Yesu osechiwo ne jopuonjrene ranyisi moro ma konyogi ng’eyo gimomiyo nano e lamo en gima dwarore. (Luka 11:5-13) Nyalo bedo ni koro en e alwora mar Samaria kata Galili. Kuno e ma ochako ojiwoe kendo gimomiyo nano e lamo dwarore. Otimo kamano kotiyo gi ranyisi machielo.

Yesu wacho kama: “E taon moro ne nitie jang’ad-bura ma ne ok oluoro Nyasaye kendo ne ok omi ng’ato ang’ata luor. Ne nitie bende chi liel moro e taondno ma ne siko ka dhi ire kendo wachone niya, ‘Ne ni ong’adna bura makare e kinda gi jal ma wan-go gi bura.’ Kuom kinde, ne ok odwar timo kamano, to bang’e noparore owuon kama, ‘Kata obedo ni ok aluoro Nyasaye kendo ok ami ng’ato ang’ata luor, nikech chi lielni siko ka chanda, abiro neno ni ong’adne bura kare mondo kik osik kobiro ira kojonya gi kwayoge.’”​—Luka 18:2-5.

Yesu lero tiend ranyisino kowacho niya: “Winjuru ane gima jang’ad-burano nowacho kata obedo ni en ng’at ma ok kare! Omiyo, kuom adier, donge Nyasaye biro neno ni joge moyier oyudo bura makare, ma gin joma ywakne odiechieng’ gi otieno, ka gie kindeno bende Nyasaye nano kodgi?” (Luka 18:6, 7) Weche ma Yesu olerogo nyiso ang’o e wi Wuon mare?

Kuom adier, Yesu ok tem wacho ni Jehova Nyasaye chalo gi jang’ad-bura ma ok kareno. Kar mano, gima owacho en niya: Ka kata mana dhano ma ok kare ma jong’ad-bura e ma nyalo kawo okang’ ka ng’ato saye kendo jonye gi wach, onge kiawa ni Nyasaye nyalo winjo jogo ma saye. Nyasaye en ng’at makare, ober, kendo obiro dwoko lamo mag joge ma kwaye gi sinani. Gima konyowa ng’eyo mano en ka luwore gi weche ma Yesu medo lero. Owacho kama: ‘Awachonu ni, Nyasaye biro neno ni giyudo bura makare mapiyo.’​—Luka 18:8.

Kinde mang’eny, joteko, jotelo, kod jomwandu e ma ji dewo wang’gi e bura moloyo jomamoko. Nyasaye to ok buon ji. Kinde biro ma obiro neno ni joricho oyudo kum mowinjore kodgi to jotichne biro yudo ngima ma nyaka chieng’.

Gin jomage ma nigi yie ma chal gi ma chi lielno ne nigo? Gin ji adi ma oyie gadier ni Nyasaye biro “neno ni giyudo bura makare mapiyo”? Yesu oa mana chiwo ranyisi ma konyowa neno gimomiyo nano e lamo en gima dwarore. Konyiso gimomiyo onego wabed gi yie ni lamo en gima konyo, openjo kama: “Ka Wuod dhano ochopo, be adier obiro yudo yie ma kama e piny?” (Luka 18:8) Nenore ni wechego nyiso ni yie ma kamano ok bi betie ahinya e kinde ma Kristo ochopo.

Moko kuom joma winjo Yesu neno ni yie ma gin-go oromo. Ginenore giwegi ni gin joma kare, to koni gichayo jomamoko. Koro gin e ma Yesu chiwonegi ranyisi ma luwoni.

Yesu wacho kama: “Ji ariyo noidho nyaka e hekalu mondo gilem, achiel ne en Ja-Farisai to machielo ne en jasol osuru. Ja-Farisai ne ochung’ mochako lemo kowacho e chunye niya: ‘A Nyasaye, agoyoni erokamano ni ok achal gi jomamoko duto kaka: jomecho, gi joma ok kare, gi jochode, kata mana gi jasol osuruni. An atueyo chiemo diriyo e juma, bende achiwo achiel kuom apar mar gik moko duto ma anwang’o.’”​—Luka 18:10-12.

 Jo-Farisai ong’ere kaka joma ohero timo gik ma ginyisorego e nyim jomamoko ni gin joma kare. Kinde ma gihero timoe kamano en kaka chieng’ chiro. Gihero tueyo chiemo chieng’ Wuok Tich kod Tich Ang’wen ma gin odiechienge ma chirni chachoe mondo ji mang’eny onen-gi. Bende, giketore gi luwo gik ma tindotindo kaka chiwo achiel kuom apar mag alode. (Luka 11:42) Dweche moko motelo, ne ginyiso ni gichayo jomamoko kane giwacho kama: “Ogandani ma ok ong’eyo Chik [ka luwore gi pach Jo-Farisai] gin joma osekuong’.”​—Johana 7:49.

Yesu dhi nyime gi ranyisino kama: “To jasol osuru noyudo ochung’ gi kama ochwalore matin, kendo ne ok odwar kata mana ting’o wang’e kochomo polo, to nosiko kogoyo kore kowacho niya: ‘A Nyasaye, kecha an jaricho.’” Ee, jasol osuru nyiso bolruok kendo oyie ni en jaricho. Omiyo, Yesu tieko kama: “Awachonu ni, jali ne odok e dalane kikwane ng’at makare moloyo Ja-Farisaino. Nikech ng’ato ang’ata ma ng’awore malo, noduoke piny, to ng’at ma duokore piny, nong’awe malo.”​—Luka 18:13, 14.

Kuom mano, Yesu nyiso maler ni dwarore ni wabed gi kido mar bolruok. Mano en puonj maber ahinya ne jopuonjrene ma bende gin joma opon e kind Jo-Farisai ma kawore giwegi ni gin joma kare kendo mohero dewo wang’ ji ka luwore gi rang’iny ma ng’ato nitiere. To mano bende en puonj maber ahinya ne jolup Yesu duto ndalogi.