Yesu osebedo ka konyo jopuonjrene kaka onego giti maber gi mwandu mag pinyni. Kata kamano, joma winje ok gin mana jopuonjrene kende. Jo-Farisai bende ni kanyo, kendo gin bende onego bed ni girwako puonj ma Yesu chiwono. Nikech ang’o? En nikech gin ‘joma ohero pesa.’ Bang’ winjo weche ma Yesu puonjogo, “gichako twenyo umgi ka gijare.”​—Luka 15:2; 16:13, 14.

Kata kamano, timgino ok bwog Yesu. Owachonegi niya: “Un joma ketore uwegi ni un joma kare e nyim ji, to Nyasaye ong’eyo chunyu. Nikech gima dhano kawo kaka gima duong’ ahinya, en gima rach ahinya e wang’ Nyasaye.”​—Luka 16:15.

Dhano osegabedo ka kawo Jo-Farisai kaka joma ‘nigi duong’ ahinya.’ Kata kamano, sani to koro yamo oloko. Joma ji osebedo ka miyo duong’ kaka jomwandu, joloch mag siasa, kod jotend din, koro kargi ruombore piny. To joma nigi riyo mar ng’eyo Nyasaye kendo ma ji osegabedo ka jaro, e ma koro idhi ting’ malo. Yesu nyiso maler kaka lokruok maduong’ timore.

Yesu wacho niya: “Ne oland Chik kod weche Jonabi nyaka e ndalo Johana. Chakre kanyo ka dhi nyime, Pinyruodh Nyasaye e ma ilando kaka wach maber kendo ji moa e ogendni mopogore opogore kedone matek. Kuom adier, yot moloyo mondo polo gi piny okal, kar mondo nyukta achiel mar Chik okal ma ok ochopo.” (Luka 3:18; 16:16, 17) Ere kaka weche ma Yesu owachogo nyiso ni nitie lokruok ma timore?

Jotend din mar Jo-Yahudi ketore ni giluwo Chik Musa. Inyalo paro ni kane Yesu ochango muofu moro Jerusalem, Jo-Farisai nosungore ka giwacho niya: “Wan jopuonjre Musa. Wang’eyo ni Nyasaye osewuoyo gi Musa.” (Johana 9:13, 28, 29) Achiel kuom gik momiyo Nyasaye nochiwo Chik kokalo kuom Musa ne en ni chikno ne dhi tayo joma obolore nyaka chop Yesu Mesia bi. Johana Jabatiso noluongo Yesu ni Nyarombo mar Nyasaye. (Johana 1:29-34) Nyaka ne Johana chak tiyo ne Nyasaye, Jo-Yahudi mobolore ma thothgi gin joma odhier, osebedo ka winjo wach “Pinyruodh Nyasaye.” Ee, nitie “wach maber” ne jogo duto ma dwaro yudo gueth kendo dak e bwo Pinyruodh Nyasaye.

Weche ma ne ondik e Chik Musa timore. Chikno osetayo ji nyaka biro mar Mesia, kendo ting’ ma ji nigo mar luwo chikno dhi ka rumo. Kuom ranyisi, Chik ne oyie ne ng’ato ketho kend chuth gi chiege kata gi chwore. Kata kamano, sani to Yesu lero ni “ng’ato ang’ata ma ketho kend gi chiege kae to okendo machielo, ochodo, kendo ng’at ma kendo dhako ma chwore okethogo kend, ng’atno chodo.” (Luka 16:18) Mano kaka weche ma Yesu wachogo wang’o i Jo-Farisai mohero keto ne ji chike modhuro e ngimagi!

 Koro Yesu goyo ngero moro ma nyiso kaka lokruok ma timoreno lich miwuoro. Ngerono wuoyo e wi ji ariyo ma bang’e lokruok maduong’ timore e ngimagi. Sama wanono ngerono, ng’e ni moko kuom joma winjo ka Yesu goyo ngerono gin Jo-Farisai mohero pesa kendo ma ji kawo kaka joma nigi duong’ ahinya.

Yesu wacho kama: “Ne nitie jamwandu moro ma ne jarwakore gi nanga ma rangine rajamna kod nanga mar kitani, kendo nowinjo maber pile ka pile e ngima mamalo. Bende, ne nitie jakuecho moro ma nyinge Lazaro ma ne ji ohero keto e dho ranga ng’atno, to adhonde nopong’o dende kendo nogombo yieng’ gi ng’injo ma ne lwar koa e mesa mar ng’at ma jamwanduno. Ee, kata mana guogi ne biroga to nang’o adhondene.”​—Luka 16:19-21.

Jo-Farisai gin joma ohero pesa, omiyo onge kiawa ni gin e ma Yesu pimogi gi “jamwandu” e ngerono. Jotend din mar Jo-Yahudi bende ohero rwakore gi nengni mabeyo ahinya ma nengogi tek mondo ginyisrego. To kaachiel gi mwandu mag piny ma dibed ni gin-go, ginenore bende kaka joma ni malo ahinya nikech migepe modhialgie kod tije ma gin-go. Omiyo, Yesu pimogi gi ng’at ma jarwakore gi nanga ma rangine rajamna kod mar kitani. Nanga ma rangine rajamnano nyiso migepe modhialgigo, to nanga mar kitani nyiso kaka giketore joma kare e wang’gi giwegi.​—Daniel 5:7.

 Jotelo ma jomwandu ma sungorego kawoga nade jomamoko? Gichayogi kendo giluongogi ni ‛am ha·’aʹrets, tiende ni jopiny ma ok ong’eyo Chik kendo ma ok onego opuonj chikno. (Johana 7:49) Joma ochago gin kaka “jakuecho moro ma nyinge Lazaro” ma kech ne okayo mogombo kata mana chamo “ng’injo ma ne lwar koa e mesa mar ng’at ma jamwanduno.” Mana kaka Lazaro ma adhonde ne osaso dende, joma ochago ineno mana ka gima gin joma Nyasaye ok oyiego.

