Sama Yesu, Petro, Jakobo, kod Johana lor koa e got, giromo gi oganda mang’ongo. Nyaka bed ni nitie gimoro marach motimore. Jondiko olworo jopuonjre koni gi koni ka gimino kodgi wach. Ji bwok ahinya ka gineno Yesu, kendo giringo mondo gimose. Yesu penjo niya: “En ang’o momiyo umino kodgi wach?”​—Mariko 9:16.

Ng’at moro e i ogandano goyo chonge e nyim Yesu kendo olerone kama: “Japuonj, a akelo wuoda iri nikech en gi jachien ma momo. Sa asaya ma jachiendno omake, ojagoye piny kae to buoyo wuok e dhoge kendo omuodo lekene mi tekone rum. A akwayo jopuonjreni mondo gigole, to ne ok ginyal timo kamano.”​—Mariko 9:17, 18.

Nikech chango wuowi ma nigi jachien otamo jopuonjre Yesu, nenore ni jondiko kwedogi kendo jarogi. Omiyo, kar dwoko wuoro ma chunye chandoreno, Yesu wacho ne ogandano kama: “Yaye un tieng’ ma onge yie kendo mobam, anasik kodu nyaka karang’o?” Yesu tiyo gi weche magergo e wi jondiko mosebedo ka chando jopuonjrene sama oonge. Kae to Yesu wacho ne wuoro ma chunye chandoreno niya: “Kelnagouru kae.”​—Mathayo 17:17.

Sama wuowino dhi ir Yesu, jachien momakeno goye piny kendo miyo ogwecho matek. Wuowino ng’ielore koni gi koni kendo buoyo wuok e dhoge. Yesu penjo wuon mare kama: “Mano osebedo ka time kuom ndalo ma romo nade?” Odwoke niya: ‘Chakre e tinne ka dhi nyime kendo nyading’eny ojawite e mach kata e i pi kodwaro nege.’ Ng’atno sayo Yesu kama: “Ka inyalo timo gimoro, kechwa kendo ikonywa.”​—Mariko 9:21, 22.

 Chuny wuorono chandore ahinya nikech chango wuowino osetamo kata mana jopuonjre Yesu. Yesu kecho kendo odewo wuoro ma chunye chandoreno. Owachone kama: “Ang’o momiyo iwacho ni, ‘Ka inyalo’? Gik moko duto nyalore ne ng’at ma nigi yie.” Gikanyono wuon wuowino kok niya: “An gi yie! Konya kama aremie e yie!”—Mariko 9:23, 24.

Yesu fwenyo ni oganda ringo kochomo ire. Kae to okwero jachiendno e wang’ jogo duto. Yesu wacho ne jachiendno niya: “In jachien ma momo kendo ma ite odino, achiki ni iwuog ia kuome, kendo kik ichak idonj kuome!” Sama jachiendno wuok, omiyo wuowino kok kendo ogwecho nyading’eny. Kae to wuowino ling’ ka ng’at motho. Bang’ neno mano, thoth ji wacho niya: “Otho!” (Mariko 9:25, 26) Kata kamano, Yesu mako lwet wuowino kae to ochung’ kendo ‘ochango chakre sano.’ (Mathayo 17:18) En adier ni gima Yesu otimono kawo ji gi wuoro.

E kinde motelo ne mano, ka Yesu ne ooro jopuonjrene mondo gidhi giyal, ne gin gi nyalo mar golo jochiende. Omiyo, koro ka gin e ot kar kendgi gipenje niya: “Ang’o momiyo gole nende otamowa?” Yesu leronegi ni en nikech ne gionge gi yie. Owachonegi kama: “Jachien ma chal kama nyalo mana wuok kuom lamo.” (Mariko 9:28, 29) Ne dwarore ni gibed gi yie motegno kendo gilem mondo Nyasaye omigi teko mar golo jachien ma tekrene ng’eny kamano.

Yesu tieko gi wechegi: “Adier awachonu ni, ka un gi yie ma rom kata gi koth karadali, ubiro wacho ne godni ni, ‘Dar ka idhi kacha,’ to obiro dar, kendo onge gima biro tamou.” (Mathayo 17:20) Mano kaka yie nyalo miyo ng’ato otim gik madongo!

Chandruoge kod pek ma chalo kaka gode nyalo mono ng’ato timo dongruok e tij Jehova. Ginyalo nenore ka gik madongo ma ng’ato ok nyal loyo kata golo. Kata kamano, ka wanyago kido mar yie, wanyalo loyo chandruoge kod pek ma chalo kaka godego.