Higni ma dirom 17 osekalo nyaka Yesu ne penj jopuonj penjo e hekalu ka en jahigni 12. Sani koro en dwe mar Mach kata April e higa mar 29. Ji mang’eny wuoyo e wi wat Yesu miluongo ni Johana, ma yalo e alwora duto man yo Podho-Chieng’ mar Aora Jordan.

Johana en ng’at ma jaber kendo kite kod weche mowacho bende beyo. Ojarwakore gi nanga mar yie ngamia, kendo otueyo msip mar pien e nungone. Gik mochamo gin det bonyo kod mor kich manie bungu. En ote mane ma en-go? Owacho kama: “Lokuru chunyu ua e richo nimar Pinyruodh polo osekayo machiegni.”​—Mathayo 3:2.

Ote ma Johana yalono moro joma obiro winje. Ng’enygi fwenyo ni onego gilok chunygi, tiende ni gilok timbegi machon kod yoregi ma ok kare mondo gibed gi kit ngima manyien. Joma obiro winje oa ‘Jerusalem gi Judea duto kod pinje duto mokiewo gi Jordan.’ (Mathayo 3:5) Thoth joma obiro winjo Johana loko chunygi a e richo. Obatisogi konyumogi e pi e Aora Jordan. Nikech ang’o?

Obatiso ji kaka ranyisi ma ginyisogo ni giseloko chunygi gadier a e richo nikech ketho singruok mar Chik ma Jo-Israel notimo gi Nyasaye. (Tich Joote 19:4) Kata kamano, nitie jomoko kanyo ma ok owinjore gi batiso. Mago gin jotend din, gi Jo-Farisai, kod Jo-Sadukai ma bende obiro ire. Johana luongogi ni “koth thuonde” kendo owachonegi kama: “Nyaguru olemo ma nyiso ni useloko chunyu ua e richo. Kik uwach e chunyu ni, ‘Wan gi wuonwa ma en Ibrahim.’ Nimar awachonu ni Nyasaye nyalo loso ne Ibrahim nyithindo koa kuom kitegi. Oseket le e tie yien. Omiyo, yien duto ma ok nyag olemo mabeyo ibiro tong’ mi witgi e mach.”​—Mathayo 3:7-10.

Johana humbe lach, ote ma en-go bende en ote motegno, kendo obatiso ji mang’eny. Mano e momiyo oor jodolo gi Jo-Lawi ire mondo gipenje kama: “In e ng’a?”

Johana dwoko achiel kachiel niya: “Ok an e Kristo.”

Gimedo penje kama: “To kare in ng’a? In Elija, koso?”

Odwokogi niya: “Ok an en.”

Gipenje kendo kama: “Be in e Janabi?,” tiende ni Janabi maduong’ ma ne Musa okoro ni ne dhi biro.​—Rapar mar Chik 18:15, 18.

ohana dwokogi niya: “Ooyo!”

Pod giramo mana kama: “In ng’a? Nyiswa mondo water dwoko ne joma oorowa. En ang’o ma diwach kuomi iwuon?” Johana dwokogi niya: “An e ng’at ma dwonde kok e thim kama, ‘Losuru yo moriere tir ne Jehova,’ mana kaka janabi Isaya nokoro.”​—Johana 1:19-23.

Gipenje kendo niya: “To kare ang’o momiyo ibatiso ji ka ok in e Kristo, kata Elija, kata Janabi?” Omiyogi dwoko makare kama: “Abatiso ji gi pi. Nitie ng’at mochung’ e kindu ma ok ung’eyo, en ng’at ma biro bang’a.”​—Johana 1:25-27.

En adier ni Johana ong’eyo ni oiko yo kuom miyo ji oik chunygi mondo girwak Mesia ma ne okor wachne ni biro bedo Ruoth. Johana wacho e wi Mesia niya: “Jal ma biro bang’a nigi teko moloya, kendo ok awinjora lonyo wuochene.” (Mathayo 3:11) Adier en ni Johana wacho bende niya: “Ng’atno ma biro bang’a osetelo e nyima, nimar ne entie ka pok nabetie.”​—Johana 1:15.

Omiyo, ote ma Johana yalo kowacho ne ji ni, “Lokuru chunyu ua e richo nimar Pinyruodh polo osekayo machiegni,” en ote mowinjore ndi! (Mathayo 3:2) Ote moyalono konyo ji ng’eyo ayanga ni tij Yesu Kristo, Ruoth ma Jehova biro keto, chiegni chakore.