Nitie kinde moro ma Ben-hadad ruodh Siria ne siko ka monjo Jo-Israel. Kata kamano, janabi Elisha ne fwenyoga wechego, kendo nonyisoga ruodh Israel. Mano ne miyo ruodhno tonyga. Omiyo, Ben-hadad nochano mar mako Elisha. Chieng’ moro ka nowinjo ni Elisha ni Dothan, nooro jolweny mag Siria kuno mondo gimake.

Jo-Siria ne odhi e taondno gotieno. Kinyne gokinyi ka jatij Elisha ne owuok oko, ne oneno ka jolweny mang’eny olworo taondno. Luoro ne omake, kendo nokok niya: ‘Elisha, watim nang’o? ’ To Elisha nodwoke ni: ‘Joma ni kodwa ng’eny moloyo joma ni kodgi.’ Gikanyono, Jehova noyawo wang’ jatij Elisha mi noneno farese modhuro kod jolweny ma nigi geche ma liel mach kopong’o wi gode duto ma nolworogi.

Ka ne jolweny mag Siria otemo mako Elisha, Elisha ne olemo kama: ‘Jehova, yie idin wengegi.’ Gikanyono, jolwenygo nopo ka koro ne ok ginyal ng’eyo kuma ne gintie kata obedo ni wengegi to ne neno. Elisha nonyiso jolwenygo niya: ‘Yaye! Ulal. Kae ok e kama ne ubiroe. Luwauru  mondo ateru ir ng’at ma umanyo.’ Ne giluwo Elisha nyaka Samaria kuma ruodh Israel ne odakie.

Mano e sama jolweny mag Siria nofwenyo kuma ne gintie! Ruodh Israel ne openjo Elisha kama: ‘Aneggi, koso? ’ Be Elisha ne otiyo gi thuolono mondo ochul kuor ne joma ne dwaro makego? Ooyo. Elisha nowacho niya: ‘Kik ineggi. Migi chiemo, kae to iwegi aweya gidog thurgi.’ Omiyo, ruodh Israel ne olosonegi nyasi maduong’, kae to bang’e nonyisogi ni gidog thurgi.