Gima rachno osegabedo ka timore kuom kinde. Kata kamano, Yesu ong’eyo ni kinde osechopo ma lokruok maduong’ nyaka timre ne joma chalo gi jamwandu miwuoyoe e ngerono kod Lazaro.

Yesu dhi nyime lero kaka lokruok maduong’no betie. Owacho kama: “Koro bang’ kinde, jakuechono ne otho mi malaike noting’e motere nyaka e bath Ibrahim. Jamwanduno bende ne otho, mi ne oyike. Eka ka en e Liel, noting’o wang’e malo nikech nosandore, kendo noneno Ibrahim gi kama bor kod Lazaro e bath Ibrahim.”​—Luka 16:22, 23.

Joma winjo Yesu ong’eyo ni Ibrahim nosetho chon kendo en e Liel. To Ndiko keto maler ni ng’at manie Sheol, tiende ni Liel, kaka Ibrahim, ok nyal neno kata wuoyo. (Eklesiastes 9:5, 10) Ka en kamano, kare jotend din-go paro ang’o e wi tiend ngerono? Nyalo bedo ni otemo wacho ni jotelo mohero pesago ochung’ ne jomage, to joma ochago ochung’ ne ng’a gini?

Yesu oa mana wuoyo e wi lokruok ma timore kowacho ni ne oland “Chik kod weche Jonabi nyaka e ndalo Johana. Chakre kanyo ka dhi nyime, Pinyruodh Nyasaye e ma ilando kaka wach maber.” Kuom mano, tho ma Lazaro kod jamwanduno thogo en kama: Tij yalo ma Johana kod Yesu Kristo osebedo ka timo e ma kelo lokruok e ngimagi machon. Koro kit ngima jamwandu kod mar Lazaro lokore e wang’ Nyasaye.

Jodhier ma gin joma ocha ok osebedo ka yudo puonj mag Nyasaye kaka dwarore. To sani ikonyogi kendo girwako wach Pinyruoth ma Johana Jabatiso nokwongo yalonegi kae to bang’e Yesu. Chon, chiemb chuny ma ne ginyalo yudo koa kuom jotend din ne gin mana ‘ng’injo molwar.’ To koro ipidhogi gi adiera ma dwarore manie Ndiko, to moloyo, giyudo adiera mabeyo ahinya ma Yesu leronegi sani. Chalo mana ka gima koro gikone Jehova Nyasaye omiyogi migepe modhial moloyo.

To mopogore kodgi, jogo ma jomwandu kod jotend din tamore rwako wach Pinyruoth ma  Johana ne olandonegi kod ma Yesu osebedo ka yalonegi e pinyno duto. (Mathayo 3:1, 2; 4:17) Kuom adier, wach miyalono chwanyogi kendo chando chunygi. Mano nyiso motelo kaka gibiro yudo kum mager mar Nyasaye. (Mathayo 3:7-12) Jotend din mohero pesago diher ni Yesu kod jopuonjrene owere gi tij yalo wach Nyasaye. Jotelogo chalo gi jamwandu miwuoyoe e ngerono ma nowacho niya: “Wuonwa Ibrahim, kecha kendo ior Lazaro olut lith lwete e pi mondo obi okuego lewa nikech an gi rem malit e mach ma liel magerni.”​—Luka 16:24.

To mano ok bi timore nikech thoth jotend din ok bi lokore. Ne gitamore “winjo Musa kod Jonabi,” ma nondiko weche ma koro onego obed ni osekonyo jotend din-go yie gi Yesu kaka Mesia kendo Ruoth ma Nyasaye noyiero. (Luka 16:29, 31; Jo-Galatia 3:24) Bende, tokgi pod tek kendo ok gibolre mondo giluw ranyisi mar joma gichayo. Joma gichayogo oserwako Yesu kendo Nyasaye oyie kodgi. To jopuonjre Yesu ok nyal mbeko weche mag adiera mana ni mondo gitim kaka jotend din-go dwaro. E ngero ma Yesu ogoyono, weche ma ‘Wuoro ma Ibrahim’ nowacho ne jamwanduno nyiso gimomiyo jopuonjre ne ok nyal mbeko weche mag adiera.

Yesu wacho kama: “Nyathi, parie kaka ne ijayieng’ gi gik mabeyo e kinde ma ne ingima, to Lazaro ne yudo gik maricho. Kata kamano, koro sani oyudo hoch kae, ka in to iwinjo rem malit. To e wi mago duto, hoho mang’ongo oseket e kindwa kodu, mondo joma dwaro ng’ado ka gia koni ka gibiro iru kik nyal, bende mondo ji kik ng’ad koa kono nyaka irwa.”​—Luka 16:25, 26.

Mano kaka en gima kare kendo malong’o ni lokruok ma kamano otimre! Mano nyiso kaka migepe ma chon ne odhialgo jotend din ma ng’aworego koro olal nono. To joma obolore moyie rwako jok mar Yesu koro yudo yueyo kendo ipidhogi gi chiemb chuny. (Mathayo 11:28-30) Lokruogno dhi nenore ayanga dweche moko manok ma biro. Mano dhi timore sama singruok manyien dhi kawo kar singruok mar Chik. (Yeremia 31:31-33; Jo-Kolosai 2:14; Jo-Hibrania 8:7-13) Sama Nyasaye biro olo rohone maler chieng’ Pentekost higa 33, biro nenore ayanga ni Nyasaye oyie gi jopuonjre Yesu, to ok Jo-Farisai kod jotend din ma gin osiepegi.