Chuech duto mag roho ma Jehova nochueyo ne beyo. Bang’e malaika achiel nolokore obedo marach. En Satan Jachien. Satan ne dwaro mondo ji olame kar lamo Jehova. Mani e gima notimore:

Ne nitie yedhe mang’eny mane nyago olembe mamit, e puodho mar Eden. Jehova nowacho ne Adam gi chiege, Hawa, ni ne ginyalo chamo olemo moro amora kuom yedhego. To ne nitie yath achiel mane Nyasaye owacho negi ni kik gicham olembe. Nowacho ni ka ne ginyalo chamo olemb yadhno, to adier ne ginyalo tho.—Chakruok 2:9, 16, 17.

Chieng’ moro Hawa ne nitie kende ka thuol nowuoyo kode. Adier, chutho ne ok en thuol e ma newuoyo; ne en Satan Jachien e ma notimo mondo onere ni thuol e ma newuoyo. Satan nowacho ne Hawa ni ka nochamo olemo mokwer, to nobedi mariek kaka Nyasaye. En bende nowacho ni Hawa ne ok nyal tho. Weche gi duto ne gin miriambo. Kata kamano, Hawa nowinjo wach Satan mochamo olemo no. Bang’e, nomiyo Adam moko, kendo en bende nochamo.—Chakruok 3:1-6.

Kuom wach madieri ni, wapuonjore ni Satan en ja ng’anjo kendo ja miriambo. Ne owacho ne Hawa ni kata koketho chik Nyasaye, to ok nonyal tho. Mano ne en miriambo. Notho mana kaka Adam bende ne otho. To Satan ne ok otho ndalono, kata kamano giko en ni obiro tho nikech ne otimo richo. Thuoloni, kata kamano, podi ongima, kendo odhi  mana nyime gi wuondo dhano. Pod en ja miriambo, kendo otemo mondo omi ji oketh chike Nyasaye.​—Johana 8:44.

Bang’e, malaika moko bende ne olokore maricho. Malaika gi ne oneno mon mabeyo ma ne nitie e piny kendo ne gidwaro mondo giterre kod gi. Omiyo ne gibiro e piny kendo ne girwakore gi ringruok mag jo ma chwo. Bang’e ne gikawo mon go kaka mondegi. Mano ne ok en dwaro mar Nyasaye.​—Chakruok 6:1, 2; Juda 6.

Timno ne okelo thagruok mang’eny ne dhano. Mond malaika go nonywolo nyithindo, to nyithindogo ne opogore gi nyithindo minywolo gi dhano. Ne gidongo ma ne gi bedo rabede mane ohero lweny kendo ne kwiny. Gikone piny nopong’ gi achach ma Jehova noneno ni mondo oketh jo maricho gi ataro maduong’ mar pi. Noa mane timbene nebeyo, gi jo ode kende e dhano ma nokwo e Atarono.—Chakruok 6:4, 11; 7:23.

Kata kamano, malaika maricho ka nodok e kar dak mar roho; ne ok githo. To ne okumgi. Ne ok oyienegi mondo gidogi ka jo od Nyasaye mane nitie malaika mabeyo. Moloyo, Jehova notamogi mondo kik girwakre gi ringruok dhano kendo. Bang’e gibiro tho e chieng’ bura maduong’.​—2 Petro 2:4; Juda 6.

Kar chakruok mar higni mia achiel ma wantie ni, ne nitie lweny e polo. Kitap Fweny e Muma wuoyo kuom gima notimore: “Eka lweny nowuok e polo. Mikael [Yesu Kristo mane ochier] gi malaikane [mabeyo] ne kedo gi Thuol machon [Satan]. Thuol gi malaikane [maricho] bende nokedo lweny [“kodgi,” New World Translation], to ne ologi; mi kargi ne onge e polo kendo. To nowit Thuol marang’ongo piny, ma en Thuol machon miluongo ni Jachien kendo Satan, ma wuondo piny ngima. Nowite piny, kod malaikane [maricho] bende.”

Giko ne ang’o? Fweny dhi nyime gi wachonwa: ‘Omiyo, bed mamor in polo, kod un jo modak e iye!’ Malaika mabeyo ne onego bed mamor nikech Satan gi malaika maricho, kata roho, koro ne onge e polo. To nade kuom jo manodak e piny? Muma wacho: “To yaye! nobed malit ni piny gi nam; nikech Satan oselornu ka en gi mirima maduong’, kong’eyo ni ndalo ne tin.”​—Fweny 12:7-9, 12.

Adier, Satan gi lange maricho wuondo ji kendo kelo chandruok ne ji e piny. Malaika maricho gi iluongo ni jochiende. Gin jo asik Nyasaye. Malaika go duto richo.