Ibrahim ne opuonjo wuode ma Isaka mondo oher Jehova kendo mondo oket chunye duto kuom singo mag Jehova. To ka Isaka ne ochopo jahigni 25 kama, Jehova ne okwayo Ibrahim mondo otim gimoro ma ne ok yot timo. En ang’o ma ne Jehova onyise ni otim?

Jehova nonyiso Ibrahim niya: ‘Ne, kaw wuodi achiel kende, kendo idhi kode e wi got moro ma ni Moria mondo ichiwe kaka misango.’ Ibrahim ne ok ong’eyo kata matin gimomiyo Jehova nonyise ni otim kamano. En notimo atima gima ne onyiseno.

Kinyne gokinyi mang’ich, Ibrahim, Isaka, gi jotichne moko ariyo nochako wuoth ka gidhi Moria. Bang’ wuotho ndalo adek, ne gichako neno gode moko ka limbo gi kuma bor. Ibrahim ne onyiso jotichne mondo oritgi matin, kae to ne giwuok gi Isaka mondo gidhi gichiw ne Jehova misango. Ibrahim ne omiyo Isaka yien mondo oting’, to Ibrahim ne oting’o pala. Isaka nopenjo wuon-gi niya: ‘Baba, ere le ma wadhi chiwo kaka misango?’ Ibrahim nodwoke niya: ‘Wuoda, Nyasaye biro chiwo.’

Ka ne gichopo e wi got, ne gigero kendo mar misango. Kae to Ibrahim ne otueyo lwet Isaka kod tiendene bende, kae to noketo Isaka e wi kendo mar misangono.

Kae to Ibrahim nokawo pala. Gikanyono, dwond malaika mar Jehova ne owinjore ka nyise niya: ‘Ibrahim! Kik ihiny wuodi! Koro to ang’eyo ni in gi yie motegno kuom Nyasaye, nikech iikori  chiwo wuodi kaka misango.’ Kae to Ibrahim noneno im moro komoko gi tungene e bungu ma ne ni machiegni kanyo. Nogonyo Isaka mapiyo, kae to nochiwo imno kaka misango kar chiwo Isaka.

Chakre chieng’no, Jehova ne oluongo Ibrahim ni osiepne. Be ing’eyo gimomiyo ne oluonge kamano? Ibrahim notimo gimoro amora ma ne Jehova nokone ni otim, kata e seche ma ne ok ong’eyo gimomiyo Jehova nyise ni otim kamano.

Jehova nochako osingone niya: ‘Abiro guedhi, kendo abiro miyo nyithindi obed mang’eny.’ Mae nyiso bende ni joma beyo duto ne dhi yudo gueth kokalo kuom Ibrahim.