kendo wache. Bende, ne onego gicham chiemo ma chal gi ma ruoth gi jotelo ne chamo. Moko kuom yawuoyigo ne gin Daniel, Hanania, Mishael kod Azaria. Ashpenaz ne omiyogi nyinge manyien mag Babilon. Daniel ne oluong ni Belteshaza. Hanania ne oluong ni Shadrak. Mishael  ne oluong ni Meshak. To Azaria ne oluong ni Abednego. Be tiegruok ma ne gidhi yudo ne dhi miyo giwe tiyo ne Jehova?

Yawuoyi ang’wen-go ne ong’ado ni ne gidhi makore gi chike Jehova. Ne ging’eyo malong’o ni ne ok onego gicham chiemo ma ruoth ne chamo, nikech thoth gik ma ruoth ne chamo ne ok ler ka luwore gi Chike Jehova. Kuom mano, ne gikwayo Ashpenaz niya: ‘Kik ichunwa gi chamo chiemb ruoth.’ To Ashpenaz nodwokogi ni: ‘Ka ok uchamo chiemogo mi ruoth oneno ka dendu ok ber, ruoth biro nega kayiem!’

Daniel nochiwo paro moro. Nonyiso Ashpenaz niya: ‘Yie imiwa mana alode kod pi kende kuom ndalo apar. Kae to irang ane pogruok manie kind dendwa kod dend joma chamo chiemb ruoth.’ Ashpenaz noyie gi parono.

Bang’ ndalo apar, Daniel gi osiepene ne dendgi ber moloyo yawuoyi mamoko ma ne chamo chiemb ruoth. Jehova ne omor ahinya ni Daniel gi osiepenego ne omakore gi chikene. Kuom mano, Jehova ne omiyo Daniel nyalo mar winjo tiend fweny kod lek.

Ka ne tiegruok ma ne itimonegi orumo, Ashpenaz ne otero yawuoyigo ir Ruoth Nebukadneza. Ruoth ne owuoyo kodgi, kendo ne ofwenyo ni Daniel, Hanania, Mishael, kod Azaria ne riek moloyo yawuoyi mamoko ma bende ne otieg kodgi. Ne oyierogi mondo giti e ode. Ne ojapenjogi mondo ging’adne rieko e weche mapek. Jehova nomiyo yawuoyigo obedo mariek moloyo jong’ad-rieko duto mag ruoth kod ajuokene.

Kata obedo ni Daniel, Hanania, Mishael, kod Azaria ne odak mabor gi thurgi, wigi ne ok owil gi ting’ ma ne gin-go kaka jotich Jehova. To nade in? Be ibiro paro Jehova kinde duto, kata ka jonyuolgi ok ni kodi?