Piny koro chiegni ru sama Petro kwerie mar adek ni ok ong’eyo Yesu. Jo Sanhedrin osetieko ng’ado ne Yesu bura marachno kendo gisedhi yorgi. Ka koro piny ru Tich Abich, jo Sanhedrin chokore kendo. Nenore ni gitimo kamano mondo gimi bura ma nyo gibago gotieno onenre ka gima owinjore gi chik. Kae to ikelo Yesu e nyimgi.

Burano kaso Yesu kendo niya: “Ka in e Kristo, wachnwa.” Yesu dwokogi kama: “Kata kapo ni awachonu, ok ubi yie mano kata matin. Bende, ka apenjou, ok ubi dwoka.” Kata kamano, Yesu nyisogi gi chir ni en e ng’at miwuoyo kuome e Daniel 7:13. Owachonegi kama: “Chakre sani ka dhi nyime, Wuod dhano biro bet e bad Nyasaye korachwich ma nigi teko.”​—Luka 22:67-69; Mathayo 26:63.

Gipenje ka giramo niya: “Kuom mano, in e Wuod Nyasaye, koso?” Yesu dwokogi kama: “Un uwegi usewacho ni an e en.” Gineno ni dwokono miyogi ratiro mar ng’ado ne Yesu buch tho nikech ochayo Nyasaye. Gipenjre kendgi niya: “Ere tiende medo luongo joneno?” (Luka 22:70, 71; Mariko 14:64) Omiyo, gitueyo Yesu kendo gitere nyaka ir Pontio Pilato ma en Gavana ma Jo-Rumi oketo.

Nyalo bedo ni Judas Iskariot neno sama itero Yesu ir Pilato. Ka Judas fwenyo ni oseng’ad ne Yesu buch tho, chunye chandore kendo oywago ang’e. Kata kamano, kar ywak ne Nyasaye mondo onyis ni oloko chunye gadier, oringo mondo oduok ne jodong-jodolo fedha 30 ma minglika. Judas ywagore ne jogo kama: “Ne atimo richo kuom ndhogo remo ma onge ketho.” Kata kamano, gidwoke ahucha-ahucha ni: “Mano obadhowae ang’o? Mano en wachni iwuon!”​—Mathayo 27:4.

Judas wito fedha 30 ma mingligo e hekalu kae to ochako otimo ketho machielo mar temo dere. Nenore ni sama Judas temo dere, bad yath motueyoe tol jakore. Olwar piny e lwendni manie bwo yadhno, kendo obarore ma dende kere koni gi koni.​—Tich Joote 1:17, 18.

 Piny pod en okinyi sama itero Yesu e od Pontio Pilato. Kata kamano, Jo-Yahudi motere kanyo to tamore donjo. Gineno ni kikruok gi joma oa ogendni mamoko biro miyo gibed ma ok ler ka luwore gi Chik. Ka mano otimore, dipo ka mano omonogi chamo sawo mitimoga Nisan 15, ma en odiechieng’ mar Sawo mar Makate Maonge Thowi, to sawono bende inenoga kaka sap Pasaka e okang’ moro.

Pilato biro kae to openjogi kama: “En wach mane ma udonjonego ng’atni?” Gidwoke niya: “Ka da bed ni ng’atni ok en jaketho, dine ok wakele iri.” Pilato fwenyo ni gitemo chune. Omiyo, owachonegi kama: “Un uwegi kaweuru kendo ung’adne bura ka luwore gi chiku.” Jo-Yahudigo nyiso kaka gin gi siso mar nego Yesu sama gidwoko Pilato ni: “Chik ok oyienwa nego ng’ato.”​—Johana 18:29-31.

Kuom adier, ka ginego Yesu ka sap Pasaka dhi nyime, oganda nyalo kelo koko. Ging’eyo ni Jo-Rumi niga gi ratiro mar nego ng’at moketho chik sirkandgi. Omiyo, gitiyo gi chik sirkal e hango ne Yesu mondo mi Jo-Rumi e ma onege ka giparo ni timo kamano biro miyo remb Yesu kik bed e wigi.

Jotend din ok nyis Pilato ni a giseng’ado ne Yesu bura kaka ng’at mochayo Nyasaye. Koro gidonjone gi miriambo niya: “A wayudo ka ng’atni [1] loko ogandawa, [2] kokwero ji mondo kik chul osuru ne Kaisar, kendo [3] owacho ni en owuon en e Kristo ruoth.”​—Luka 23:2.

Nikech Pilato en jatelo ma Jo-Rumi e ma oketo, wach modonjnego Yesu ni owacho ni en ruoth nyalo miyo Pilato okawne okang’. Omiyo, Pilato donjo e ode, oluongo Yesu iye kae to openje kama: “In e Ruodh Jo-Yahudi, koso?” Chalo ka gima Pilato penjo Yesu kama: ‘Dibed ni iseketho chik Jo-Rumi kiketori iwuon ruoth e kom Kaisar?’ Yesu penjo Pilato kama: “Be ipenja kamano kuom dwachi iwuon, koso en nikech jomoko osewachoni weche kuoma?” Nyalo bedo ni Yesu penjo Pilato kamano kodwaro ng’eyo ni Pilato oseng’eye ma romo nade.​—Johana 18:33, 34.

Pilato wuondore ni ok ong’eyo Yesu matut to e iyeno bende ogombo ng’eye. Mano e momiyo Pilato dwoke kama: “An ok an Ja-Yahudi, donge?” Kae to omedo niya: “Ogandani iwuon kod jodong-jodolo osechiwi e lweta. En ang’o misetimo?”​—Johana 18:35.

Yesu dwoko Pilato achiel kachiel e wi wach ma openje kabe en e ruoth. Onge kiawa ni dwoko mochiwo weyo Gavana ma Pilato ka wuoro ahinya.