Yesu kod jopuonjrene osechopo Bethsaida. Ji kelone ng’at ma muofu kae to gisaye ni omule mondo ng’atno ochang.

Yesu mako bad ng’atno, kae to otaye nyaka oko mar gweng’ ma gintiereno. Bang’ ng’ulo olaw e wang’ ng’atno, Yesu penje kama: “Be ineno gimoro amora?” Ng’atno dwoke niya: “Aneno ji to gichal gi yien ma wuotho koni gi koni.” (Mariko 8:23, 24) Yesu mulo wang’ ng’atno, kendo gikanyono wang’e neno. Kae to onyiso ng’at ma koro neno maberno ni kik odonj e gweng’no to odog pacho.

Bang’ mano, Yesu kod jopuonjrene wuotho kochomo yo nyandwat e alwora mar Kaisaria Filipi. En wuoth mabor ma nyalo romo kilomita 40 kama. Gweng’no ni kama oting’ore malo. To Got Hermon ma bedoga gi baraf yudore nyime. Nenore ni wuodhgino kawo ndalo ariyo kama.

Ka pod gin e yo, Yesu dhi kar kende mondo olem. Odong’ mana dweche ochiko kata apar kama to otho.Omiyo, oparore ahinya nikech jopuonjrene. Thothgi nyocha oseweyo luwe, kendo nenore ni moko kuomgi ochwanyore kendo chunygi onyosore. Nyalo bedo ni giwuoro ahinya gimomiyo Yesu notamore ni ji okete ruoth, kata nyalo bedo ni giwuoro gimomiyo notamore chiwo ranyisi ma nyiso ayanga ni en ng’a kuom adier.

Sama jopuonjre chopo kama Yesu lemoe, openjogi niya: “Ji wacho ni Wuod dhano en ng’a?” Gidwoke kama: “Jomoko wacho ni en Johana Jabatiso, moko ni Elija, to pod moko wacho ni en Jeremia kata achiel kuom jonabi.” Ee, ji paro ni nyalo bedo ni Yesu en achiel kuom joma osechier a kuom joma otho. Kata kamano, Yesu dwaro ng’eyo paro ma jopuonjrene nigo kuome. Omiyo, openjogi niya: “Un to uwacho ni an ng’a?” Petro dwoke mapiyo kama: “In e Kristo, Wuod Nyasaye mangima.”​—Mathayo 16:13-16.

Yesu nyiso ni Petro onego obed mamor nikech Nyasaye e ma osefwenyone wachno. Kae to Yesu medo kama: “Awachoni niya: In Petro, kendo e wi lwandani anagerie kanyaklana, kendo dho rangeye mag Liel ok noloye gi teko.” Tiend gima Yesu wacho en ni en owuon e ma obiro gero kanyakla. To kata mana Liel ok bi bedo gi teko e wi jokanyo mag kanyaklano tek mana ni gisiko ka gichung’ motegno e tiyo ne Nyasaye e piny. Yesu singo ne Petro kama: Abiro miyi ofungu mag Pinyruodh polo.”​—Mathayo 16:18, 19.

Wechego ok nyis ni Yesu keto Petro obed gi teko e wi joote wetene. Bende, ok ginyis ni Yesu kete mondo obed mise mar kanyakla. Yesu owuon e Lwanda mibiro gerie kanyaklane. (1 Jo-Korintho 3:11; Jo-Efeso 2:20) Kata kamano, ibiro mi Petro ofungu adek. Obiro tiyo gi ofungu e yor ranyisi ka oyawo thuolo ne ji moa e ogendni mondo gidonj e Pinyruodh polo.

 Petro dhi tiyo gi ofungu mokwongo e Pentekost higa mar 33, kuom joma oloko chunygi gadier. Jogo gin Jo-Yahudi kod joma ok gin Jo-Yahudi ma nodonjo e din mar Jo-Yahudi. Petro biro tiyo gi ofunguno konyisogi gima nyaka gitim eka giyud warruok. Ne odhi tiyo gi ofungu mar ariyo ka oyawo ne Jo-Samaria ma nigi yie mondo giyud thuolo mar donjo e Pinyruodh Nyasaye. Kae to e higa mar 36, Petro ne dhi tiyo gi ofungu mar adek e yawo thuolo ne ogendni mamoko ma ok oter nyangu, kaka Kornelio kod jomamoko.​—Tich Joote 2:37, 38; 8:14-17; 10:44-48.

Mbakano nyoso chuny joote Yesu nikech okoro ni kinde okayo ma ibiro sande kendo nege Jerusalem. Nikech Petro ok ong’eyo ni ibiro chier Yesu e ngima mar polo, Petro tero Yesu tenge kae to okwere kama: “Kechri iwuon, Ruoth; mano ok bi timoreni ngang’.” Kata kamano, Yesu lokre kendo dwoke niya: “Dhi chien ka ng’eya, Satan! In gima kelona chwanyruok, nikech ok in gi paro mag Nyasaye, to mag dhano.”​—Mathayo 16:22, 23.

Yesu koro luongo joote kod jopuonjre mamoko kendo oleronegi ni bedo jalupne ok bi bedo mayot. Owachonegi kama: “Ka ng’ato ang’ata dwaro luwa, to mondo okwerre owuon kendo oting’ yadh-sandne, kae to odhi nyime luwa. Nimar ng’at ma dwaro reso ngimane nolal ngimane, to ng’at molalo ngimane nikech an kendo nikech wach maber, biro reso ngimane.”​—Mariko 8:34, 35.

Kuom adier, mondo jolup Yesu obed joma owinjore e wang’e, nyaka gibed jochir kendo joma tuonore. Yesu wachonegi kama: ‘Ng’at ma neno wich-kuot nikech an kendo nikech wechena e i tieng’ ma terore kendo marachni, Wuod dhano bende none wich-kuot kode e kinde ma nobi e duong’ mar Wuon mare ka en gi malaike maler.’ (Mariko 8:38) Ee, kinde ma Yesu dhi biroe, “enochul ng’ato ka ng’ato ka luwore gi kaka timne obet.”​—Mathayo 16:27.