“Ne adongo e gweng’ matin manenitie masawa mar piny pisi,” Dauda modak e piny Sierra Leone pimo. “Chon kane pod an rawera, ne nitie jo udi moko ariyo mane laro lowo e kindgi. Jo ute ariyo gi duto newacho ni lowono margi. Mondo ong’e adiera, jayath noluongi. Jayadhni nomiyo ng’at machielo rang’i, mi noume gi nanga marachar. To piyo piyo ng’at mane oum gi nanga nochako tetni gi tuch luya. Kane orango rang’i, nokok gi duol maduong’ niya: ‘Aneno jaduong’ moro ka biro! Orwako lewni marochere. En rabora to kendo oti, en gi lwar, kendo owuotho kolung’ore matin.’

“Ne onyiso kit kwarmare! Bang’e juogi nomake mogoyo koko kowacho ni: ‘Ka ok uyie gi gima awacho, to biuru une gi wang’u!’ Adier, ne onge ng’ato e kindwa mane ni gi chir mondo odhi one gi wang’e! Jayadhno ne okweyo ng’atno kokuoyo kuome yadh juogi moruw gi it yien kod pi, mane nitie ei agwata.

“Koloso kodwa e dho ja rang’i cha, ‘Kwarwa’ nowacho ni lowono en lopwa. Ne owacho ne dawa ni onyalo puro lowono maonge luoro. Jo ot machielo cha noyie gi kaka burano nong’adi. Larrwuok mar lowono notieki.”

 Gik makamago timore e West Afrika ahinya. Kuno bende, kaka e pinje mamoko e piny ngima, ji tara ma onge kwangi oyie ni jo motho dhi e piny mar roho, kama ginyalo neno kendo chiko ngima mag ji e piny ka. Mano bende en yie mar adier? To bende jo motho ngima adier? To ka ok gi ngima, to gin jo mage mokawore ni gin roho mag jo motho? Dwarore ni mondo wang’e adiera mag penjogi ahinya. Nikech gi ting’o ngima kata tho.